ཟག་བཅས་ཟག་མེད་ལ་དཔྱད་པའི་ཐོས་བསམ་གྱི་ཟེགས་མ་ཞེས་བྱ་བ་བཞུགས་སོ།  ། རྩོམ་པ་པོ།  སྤུངས་ཐང་རྣམ་རྒྱལ་དབང་ཕྱུག སྔོན་བརྗོད། ༉ ལུས་རྟེན་དལ་འབྱོར་...

ཟག་བཅས་ཟག་མེད་ལ་དཔྱད་པའི་ཐོས་བསམ་གྱི་ཟེགས་མ་ཞེས་བྱ་བ་བཞུགས་སོ།  །

རྩོམ་པ་པོ།  སྤུངས་ཐང་རྣམ་རྒྱལ་དབང་ཕྱུག

སྔོན་བརྗོད།

༉ ལུས་རྟེན་དལ་འབྱོར་ཕུན་སུམ་ཚོགས་པ་ཞིག་བརྙེས་པ་ནས་བཟུང་། རང་གི་སེམས་ཁམས་ཀྱི་ཁྲོད་དང་འཚོ་བའི་རྦ་རླབས་ཀྱི་དཀྱིལ་ན་དགའ་སྐྱོ་གཉིས་ཀྱི་གདུང་བའི་ཚོར་བ་ཉམས་མྱོང་གི་རང་རིག་ནི་ནམ་ཡང་བརྗེད་མི་ཐུབ་ངའི་ལོ་རྒྱུས་ཀྱི་བརྒྱུད་རིམ་ནང་ཚུད་པའི་རྡོ་ལ་རི་མོ་བརྐོས་པ་ཞིག་དང་འདྲ། ལྷག་པར་དུ་ད་ལྟའི་ཆར་ཐོས་བསམ་གྱི་ཆ་ནས་མི་ཚེ་སྐྱེལ་བཞིན་པའི་ཁྲོད་དུ། ཚད་མའི་རིག་པ་ལ་མྱོང་བ་མེད་ཀྱང་དཔྱད་མདོག་བྱེད་པའི་འཚོ་བའི་གནས་སྟངས་ཤིག་ནང་། ངའི་སེམས་ངོས་སུ་འཆར་བའི་ཟག་བཅས་ཟག་མེད་ཀྱི་མེ་ཏོག་ལ་རྣམ་རྟོག་གི་སྦྲང་མས་བཅུད་ལྡན་རོ་མངར་དེ་ཙམ་ཞིག་ལེན་མ་ཐུབ་ཀྱང་དེའི་སྐོར་རང་བློས་གང་ལྕོགས་ཀྱི་ཐོར་བུའི་ཚུལ་དུ་བསྒྲིགས་ཏེ་གཟིགས་པ་པོ་རྣམས་ཀྱི་སྤྱན་ལམ་དུ་ཕུལ་ཐུབ་བྱུང་བ་དེས་སློབ་གཉེར་བ་ངའི་མི་ཚེ་ནང་གི་བརྒྱུད་རིམ་གྱི་ཁྲོད་ནས་ཟིན་ཐོ་ཨང་གི་དང་པོ་དེ་ཡིན་ལགས། །

