གང་གི་ཐུགས་བརྩེ་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། ། དམ་པའི་ཆོས་ནི་སྟོན་མཛད་པའི། །གོོ་ཏམ་དེ་ལ་ཕྱག་མཚལ་ལོ། ། ཞེས་མཆོད་པར་...
གང་གི་ཐུགས་བརྩེ་ཉེར་བཟུང་ནས།
།ལྟ་བ་ཐམས་ཅད་སྤངས་པའི་ཕྱིར། །
དམ་པའི་ཆོས་ནི་སྟོན་མཛད་པའི།
།གོོ་ཏམ་དེ་ལ་ཕྱག་མཚལ་ལོ། །
ཞེས་མཆོད་པར་བརྗོད་པའི་ལེགས་ཚིག་གསེར་གྱི་མེ་ཏོག་སྔོན་དུ་འཐོར་ནས། འདིར་གང་ཞིག་གླེང་བར་བྱ་བ་ཡང་། རྗེ་བཙུན་བྱམས་པ་མགོན་པོས་མཛད་པའི་བསྟན་བཅོས་མངོན་རྟོགས་རྒྱན་དེའི་མཚན་ལེགས་པར་བརྗོད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཞེས་བྱའི་མཚན་དོན་འགྲེལ་པ་ཞུ་རྒྱ་ཡིན་པས། དེ་ལ་དང་པོར་གོ་རྟོག་ཡངས་པའི་ཕྱིར་ས་བཅད་རྣམ་པ་གཉིས་ཏེ། སྤྱིར་མཚན་དོན་བཤད་པ་དང་། བྱེ་བྲག་བཀའ་བསྟན་ལ་དཔྱད་པ། དང་པོ་ལའང་ཚིག་བྲུ་རེ་རེའི་དོན་བཤད་ནས་བཅུད་བསྡོམས་བྱེད་པ་དང། རྩོད་པ་སྤང་བའོ།། དང་པོ་ནི། ཤེས་རབ་ནི། འགྲེལ་ཚུལ་མི་འདྲ་བ་དུ་མ་ཡོད་ཀྱང་། སྐབས་འདིར་ཐེག་ཆེན་གྱིས་བསྡུས་པའི་བསླབ་པ་གསུམ་ཕྱིན་ཅི་མ་ལོག་པ་རབ་ཏུ་རྣམ་པར་འབྱེད་པ་ལ་གོ་དགོས། དེ་ཡང། རྒྱན་ལས། ཤེས་བྱ་ཡང་དག་རབ་རྣམ་འབྱེད་།། ཅེས་པ་ལྟར། སྐབས་འདིར་བསྟན་གྱི་བརྗོད་བྱ་ལས་ཤེས་སོ།། ཕ་རོལ་ཏུ་ཕྱིན་པ་ནི། ཕ་རོལ་ཏུ་སོན་པ་སྟེ་སངས་རྒྱས་ཀྱི་སར་ཕྱིན་པའམ། ཡང་ན། ཕུལ་དུ་བྱུང་བའི་དོན་ལའང་གོ་དགོས་པས། དེ་ལྟ་བུའི་ཤེས་རབ་ཕུལ་དུ་ཕྱིན་པའམ་ཕ་རོལ་ཏུ་ཕྱིན་པ་བརྗོད་བྱར་བྱེད་པ་ནི་བཀའ་བར་པ་ཡུམ་ཤེར་ཕྱིན་གྱི་མདོ་སྡེ་རིན་པོ་རྣམས་ཡིན་པས་སྐབས་འདིའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་གཞུང་ཤེར་ཕྱིན་ལ་གོ་དགོས་ཏེ།། ཀུན་མཁྱེན་ཆེན་པོས། གང་བཤད་པར་བྱའི་ཆོས་ནི་གཞུང་ཤེར་ཕྱིན་ནོ།། ཞེས་སོ།། མན་ངག་ནི། ཨུ་པ་དེ་ཤའི་སྒྲ་ལས་དྲང་ན། ཨུ་པ་ནི་ཉེ་བ། དེ་ཤ་ནི་བསྟན་པ་ལ་གོ་བས། དོན་རྒྱ་ཆེ་བ་རྣམས