གཞུང་ལུགས་འཆད་པས་སྐལ་ལྡན་རྗེས་སུ་འཛིན།། རྩོད་པས་མི་ཤེས་རྒོལ་བའི་འགོ་བོ་འགེམས།། ལེགས་བཤད་རྩོམ་པས་རྒྱལ་བསྟན་འཛིན་ཅིང་སྤེལ།། སྨྲ་བའི་ཟླ་བ་དཔལ་ལ...
གཞུང་ལུགས་འཆད་པས་སྐལ་ལྡན་རྗེས་སུ་འཛིན།།
རྩོད་པས་མི་ཤེས་རྒོལ་བའི་འགོ་བོ་འགེམས།།
ལེགས་བཤད་རྩོམ་པས་རྒྱལ་བསྟན་འཛིན་ཅིང་སྤེལ།།
སྨྲ་བའི་ཟླ་བ་དཔལ་ལྡན་ཆོས་གྲགས་རྒྱལ།།
ཞེས་མཆོད་པར་བརྗོད་པའི་ལེགས་ཚིག་སྔོན་དུ་བཏང་ནས།
རྣམ་འགྲེལ་གྱི་གཞུང་ལས།
ཕྱོགས་ཆོས་དེ་ཆས་ཁྱབ་པ་ཡི།།
གཏན་ཚིགས་དེ་ནི་རྣམ་གསུམ་ཉིད།།
མེད་ན་མི་འབྱུང་ངེས་ཕྱིར་རོ།།
གཏན་ཚིགས་ལྟར་སྣང་དེ་ལས་གཞན།།
ཞེས་པའི་གཞུང་ལས་འཕྲོས་ཏེ་རྟགས་ཀྱི་རྣམ་བཞག་བསྡུས་ཏེ་བཤད་པ་ལ་རྩའི་ས་བཅད་ལྔ་ཡོད་དེ། དང་པོ་ཕྱོགས་སྒྲ་འཇུག་པའི་ཡུལ། ཚུལ་གསུམ་དང་དེའི་མཚན་ཉིད་བཤད་པ། རྟགས་ཡང་དག་གི་དབྱེ་བ་བཤད་པ། རྟགས་དང་བསྒྲུབ་བྱའི་ཆོས་ཀྱི་མེད་ན་མི་འབྱུང་གི་འབྲེལ་བ་གྲུབ་པ། གཏན་ཚིགས་ལྟར་སྣང་བཤད་པའོ།།
དང་པོ་ཕྱོགས་སྒྲ་འཇུག་པའི་ཡུལ་ནི།
ཚད་མ་རིགས་གཏེར་ལས།
ཆོས་ནི་ཆོས་དང་ཆོས་ཅན་དང་། །ཚོགས་པ་བརྗོད་ལ་དངོས་མིང་དང་། །
འདིའི་ཕྱོགས་རེ་ཟིན་པའི་ཕྱིར། ། ཡ་རྒྱལ་གཉིས་ལ་བཏགས་ནས་འཇུག །
ཅེས་དཔེར་ན། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར། ཞེས་པའི་སྦྱོར་བ་འདིའི་སྐབས། ཆོས་ཅན་སྒྲ་དང་བསྒྲུབ་བྱའི་ཆོས་མི་རྟག་པ་ཚོགས་པའི་ཚོགས་དོན། སྒྲ་མི་རྟག་པ་ལ་ཕྱོགས་སྒྲ་དངོས་མིང་དུ་འཇུག་པ་ཡིན་པ་དང་། འདིའི་ཡ་རྒྱལ་དུ་གྱུར་པ་ཆོས་ཅན་སྒྲ་དང་། བསྒྲུབ་བྱའི་ཆོས་མི་རྟག་པ་ལ་ཕྱོགས་སྒྲ་བཏགས་མིང་དུ་འཇུག་པ་ཡིན་ནོ།།
གཉིས་པ་ཚུལ་གསུམ་སོ་སོའི་མཚན་ཉིད་བཤད་པ་ནི།
གཞུང་ལས།
ཕྱོགས་ཆོས་དེ་ཆས་ཁྱབ་པ་ཡི། །
ཞེས་པས་ཕྱོགས་ཆོས། རྗེས་ཁྱབ། ལྡོག་ཁྱབ་བསྟན་པ་ཡིན་ལགས། དང་པོ་ཕྱོགས་ཆོས་ཀྱི་མཚན་ཉིད་ནི། ཤེས་འདོད་བཞུགས་པའི་གང་ཟག་གི་ངོར་རྟགས་འདི་རྩོད་གཞི་ཆོས་ཅན་གྱི་སྟེང་དུ་ཐ་དད་པའི་ཚུལ་གྱིས་འགོད་ཚུལ་དང་མཐུན་པར་ཡོད་པ་ཉིད་དུ་ངེས་པའོ། །
ཕྱོགས་ཆོས་གྲུབ་པ་ལ་ཟུར་ལྔ་དགོས་ཏེ། ཤེས་འདོད་ཞུགས་པ། ཐ་དད་པའི་ཚུལ། འགོད་ཚུལ་དང་མཐུན་པ། ཡོད་པ་ཉིད། ངེས་པའོ། །
དང་པོ་ཤེས་འདོད་བཞུགས་པ་ནི། དཔེར་ན། སྒྲ་མི་རྟག་པར་མ་རྟོགས་ཤིང་སྒྲ་མི་རྟག་པ་ཡིན་མིན་ལ་ཐེ་ཚོམ་ཟ་བའི་གང་ཟག་གི་ངོར་བཀོད་དགོས་པ་ཡིན་ནོ། །