བཀྲིན་དགའ་ཚོར་གྱི་གཏམ།

༉  རྩོམ་ཤོག་འདི་འདྲ་ཞིག་བྱུང་བ་དེ་ཡང་ང་གཅིག་པུའི་བརྩོན་སྟོབས་ཙམ་མིན་པར། ལམ་སྟོན་གྱི་སྒྲོན་མེ་སྤར་མཁན་ཁོ་བོའི་བཤེས་གཉེན་ཆེན་པོ་མཁན་ཆེན་བསོད་ནམས་རྒྱལ་མཚན་མཆོག་དང་། སློབ་སངས་རྒྱས་དབང་ཕྱུག་མཆོག་ཁོང་དང་གཞན་ཡང་དགེ་རྒན་རྣམ་པ་དག་གི་བཀའ་དྲིན་ཡིན། མ་ཟད་རང་ཅག་རྣམས་ལ་བཀའ་དྲིན་གྱི་བདག་ཉིད་དུ་གྱུར་པའི་མ་ཡུམ་དགོན་པ་འདིའི་བཀའ་དྲིན་ཡང་ཡིན།  ལྷག་པར་དུ་དྲིན་ཅན་ཕ་མ་གཉིས་ཀྱིས་ལུས་སྲོག་གི་དཔལ་ཡོན་དེ་འདྲ་ཞིག་གནང་བཞག་པ་དེར་ནམ་ཡང་བརྗེད་ཐབས་བྲལ་བར་བཀའ་དྲིན་གཞལ་དུ་མ་མཆིས་པས་ཁོང་རྣམ་པ་རྣམས་ལ་སྙིང་ཁོངས་རུས་པའི་གཏིང་ནས་ཐུགས་རྗེ་ཆེའོ་ཞེས་ཞུ་རྒྱུ་ལགས་སོ། །🙏🙏🙏

 མཆོད་པར་བརྗོད་པ་ནི།

རྨད་བྱུང་ཐུགས་རྩལ་ཡངས་པའི་ཐོགས་མེད་ཀྱི་གཅུང་པོ། །ཨ་ཧོ་ལྔ་བརྒྱ་པཎྜིའི་སྐུ་སྐྱེ་རུ་བཞེད་ཅིང་། །

ཀྱེ་མ་གླིང་འདིར་ཆོས་མངོན་ནུབ་ཁ་མ་ཞིག་ན། །བྱོན་པའི་དབྱིག་གཉེན་ཆེན་པོ་སྤྱི་གཙུག་ན་མཆོད་དོ། །

རྩོམ་པར་དམ་བཅའ་བ་ནི།

གཏིང་མཐའ་ཟབ་པའི་མངོན་མཛོད་ས་སྲུང་གི །ཆུ་ཐིག་ཙམ་གྱི་བརྗོད་བྱ་འཐུང་འདོད་པས། །

དཔྱད་པ་མེད་ཀྱང་ཡོད་རྫུས་ཧམ་པ་ཡིས། །མངོན་མཛོད་བརྗོད་བྱ་མདོར་ཙམ་འབྲི་ལ་སྤྲོ། །

ཞེས་སྒོ་གསུམ་གུས་པ་དང་བཅས་པའི་ལེགས་ཚིག་གསེར་གྱི་བསྟོད་ཕྱག་ཨུཏྤལ་ལ་དང་དམ་བཅའ་རྡོ་ཡི་རི་མོས་སྔོན་དུ་བསུས་ཏེ། གང་ཞིག་གླེང་བར་བྱའི་བརྗོད་གཞི་ངོ་མ་དེ་ནི་ཆོས་མོངན་པའི་བརྗོད་བྱར་བྱས་པའི་ཟག་བཅས་དང་ཟག་མེད་ཀྱི་སྐོར་ཡིན་ལ། དེ་ཡང་རྩ་བ་ལས། ཟག་བཅས་ཟག་པ་མེད་ཆོས་རྣམས།། ཞེས་གསུངས་པ་ལྟར། འགྲེལ་པ་ལུགས་ཤོག་༢༦་ལས། གང་དག་ཆོས་མངོན་པ་བསྟན་པ་ལ་རབ་ཏུ་རྣམ་པར་འབྱེད་པ་བྱ་རྒྱུའི་ཆོས་ནི་ཟག་བཅས་རྣམས་དང་། ཟག་པ་མེད་པའི་ཆོས་རྣམས་སོ། ཅེས་གསུངས་པ་ལྟར། དེ་གཉིས་བཤད་པར་བྱེད་པ་ལ་ཡང་རྩ་བའི་ས་བཅད་རྣམ་པ་བཞི་སྟེ།  

༡༽  དེ་ཡང་རང་ལུགས་བཞག་པ་དང་། ༢༽   ཁ་ཅིག་དགག་པ། ༣༽   རྩོད་པ་སྤོང་བ།  ༤༽  མཐར་དགེ་བསྔོ་མཇུག་བྱང་དང་བཅས་པའི་ས་བཅད་རྣམ་པ་བཞིའི་ཐོག་ནས་འདོད་པ་ལ།   