་ཐབས་ཉེ་བར་བསྟན་པའམ་ཉུང་ངུས་སྦས་དོན་གསལ་བར་བྱེད་པ་ཞིག་ལ་མན་ངག་ཅེས་བྱའོ།། བསྟན་བཅོས་ནི། འདུལ་བྱའི་རྒྱད་ཀྱི་ཉོན་མོངས་པའི་དགྲ་རྣམས་འཆོས་ཤིང་། ངན་འགྲོ་དང་སྲིད་པའི་དུཿ་ཁ་ལས་བསྐྱབ་པར་བྱེད་པས་ན་བསྟན་བཅོས་ཞེས་བྱ་ལ། ཡང་ན་བརྩོམ་པ་པོ་རྣམ་གཡེང་མེད་པའི་ཡིད་ཅན་གྱིས་རྒྱལ་བའི་དགོངས་པ་འགྲེལ་བ་ཐར་པ་ཐོབ་པའི་ལམ་དང་རྗེས་སུ་མཐུན་པ་ཞིག་ལ་བསྟན་བཅོས་ཞེས་བྱའོ།། མངོན་པར་རྟོགས་པ་ནི། སྤྱར་ཤེས་བྱའི་ཡུལ་མངོན་སུམ་དུ་ཤེས་པའམ་ཁོང་དུ་ཆུད་པ་ལ་གོ་དགོས་ཀྱང་། སྐབས་འདིར་རྣམ་མཁྱེན་སོགས་མངོན་རྟོགས་བརྒྱད་པོ་ལ་གོ་དགོས་ཏེ།། རྩ་བ་ལས། ཤེས་རབ་ཕ་རོལ་ཕྱིན་པ་ནི།། དངོས་པོ་བརྒྱད་ཀྱིས་ཡང་དག་བཤད་།། ཅེས་གསུངས་སོ།། རྒྱན་ཞེས་པ་ནི། མཛེས་པར་བྱེད་པའམ་དགའ་བར་སྐྱད་པར་བྱེད་པ་ཞིག་ལ་རྒྱན་ཞེས་བྱ་སྟེ། དེའང་ཡུམ་ཤེར་ཕྱིན་གྱི་ལུས་བཟང་པོ་ལ་མངོན་རྟོགས་བརྒྱད་དང་དོན་བདུན་བཅུའི་གདུ་བུ་སོགས་ཀྱིས་སྤྲས་ནས་མཛེས་པར་བྱེད་པ་དང་། དེ་དག་ལ་འདུལ་བྱ་གཞན་གྱིས་དགའ་བར་བྱེད་པ་དང་རང་ཉིད་ཀྱིས་ཀྱང་གསལ་བྱེད་མེ་ལོང་ནང་དུ་མཛེས་ལྡན་དུ་ཤར་བ་མཐོང་བ་ན་དགའ་བ་སྐྱད་པས་བདག་གཞན་གཉི་ག་དགའ་བར་སྐྱད་པར་བྱེད་པ་ཡིན་ནོ།། དེ་དག་ཀྱང་བཅུད་བསྡོམས་བྱེད་ནས་ སླར་ཡང་བོད་སྐད་ཀྱི་ཚིག་དོན་ཞིབ་འགྲེལ་བྱས་ན། བཀའ་བར་པ་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་བརྗོད་བྱའི་དོན་བདེ་བླག་ཏུ་རྟོགས་པར་བྱེད་པའི་ཐབས་དམ་པ་དང༌། གདུལ་བྱའི་རྒྱད་ཀྱི་ཉོན་མོངས་པའི་དགྲ་ཐམས་ཅད་མ་ལུས་པར་འཆོས་པར་བྱེད་ཅིང་། ངན་འགྲོ་དང་སྲིད་པའི་འཇིགས་པ་ལས་སྐྱབ་པར་བྱེད་པའི་ཁྱད་འཕགས་ཀྱི་ཡོན་ཏན་གཉིས་དང་ལྡན་པའི་གདམས་ངག་ཟབ་མོ་སྟེ་མན་ངག་གི་བསྟན་བཅོས་འདི་ནི། གཞི་རང་བཞིན་གྱི་རྒྱན་ཡུམ་གྱི་ལུས་བཟང་པོ་ལ། མཛེས་བྱེད་ཀྱི་རྒྱན་མངོན་པར་རྟོགས་པའི་རིམ་པ་དངོས་པ་བརྒྱད་དང་དོན་བདུན་ཅུས་ལེགས་པར་སྤྲས་པ་འདི་ཉིད། གསལ་བར་བྱེད་པའི་མེ་ལོང་ལྟ་བུའི་རྒྱན་དུ་གྱུར་པས་ན་མངོན་པར་རྟོགས་པའི་རྒྱན་ཞེས་བྱ་བ་ཡིན་ནོ།།