ཐ་དད་པའི་ཚུལ་ནི། རྟགས་དང་རྩོད་གཞི་ཆོས་ཅན་ཐ་དད་པའམ་ཐ་དད་པའི་ཚུལ་དུ་དགོས་པ་ཡིན་ལགས། དེ་མིན་ན་ཕྱོགས་ཆོས་མི་གྲུབ་སྟེ། དཔེར་ན་སྒྲ་ཆོས་ཅན། མི་རྟག་སྟེ། སྒྲ་ཡིན་པའི་ཕྱིར་ཞེས་པ་ལྟ་བུའམ། ཡང་ན། རི་རྭ་ཆོས་ཅན། མེད་དེ། ཚད་མས་མ་དམིགས་པའི་ཕྱིར། ཞེས་པ་ལྟ་བུའོ། །
འགོད་ཚུལ་དང་མཐུན་པ་ནི། འགོད་ཚུལ་ཡིན་འགོད་ཡིན་ན་རྩོད་གཞི་དེ་རྟགས་དེ་ཡིན་དགོས་པ་དང་། ཡོད་འགོད་ཡིན་ན་རྩོད་གཞི་དེ་ལ་རྟགས་དེ་ཡོད་དགོས་པ་ཡིན་ཏེ། དཔེར་ན་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར། ཞེས་འགོད་ཚུལ་ཡིན་འགོད་དང་མཐུན་པར་སྒྲ་བྱས་པ་ཡིན་པ་དང་། དུ་ལྡན་ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་འགོད་ཚུལ་ཡོད་འགོད་དང་མཐུན་པར་དུ་ལྡན་ལ་ལ་མེད་ཡོད་པར་གྲུབ་པ་ལྟ་བུའོ། །
ཡོད་པ་ཉིད་ནི། རྟགས་འདི་རྩོད་གཞི་ཆོས་ཅན་གྱི་སྟེང་དུ་ཡོད་པ་ཙམ་གྱིས་མི་ཆོག་པར་རྩོད་གཞི་ཆོས་ཅན་གྱིས་ཁྱད་པར་དུ་བྱེད་པའི་ཆོས་ཐ་དག་ལ་ཡོད་པར་གྲུབ་དགོས་པ་ཡིན། དཔེར་ན། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་པའི་སྐབས་རྩོད་གཞི་ཆོས་ཅན་སྒྲས་ཁྱད་པར་དུ་བྱེད་པའམ་སྒྲ་ཡིན་ཚད་ལ་བྱས་པས་ཁྱབ་པ་བཞིན་ནོ། །དེ་མིན་ན། མཚན་མོ་ལོ་མ་འཁུམས་ཏེ་ཉལ་བའི་རྟགས་ཀྱིས་ལྗོན་ཤིང་སེམས་ལྡན་དུ་སྒྲུབ་པ་དེ་ཡང་ཕྱོགས་ཆོས་གྲུབ་པར་ཐལ་ལོ། །
ངེས་པ་ནི། ཕྱོགས་ཆོས་གྲུབ་པ་ལ་རྟགས་འདི་རྩོད་གཞི་ཆོས་ཅན་གྱི་སྟེང་དུ་ཡོད་པ་ཉིད་ཡིན་པ་བཞིན་དུ་རྒོལ་བས་ངེས་དགོས་པ་ཡིན། དེ་མིན་ན་ཕྱོགས་ཆོས་གྲུབ་པ་མི་སྲིད་པའི་ཕྱིར་རོ། །
རྗེས་ཁྱབ་ཀྱི་མཚན་ཉིད་ནི། རྟགས་ཆོས་ཀྱི་འབྲེལ་བ་མཐོང་བའི་རྒོལ་བས། རྟགས་མཐུན་ཕྱོགས་ཁོ་ན་ལ་ཡོད་པར་ངེས་པའོ། །
དཔེར་ན། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར། ཞེས་རྟགས་དང་བསྒྲུབ་བྱའི་ཆོས་ཀྱི་འབྲེལ་བ་མཐོང་བའི་གང་ཟག་གི་ངོར་རྟགས་མཐུན་ཕྱོགས་ཐ་དག་ལ་ཡོད་པ་ཉིད་དུ་ངེས་པ་ཞིག་དགོས་པ་ཡིན་ནོ། །
ལྡོག་ཁྱབ་ཀྱི་མཚན་ཉིད་ནི། རྟགས་ཆོས་ཀྱི་འབྲེལ་བ་མཐོང་བའི་རྒོལ་བས། རྟགས་མི་མཐུན་ཕྱོགས་ལ་མེད་པ་ཉིད་དུ་ངེས་པའོ། །
དཔེར་ན། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར། མི་རྟག་པ་ལས་ལྡོག་ན་རྟག་པ་། གང་རྟག་པ་ཡིན་ན་མ་བྱས་པ་ཡིན་པས་ཁྱབ་པ་ལྟ་བུའོ། །