དང་པོ་རང་ལུགས་བཞག་པ་ལ་ཡང་།

༡ ༽  ངེས་ཚིག་བཤད་པ།  ༢ ༽  མཚན་ཉིད་དང་དབྱེ་བ་བཤད་པ།   ༣ ༽  རྣམ་གྲངས་བཞག་པ། ༤༽   དེ་ངོས་བཟུང་བ།  ༥ ༽   དེ་བསྟན་པའི་དགོས་པ།   ༦ ༽   ཁྱད་པར་ཕྱེ་བ། ༧  ༽   ཚད་འཇོག་པའམ་དམ་བཅའ་འདོད་པ། ༨ ༽ མཐའ་བསྡོམ་དང་བརྒྱད་ལས། 

དང་པོ་ནི།  རྒྱུད་ཉོན་མོངས་པ་དང་བཅས་ཤིང་གནས་འོག་ཏུ་ཟག་པས་ན་ཟག་བཅས། རྒྱུད་ལ་ཉོན་མོངས་པ་མི་སྐྱེས་ཤིང་གནས་འོག་ཏུ་ཟག་པ་མེད་པས་ན་ཟག་མེད་དོ།

གཉིས་པ་ནི། གཞུང་ལས། ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། །ཞེས་གསུངས་པ་ལྟར། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་སུ་འགྱུར་པ། ཟག་བཅས་ཀྱི་མཚན་ཉིད། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་སུ་མི་འགྱུར་བ། ཟག་མེད་ཀྱི་མཚན་ཉིད། དབྱེ་བ་ནི།  ཟག་བཅས་ལ་དབྱེ་ན། རྩ་བ་ལས། ལམ་མ་གཏོགས་པའི་འདུས་བྱས་རྣམས། ། ཟག་བཅས། ཞེས་པ་ལྟར། ཚུར་བསྡུ་ན་སྡུག་ཀུན་གཉིས་ཡིན། དོན་ནི་མ་རིག་པས་བཅིངས་པའི་འཁོར་བའི་ཆོས་རྣམས་ལ་གོ་བ་དང་། ཟག་མེད་ལ་དབྱེ་ན། གཞུང་ལས།  ཟག་མེད་ལམ་གྱི་བདེན་པ་དང་།། འདུས་མ་བྱས་རྣམས་གསུམ་ཡང་སྟེ།། ཞེས་པ་ལྟར།  ཚུར་བསྡུ་ན་འགོག་ལམ་གཉིས་ཡིན་ལ། དོན་ནི་མྱང་འདས་དང་དེ་ཐོབ་པར་བྱེད་པའི་ལམ་ལ་གོ་བ་ཡིན་ནོ།

གསུམ་པ་ནི།  རྩ་བ་ལས། གཟུགས་ལ་སོགས་པའི་ཕུང་པོ་ལྔ་། །དེ་དག་ཉིད་དུས་གཏམ་གཞི་དང་། །ངེས་པར་འབྱུང་བཅས་བཞི་དང་བཅས། །གང་དག་ཟག་བཅས་ཉེར་ལེན་པའི། །ཕུང་པོའང་དེ་དག་འཐབ་བཅས་ཀྱང་། །སྡུག་བསྔལ་ཀུན་བྱུང་འཇིག་རྟེན་དང་། །ལྟ་གནས་སྲིད་པའང་དེ་དག་ཡིན། །ཅེས་གསུངས་པ་ལྟར་ཡིན་ལ། དེ་དག་གི་སྟེང་ཟག་པ་དང་དྲི་མ་ཅེས་བསྣན་ན་ལེགས་པར་བསམ་སྟེ། འགྲེལ་པ་ལུགས་ཤོག་གྲངས་༢༥ལས། དྲི་མ་ནི་ཟག་པ་ཡིན་ལ། དེ་མེད་པ་ནི་དྲི་མེད། ཞེས་གསུངས་པའི་ཕྱིར།བཞི་པ་ནི། ཆོས་ཀྱི་སྡོམ་བཞི་སྟོན་པའི་སྒྲ་ལས། ཟག་བཅས་ཐམས་ཅད་སྡུག་བསྔལ་བའོ། །ཞེས་པ་ལྟར།  ཀུན་ནས་ཉོན་མོངས་པའི་ཆོས་ཐམས་ཅད་ལ་ཟག་བཅས་སུ་འཇོག་པ་དང་། རྣམ་པར་བྱང་བའི་ཆོས་ཐམས་ཅད་ལ་ཟག་མེད་དུ་བཞག་པ་ཡིན།