གཉིས་པ་་རྩོད་པ་སྤོང་བ་ནི།
ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་དང་། མངོན་པར་རྟོགས་པའི་རྒྱན་ལ་ཁྱད་པར་ཡོད་དམ་མེད? ཡོད་པར་མི་འཐད་དེ་། དེ་གཉིས་རྣམ་གྲངས་ཡིན་པའི་ཕྱིར་དང་། མེད་ན་བརྗོད་བྱ་གཅིག་ལ་རྗོད་བྱེད་ཀྱི་ཚིག་གཉིས་སུ་བརྗོད་པས་ཟློས་སོ་ཞེས་སྨོས་ན། དེ་གཉིས་ལ་ཁྱད་པར་ཡོད་དེ་། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་ཅེས་པ་ནི་བསྟན་བཅོས་ཀྱི་བརྗོད་བྱའམ་དོན་ཡིན་ལ། མངོན་པར་རྟོགས་པའི་རྒྱན་ཞེས་པ་ནི་འདྲ་བ་རྒྱ་མཚན་དུ་བྱེད་པའི་དཔེའམ་མིང་ཡིན་པས་ཁྱད་པར་ཆེའོ།།
བྱེ་བྲག་བཀའ་བསྟན་ལ་དཔྱད་པ་ནི།
འོ་ན་རྒྱན་འདི་ལ་མན་ངག་གི་བསྟན་བཅོས་ཞེས་མཚན་དེ་ལྟར་ཐོགས་པ་ཡིན་ན།
བཀའ་དང་བསྟན་བཅོས་ཀྱི་ཁྱད་པར་གང་ཡིན་སྙམ་ན།
སྤྱར་བཀའ་ཞེས་པ་ནི་འཇིག་རྟེན་པ་ལྟར་ན་དཔོན་པོའི་བཀའ་དང་ཕ་མའི་བཀའ་ཞེས་དེ་ལྟ་བུའི་ཐ་སྙད་འཇུག་ས་མང་དུ་ཡོད་ཀྱང༌།
འདིར་བསྟན་བཀའ་ཞེས་པ་ནི་སངས་རྒྱས་ཀྱི་གསུང་རབ་ཡིན་ཏེ། བདག་རྐྱན་སངས་རྒྱས་ལས་བྱུང་བའི་ངག་གང་ཞིག
སྤོབས་པ་བཞི་ལྡན་གྱི་ལུང་རྣམ་དག རྒྱད་བླ་མ་ལས།
གང་ཞིག་དོན་ལྡན་ཆོས་དང་ཉེར་འབྲེལ་ཞིང་།།
ཁམས་གསུམ་ཀུན་ནས་ཉོན་མོངས་སྤོང་བྱེད་གསུངས།།
ཞི་བའི་ཕན་ཡོན་སྟོན་པར་བྱེད་པ་གང་།། དེ་ཉིད་དྲང་སོང་གསུང་ཡིན་ལྡོག་པ་གཞན།། ཅེས་སོ།།
དེ་ཡང་ཞལ་ནས་གསུང་པའི་བཀའ།
བྱིན་གྱིས་རླབས་པའི་བཀའ། རྗེས་སུ་གནང་བའི་བཀའ་དང་གསུམ་ཡོད་ལ།
དང༌པོ་ནི་མདོ་རྡོར་གཅོད་ལྟ་བུ་དང་། གཉིས་པ་ལ་སྐུས་བྱིན་གྱིས་བརླབས་པ་དང་།
གསུང་གིས་བྱིན་གྱིས་བརླབས་པ།
ཐུགས་ཀྱིས་བྱིན་གྱིས་བརླབས་པའོ། །
དང་པོ་ནི་སངས་རྒྱས་ཀྱི་ཕྱག་གཡས་པ་བྱང་ཆུབ་སེམས་དཔའ་རྡོ་རྗེའི་སྙིང་པོའི་སྤྱ་བོར་བཞག་མ་ཐག་ཏུ་དེས་ས་བཅུ་པའི་མདོ་ཐོགས་མེད་དུ་གསུངས་པ་ལྟ་བུ་དང༌།