གསུམ་པ་རྟགས་ཡང་དག་གི་དབྱེ་བ་བཤད་པ་ནི། ཚུལ་གསུམ་ཚང་བ་ནི་རྟགས་ཡང་དག་གི་མཚན་ཉིད་ཡིན་ནོ།།
དེ་ལ་དབྱེ་ན་གསུམ་ཡོད་དེ།
གཞུང་ལས།
གཏན་ཚིགས་དེ་ནི་རྣམ་གསུམ་ཉིད། །
ཅེས་པས་འབྲས་བུའི་རྟགས། རང་བཞིན་གྱི་རྟགས། མ་དམིགས་པའི་རྟགས་ཏེ་གསུམ་མོ།།
དང་པོ་འབྲས་བུའི་རྟགས་ཀྱི་མཚན་ཉིད་ནི། ཚུལ་གསུམ་པ་ཅན་གྱི་འབྲས་བུའི་གཏན་ཚིགས་ཡིན་ནོ།།
རྣམ་འགྲེལ་ལས།
རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །
གཏན་ཚིགས་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་། །
ཞེས་གསུངས་པའི་ཕྱིར། དཔེར་ན། དུ་བ་དང་ལྡན་པའི་ལར་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར། ཞེས་བཀོད་པ་ལྟ་བུའོ།།
གཉིས་པ་རང་བཞིན་གྱི་རྟགས་ཀྱི་མཚན་ཉིད་ནི། ཚུལ་གསུམ་པ་ཅན་གྱི་རང་བཞིན་གྱི་གཏན་ཚིགས་སོ།།
རྣམ་འགྲེལ་ལས།
རང་བཞིན་ཡོད་ཙམ་དང་། །
འབྲེལ་བ་ཅན་གྱི་ངོ་བོ་ཡང་། །
ཞེས་གསུངས་པ་ལྟར། མཚན་གཞི་ནི། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་པ་བཞིན་ནོ། །
གསུམ་པ་མ་དམིགས་པའི་རྟགས་ཀྱི་མཚན་ཉིད་ནི། ཚུལ་གསུམ་པ་ཅན་གྱི་མ་དམིགས་པའི་གཏན་ཚིགས་སོ།།
གཞུང་ལས།
ཚད་མ་རྣམས་ནི་མི་འཇུག་པ། །
མེད་ལ་མི་འཇུག་འབྲས་བུ་ཅན། །
ཞེས་པ་ལྟར། མཚན་གཞི་ནི། བུམ་པས་དག་པའི་ས་ཕྱོགས་ན་ཆོས་ཅན། བུམ་པ་མེད་དེ། བུམ་པ་ཚད་མས་མ་དམིགས་པའི་ཕྱིར། ཞེས་པ་ལྟ་བུའོ། །
བཞི་པ་བསྒྲུབ་བྱའི་ཆོས་ཅན་དང་རྟགས་མེད་ན་མེད་འབྱུང་གི་འབྲེལ་བ་བཤད་པ་ནི། བསྒྲུབ་བྱའི་ཆོས་དེ་མེད་ན། རྟགས་དེ་མི་འབྱུང་བར་ཚད་མས་ངེས་པའི་ཕྱིར་རོ།།
དཔེར་ན། མེ་མེད་ན། དུ་བ་མེད་པའི་ཕྱིར་ཞེས་བསྒྲུབ་བྱ་མེ་མེད་ན། དུ་བ་མེད་པ་བཀོད་པ་ལྟ་བུའོ།།
ལྔ་པ་གཏན་ཚིགས་ལྟར་སྣང་བཤད་པ་ནི།
གཏན་ཚིགས་ལྟར་སྣང་དེ་ལས་གཞན། །
ཞེས་ཚུལ་གསུམ་མ་ཚང་བའི་གཏན་ཚིགས་ཡིན་ནོ།།
སླར་སྨས་པ།
འདི་ལས་བྱུང་བའི་རྣམ་དཀར་དགེ་ཚོགས་ཀྱིས། །ས་དང་ལམ་གྱི་ཡོན་ཏན་ཀུན་རྫོགས་ཏེ། །
འདིར་གྱི་ཕ་མས་གཙོས་པའི་སེམས་ཅན་ཀུན། །འདི་ཕྱི་བདེ་བར་བཀོད་པའི་བྱེད་པོར་ཤོག །
ཞེས་དུས་ངན་སྙིགས་མའི་་་སློབ་གཉེར་བའི་ཁུལ་དུ་འཛིན་པ་ཟླ་བ་ཚེ་རིང་རང་ཉིད་དང་རང་གི་སྡེ་ཚན་གྱིས་བྲིས་པ་དགེའོ།། །།
བསམ་འཆར།