ལྔ་པ་ནི། སྤང་བྱ་དང་བླང་བྱ་ཡིན་པའི་རྒྱུ་མཚན་གྱིས་ཟག་བཅས་ཟག་མེད་ཀྱི་རྣམ་གཞག་ནི་ཆོས་མངོན་པའི་གཞུང་གིས་བརྗོད་བྱར་བྱས་པས་སོ། །མངོན་རྒྱན་སྟོད་ཆ་ཤོག་༢༥་ལས། གཅིག་ཏུ་སྤང་བྱ་དང་བླང་བྱ་ཡིན་པའི་ཕྱིར་རམ། ཡང་ན་འདིས་གཞན་རྣམས་ཀྱང་མཚོན་པར་བྱེད་པའི་ཕྱིར་འགལ་བ་མེད་དོ། །ཅེས་གསུངས་པའི་ཕྱིར་རོ། །

དྲུག་པ་ནི། ཟག་བཅས་དང་ཟག་མེད་གཉིས་ཀྱི་ཁྱད་པར་ལ་ཕན་ཚུན་རྣམ་གཅད་ཡོངས་གཅོད་ཀྱི་སྒོ་ནས་དངོས་འགལ་ཡིན་ཏེ། དེ་གཉིས་དངོས་སུ་འགལ་བ་གང་ཞིག་ཕན་ཚུན་གཞི་མི་མཐུན་པར་གནས་པ་ཡིན་པའི་ཕྱིར་ཏེ། མངོན་རྒྱན་ཤོག་གྲངས་༢༥་ལས། ཟག་པ་དང་བཅས་པ་དང་ཟག་མེད་པ་ནི་ཆོས་རྣམས་ཞེས་བྱ་སྟེ། དེ་གཉིས་ནི་ཕན་ཚུན་རྣམ་པར་གཅོད་པའི་འགལ་བ་ཡིན་པའི་ཕྱིར། ཞེས་གསུངས་པའི་ཕྱིར།

བདུན་པ་ནི། ཁྱོད་ལ་དམིགས་པའི་སྟོབས་ཀྱིས་ཟག་པ་རྒྱས་ནུས་པ་དེ་ཟག་བཅས་ཀྱི་ཚད་དུ་འདོད་པ་དང་། ཁྱོད་ལ་དམིགས་ཀྱང་ཟག་པ་རྒྱས་མི་ནུས་པ་དེ་ཟག་མེད་ཀྱི་ཚད་དུ་འདོད་པ་ཡིན། འོ་ན། དམིགས་པའི་སྒོ་ནས་རྒྱས་སུ་འགྱུར་པ་ཇི་ལྟ་བུ་ཞིག་དང་། མཚུངས་ལྡན་གྱི་སྒོ་ནས་རྒྱས་སུ་འགྱུར་པ་ཅི་ལྟ་བུ་ཞིག་ལ་བཞག་གི་ཡོད་དམ་ཅེས་ན། འདི་ཡོད་དེ། དམིགས་པའི་སྒོ་ནས་རྒྱས་སུ་འགྱུར་པ་ཞེས་པ་ནི། ཕྱི་རོལ་གྱི་ཡུལ་རང་དམིགས་ཡུལ་དུ་གཟུང་ནས་དེའི་སྟོབས་ཀྱིས་ནུས་པ་འཕེལ་བ། དཔེར་ན་དམིགས་ཡུལ་གཟུགས་མཛེས་པ་ཞིག་གཟུང་ནས་དེ་མཐོང་བར་དེའི་ཚེ་དེའི་སྟོབས་ཀྱིས་ཆགས་བློ་ཡང་ཡང་རྒྱས་པ་ལྟ་བུའོ། །མཚུངས་ལྡན་གྱི་སྒོ་ནས་རྒྱས་སུ་འགྱུར་པ་ནི། ནང་གི་སེམས་སེམས་འབྱུང་གཉིས་པོ་གཅིག་གི་གཅིག་གྲོགས་སུ་བྱས་པའི་དེའི་སྟོབས་ཀྱིས་ནུས་པ་འཕེལ་བ། དཔེར་ན། སྒྲ་སྙན་པ་ལ་ཆགས་པའི་ཆགས་བློ་སྐྱེས་པར་དེའི་ཚེ་དེའི་འཁོར་དུ་འབྱུང་བའི་སེམས་འབྱུང་དག་ཀྱང་དེའི་མཐུ་ལ་བརྟེན་ནས་ཡར་འཕེལ་དུ་སོང་བ་ལྟ་བུའོ། །མདོར་ན། ཕྱི་རོལ་གྱི་ཡུལ་ལ་དམིགས་ནས་རྒྱས་པ་དེར་དམིགས་པའི་སྒོ་ནས་རྒྱས་པ། ནང་གི་སེམས་ལ་བརྟེན་ནས་རྒྱས་པ་དེར་མཚུངས་ལྡན་གྱི་སྒོ་ནས་རྒྱས་པའོ། །