གཉིས་པ་གསུང་གིས་བྱིན་གྱིས་བརླབས་པ་ནི། བརྒྱད་སྟོང་པ་ལས། དེ་ལྟར་སྤོབས་པ་བསྐྱད་ཅིག་ཅེས་གསུངས་མ་ཐག་ཏུ་རབ་འབྱོར་གྱིས་ཤེར་མདོ་གསུངས་པ་ལྟར་དང༌།
གསུམ་པ་ཐུགས་ཀྱིས་བྱིན་གྱིས་བརླབས་པ་ལའང་གསུམ་ཡོད་དེ།
ཐུགས་ཏིང་ངེ་འཛིན་གྱིས་བྱིན་གྱིས་བརླབས་པ་ནི།
སྤྱན་རས་གཟིགས་དང་ཤཱ་རིས་བུ་གཉིས་ཀྱིས་ཤེས་རབ་སྙིང་པོ་གསུངས་པ་ལྟ་བུ་དང་།
ཐུགས་བདེན་པས་བྱིན་གྱིས་བརླབས་པ་ལས་ལྗོན་ཤིང་དང་ལྷ་ཡི་རྔ་བོ་ལས་ཆོས་སྟོན་པ་ལྟ་བུ་དང༌།
ཐུགས་འཕྲིན་ལས་ཀྱིས་བྱིན་གྱིས་བརླབས་པ་ནི་ལྷ་ཀླུ་སོགས་རང་རང་གིས་སྔགས་སྨྲས་པས་ནད་ཞི་བ་ལྟ་བུའོ།། བསྟན་བཅོས་ཀྱི་མཚན་ཉིད་ནི། ཀུན་མཁྱེན་ཆེན་པོས།
སངས་རྒྱས་ལས་གཞན་པས་བྱས་པའི་བཀའི་དགོངས་འགྲེལ།། ཞེས་གསུངས་པ་ལྟར་ཡིན་ལ། དེ་ལ་དབྱེ་ན།
དོན་མཆོག་ལྡན་པའི་བསྟན་བཅོས།
དུཿཁ་སྤང་པའི་བསྟན་བཅོས། སྒྲབ་ལྷུར་ལེན་གྱི་བསྟན་བཅོས་དང་གསུམ་མོ།། དེ་ལ་འདི་ལྟར་དོགས་ཏེ། བཀའ་དང་བསྟན་བཅོས་གཉིས་མི་འགལ་བར་ཐལ།
བཀའ་ཡིན་ན་བསྟན་བཅོས་ཡིན་དགོས་པའི་ཕྱིར་ཏེ། བཀའ་ཡིན་ན་སྒྲབ་པ་ལྷུར་ལེན་གྱི་བསྟན་བཅོས་ཡིན་དགོས་པའི་ཕྱིར་ཏེ།
གཏན་ལ་དབབ་པ་བསྡུ་བ་ལས།
དེ་ལ་སྒྲབ་པ་ལྷུར་ལེན་པའི་བསྟན་བཅོས་གང་ཞེ་ན། འདི་ལྟ་སྟེ། རྒྱལ་བའི་བཀའ་ཉིད་དོ་།། ཞེས་གསུངས་པའི་ཕྱིར། ཞེས་དང་།
འདོད་ན། སངས་རྒྱས་ཀྱི་གསུང་དང་སེམས་ཅན་གྱི་ངག་མི་འགལ་བར་ཐལ་ལོ་ཞེ་ན། རང་ཉིད་ཀྱིས་སེམས་ཚུལ་ལྟར་ན།
བཀའ་དང་བསྟན་བཅོས་གཉིས་སུ་ཕྱེ་བའི་བཀའ་དང་བསྟན་བཅོས་གཉིས་འགལ་ཡང་། སྤྱར་བཀའ་བསྟན་གཉིས་མི་འགལ་ཏེ།
བཀའ་ཡིན་ན་བསྟན་བཅོས་ཡིན་པས་ཁྱབ་པ་སློབ་དཔོན་ཐོགས་མེད་ཀྱི་དགོངས་པ་ལྟར་མིན་ནམ་སྙམ་མོ།།
ཆོས་འཆད་པ་ལས་བྱུང་བ་ཡི།། དགེ་བ་བདག་གིས་གང་ཐོབ་པ།།
འདི་ནི་སྐྱས་བོ་ཐམས་ཅད་ལ།། ཆོས་འཆད་སྤོབས་པ་ཐོབ་པར་ཤོག།
དགེའོ།།
བསམ་འཆར།