བརྒྱད་པ་ནི། མདོར་ན་སྐབས་འདིའི་ལུགས་ལ་ཟག་བཅས་ཟག་མེད་ཀྱི་རྣམ་གཞག་ཤེས་པ་ནི། ཟག་བཅས་ཀྱི་ཆོས་ལ་དམིགས་ནས་སྤང་བྱ་ངོ་ཤེས་པས་འཁོར་བའི་གནས་ལུགས་ཧ་གོ་བ་དང་། ཟག་མེད་ཀྱི་ཆོས་ལ་དམིགས་ནས་ཐོབ་བྱ་ངོ་ཤེས་པས་ཐར་པའི་ལམ་འཇུག་པ་ལ་སྤྲོ་བ་བསྐྱེད་པ་བྱའི་ཕྱིར། དེ་བས་ན་ཟག་བཅས་ཟག་མེད་ཀྱི་རྣམ་གཞག་ནི། ཐར་པའི་ལམ་ལ་འཇུག་ནུས་པའི་རྨང་གཞི་ལྟ་བུ་ཞིག་ཡིན་པས་ཆོས་མངོན་པའི་བརྗོད་བྱ་གཙོ་བོར་བཟུང་ཡིན་ནོ། །           

གཉིས་པ་ཁ་ཅིག་དགག་པ་ནི།

ཁ་ཅིག་ན་རེ། ཟག་བཅས་ཀྱི་མཚན་ཉིད་ནི། རང་གི་དམིཊ་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་པར་འགྱུར་པ་ཟེར་བ་ལ། ཟག་བཅས་ཡོད་ན་རང་གི་དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་པར་འགྱུར་པའི་ཁྱབ་པར་ཐལ། མཚན་མཚོན་ཡིན་པའི་ཕྱིར། འདོད་ན། ཟག་བཅས་ཆོས་ཅན། ཁྱོད་ཡོད་ན་རང་གི་དམིཊ་པ་དང་མཚུངས་ལྡན་གང་རུང་ཡོད་དགོས་པ་ཐལ། འདོད་ན། ཀ་བ་ཆོས་ཅན། རང་གི་དམིཊ་པ་དང་མཚུངས་ལྡན་གང་རུང་ཡོད་པར་ཐལ། ཟག་བཅས་ཡོད་པའི་ཕྱིར། འདོད་ན་ཧ་ཅང་ཐལ་ལོ། མ་གྲུབ་ན། དེར་ཐལ། གཞི་གྲུབ་པའི་ཕྱིར་རོ། །

ཁ་ཅིག་ན་རེ། ཁྱོད་ལ་དམིགས་པའི་སྒོ་ནས་ཟག་པ་སྐྱེ་བ་ཡོད་ན་ཟག་བཅས་ཡིན་པས་ཁྱབ་ཟེར་ན། སྒོམ་ལམ་ཟག་མེད་ཆོས་ཅན། ཟག་བཅས་ཡིན་པར་ཐལ། ཁྱོད་ལ་དམིགས་པའི་སྒོ་ནས་ཟག་པ་སྐྱེ་བ་ཡོད་པའི་ཕྱིར། འདོད་ན། མ་ཡིན་པར་ཐལ། ཟག་མེད་ཡིན་པའི་ཕྱིར། མ་གྲུབ་ན། དེར་ཐལ། འཇིག་རྟེན་ལས་འདས་པའི་སྒོམ་ལམ་ཡིན་པའི་ཕྱིར།  ཁྱབ་སྟེ།  སྐབས་འདིར་བྱས་སྨྲས་ལུགས་ལ་སྒོམ་ལམ་ལ་འཇིག་རྟེན་པའི་སྒོམ་ལམ་དང་། འཇིག་རྟེན་ལས་འདས་པའི་སྒོམ་གཉིས་སུ་བཞག་པས་སྒོམ་ལམ་ཡིན་ན་འཐའ་གཅིག་ཏུ་ཟག་མེད་ཡིན་པར་མ་ཁྱབ་པའི་གནད་གའང་དེར་གཏུགས་པ་ཡིན་གྱི། གོང་དུ་མ་གྲུབ་ན། དེར་ཐལ། འགོག་ལམ་ལ་དམིགས་པའི་སྒོ་ནས་ཟག་པ་སྐྱེ་བར་ཡོད་པའི་ཕྱིར། མ་གྲུབ་ན། མཛོད་རང་འགྲེལ་pdf ཤོག་གྲངས་༥་ལས། འགོག་པ་དང་ལམ་གྱི་བདེན་པ་ལ་དམིགས་པས་ཀྱང་ཟག་པ་སྐྱེ་བར་ནི་འདོད་མོད་ཀྱི། དེ་གཉིས་ལ་རྒྱས་པར་མི་འགྱུར་བས་དེ་གཉིས་ཟག་པ་དང་བཅས་པ་ཉིད་དུ་ཐལ་བ་མེད་དོ། །ཅེས་གསུངས་པ་ལྟར། ལུང་དེ་དང་མཐུན་པར། འགྲེལ་པ་ལུགས་ཤོག་གྲངས་༢༦་ལས། དེ་གཉིས་ལ་དམིགས་པས་ཀྱང་ཟག་པ་སྐྱེ་བར་འདོད་མོད་ཀྱང་རྒྱས་པར་མི་འགྱུར་བས་སོ། །ཅེས་གསུངས་པའི་ཕྱིར།

ཡང་ཁ་ཅིག གཞུང་ལས། ཟག་མེད་ལམ་གྱི་བདེན་པ་དང་། ཞེས་པའི་རྩ་ཚིག་དེར་བརྟེན། ཟག་མེད་ཡིན་ན་ལམ་བདེན་ཡིན་པས་ཁྱབ་ཅེས་པ་ལ། འདུས་མ་བྱས་ཆོས་ཅན། ལམ་བདེན་ཡིན་པར་ཐལ། ཟག་མེད་ཡིན་པའི་ཕྱིར། མ་གྲུབ་ན། མངོན་པར་མཛོད་ལས། ཟག་མེད་ལམ་གྱི་བདེན་པ་དང་། །འདུས་མ་བྱས་རྣམས་གསུམ་ཡང་སྟེ། ། ཞེས་གསུངས་པའི་ཕྱིར། འདོད་ན། དེ་ཆོས་ཅན། ཤེས་པ་ཡིན་པར་ཐལ། ལམ་བདེན་ཡིན་པའི་ཕྱིར་རོ། །འདོད་ན། རྟག་མི་རྟག་གཉིས་ཀྱི་གཞི་མཐུན་ཡོད་པར་ཐལ་ལོ། །

གསུམ་པ་རྩོད་པ་སྤོང་བ་ནི།

ཁ་ཅིག་ན་རེ། སྒོམ་ལམ་ཟག་མེད་ཆོས་ཅན། ཟག་བཅས་ཡིན་པར་ཐལ། ཁྱོད་ལ་དམིགས་ནས་ཟག་པ་སྐྱེ་བ་ཡོད་པའི་ཕྱིར་ཟེར་ན་མ་ཁྱབ་སྟེ། མཁན་ཆེན་གཞན་འགས་མཛད་པའི་མངོན་མཛོད་མཆན་འགྲེལ་ཤོག་གྲངས་༡༠་ལས། སྒོམ་ལམ་ལ་དམིགས་པས་ཀྱང་ཟག་པ་སྐྱེ་བར་ནི་འདོད་མོད་ཀྱི་དེ་གཉིས་ལ་རྒྱས་པར་མི་འགྱུར་བས་ཟག་བཅས་སུ་ཐལ་བ་མེད་དོ། ཅེས་གསུངས་པའི་ཕྱིར།

ཁ་ཅིག་གི བྱེ་སྨྲས་ཆོས་ཅན། རྣམ་པ་ཁས་ལེན་པར་ཐལ། མཚུངས་ལྡན་རྣམ་ལྔ་མཚུངས་ཁས་ལེན་པའི་ཕྱིར་ནའང་མ་ཁྱབ་བོ། །དེར་ཐལ། རྣམ་པ་ཁས་མ་ལེན་པར་མཚུངས་ལྡན་རྣམ་པ་ལྔ་མཚུངས་ཟེར་བའང་ཁས་ལེན་སྟངས་མེད་པའི་ཕྱིར་ན། མ་གྲུབ་སྟེ། བྱེ་སྨྲས་རྣམ་པ་ཁས་མི་ལེན་ཟེར་བ་དེ་ནི་ཤེས་པ་དེའི་ཡུལ་འཛིན་པའི་སྐབས་ཡུལ་གྱི་རྣམ་པ་ཤེས་པ་དེ་ལ་སྣང་བ་མེད་པས་སྐབས་དེའི་རྣམ་པ་ཁས་མི་ལེན་ཟེར་བ་ཡིན་པའི་ཕྱིར། མཆིམས་མཛོད་ལས་གསུངས་པའི་རྣམ་པ་ཁས་མི་ལེན་ཞེས་པའང་དགོངས་པ་ཡང་དེ་ཡིན་གྱི།

ཁ་ཅིག་གི ཟག་བཅས་ཟག་མེད་གཉིས་ཀ་ཆོས་ཅན། དགག་བྱ་དངོས་སུ་དཔྱད་པའི་ཚུལ་གྱིས་རྟོགས་པར་བྱ་བ་ཡིན་པར་ཐལ།  དགག་པ་ཡིན་པའི་ཕྱིར། མ་གྲུབ། དེར་ཐལ།  ཁྱོད་ཀྱི་མཚན་ཉིད་དགག་པ་ཡིན་པའི་ཕྱིར། མ་གྲུབ། དེར་ཐལ། ཁྱོད་ཀྱི་མཚན་ཉིད་ཀྱི་ཚིག་འཛིན་ལ་དགག་ཚིག་དངོས་སུ་འཛིན་པའི་ཕྱིར་ན། མ་ཁྱབ་བོ། །

ཡང་ཁ་ཅིག་ན་རེ། འདུས་བྱས་ཆོས་ཅན། ཟག་བཅས་མ་ཡིན་པར་ཐལ།  ཁྱོད་ལ་དམིགས་པའི་སྒོ་ནས་ཟག་པ་རྒྱས་ནུས་པ་མེད་པའི་ཕྱིར། མ་གྲུབ། དེར་ཐལ། ཁྱོད་ཀྱི་དམིགས་པ་མེད་པའི་ཕྱིར་ཟེར་ན་མ་ཁྱབ། 

ཁ་ཅིག་ན་རེ། ཟག་བཅས་ཟག་མེད་གཉིས་པོ་ཆོས་ཅན། དངོས་འགལ་མ་ཡིན་པར་ཐལ། གཞི་མཐུན་ཡོད་པའི་ཕྱིར་ན། མ་གྲུབ་བོ། །མཁན་གཞན་འགས་མཆན་འགྲེལ་༤༡་ལས། ཡིད་དང་བདེ་བ་དང་ཡིད་བདེ་བ་དང་བཏང་སྙོམས་དག་དང་དད་པ་ལ་སོགས་པ་ལྔ་དང་དབང་པོ་དགུ་པོ་དག་ནི་ཟག་བཅས་ཟག་མེད་རྣམ་པ་གཉིས་ཀ་ཡིན་ནོ། །ཞེས་གསུངས་པའི་ཕྱིར་ཟེར་ན། ཁྱབ་པར་མ་བྱུང་སྟེ། དེའི་དོན་ནི། དབང་པོ་དེ་དག་ལ་ཟག་བཅས་ཟག་མེད་གཉི་གའི་ཆ་ཡོད་པས་ཅི་རིགས་པ་ཡོད་ཅེས་པའི་དོན་དུ་གསུངས་པའི་ཕྱིར་རོ། །

བཞི་པ་མཐར་དགེ་བསྔོ་མཇུག་བྱང་དང་བཅས་པ་ནི།

ཟག་བཅས་ཟག་མེད་དཔྱད་པའི་ནམ་མཁའ་ལ། །དོན་གྱི་ཆུ་ཤེལ་དབང་པོ་མ་ཤར་ཡང་། །

ཚིག་གི་ཉི་མའི་འོད་རི་ཤར་བ་ལ། །དགེ་རྩ་འདི་ཉིད་ཐམས་ཅད་བྱང་ཆུབ་བསྔོ། །

ཞེས་ཐོས་བསམ་གྱི་ཕུག་ཐག་མ་ཆོད་ཞིང་། རིག་པའི་གཞུང་ལུགས་ལ་སྦྱང་བརྩོན་གྱི་སྟོང་ལ།  བློ་གྲོས་ཀྱི་རྩལ་མ་མཆིས་པའི་གང་ཟག་ང་འདྲ་བ་ཞིག་གི་བྲིས་པའི་རྩོམ་ཤོག་དེའི་དོན་ནི་ཧ་ཅང་གི་གཏིང་ཟབ་ལ་དཔྱད་པ་མཐའ་མེད་པ་ཞིག་ཡིན་པས། ཁོ་བོས་ཀྱང་དེ་ཙམ་གྱི་དཔྱད་པ་མ་ནུས་ཏེ་ད་ལྟ་མཛོད་གནས་གཉིས་པ་བལྟས་བཞིན་པ་ཡིན་པས་གནས་དང་པོ་ནས་བཤད་ཟིན་པའི་ཟག་བཅས་ཟག་མེད་ཀྱི་སྐོར་ཁོ་ན་ལ་བསམ་དཔྱད་ཀྱི་ཚུལ་དུ་བྲིས་པ་དེའང་། རང་ལུགས་གནམ་ལོ་མེ་ཕོ་རྟ་ལོ་ཟླ་གཉིས་པའི་ཚེས་༢༥་མཁའ་འགྲོ་འབུམ་གྱི་དུས་བཟང་དང་སྟབས་བསྟུན་བྲིས་པ་དེས་ཕ་མས་གཙོས་པའི་སེམས་ཅན་ཐམས་ཅད་དགེ་བའི་སྣང་བ་དང་འགྲོགས་ཏེ་གཏན་གྱི་བདེ་བ་ཐོབ་པའི་རྒྱུ་རུ་གྱུར་ཅིག།     །།

རྣམ་རྒྱལ་དབང་ཕྱུག
བསྟན་བཅོས་མཁན་ལོ་ངོ་དང་པ།
སྤྱི་ལོ་ ༢༠༢༦

རྒྱབ་བརྟེན་ཡིག་ཆ།

མཛོད་རྩ་བ།

མཆན་འགྲེལ།

འགྲེལ་པ་ལུགས།

མཛོད་རང་འགྲེལ།   

མཆིམས་མཛོད་ཆེ་བ་བཅས་ཡིན་ལ།