བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ།། མངོན་པའི་སྡེ་བདུན་གཅིག་ཏུ་འདྲིལ་བ་ཡི།། མངོན་པར་མཛོད་དེ་དགོངས་པ་གསལ་བྱེད་པའི།། སློབ་དཔོན་དབྱིག...
 |
བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ།།
མངོན་པའི་སྡེ་བདུན་གཅིག་ཏུ་འདྲིལ་བ་ཡི།།མངོན་པར་མཛོད་དེ་དགོངས་པ་གསལ་བྱེད་པའི།།
སློབ་དཔོན་དབྱིག་གཉེན་གང་ལ་ཕྱག་འཚལ་ནས།།མཆོད་བརྗོད་གང་ལ་དཔྱད་པ་བརྩམ་པར་བྱ།།
ཞེས་མཆོད་བརྗོད་དང་རྩོམ་པར་དམ་བཅའ་བའི་ལེགས་ཚིག་སྔོན་དུ་འཐོར་ནས་དེ་ལ་ཡང་། དཔྱད་པར་བྱ་བའི་གཞུང་དང་། བསྔོ་བས་རྒྱས་འདེབས་པ་ལས། དང་པོ་ནི། མངོན་པར་མཛོད་ཀྱི་མཆོད་བརྗོད་སྟེ། དེ་ལ་དགོས་དོན། བསྡུས་དོན། ཚིག་དོན་ཏེ་གསུམ་ལས། དང་པོ་ནི།
གང་ཞིག་ཀུན་ལ་མུན་པ་གཏན་བཅོམ་ཞིང་།།
འཁོར་བའི་འདམ་ལས་འགྲོ་བ་དྲངས་མཛད་པ།།
དོན་བཞིན་སྟོན་པ་དེ་ལ་ཕྱག་འཚལ་ནས།།
ཞེས་སོགས་མཆོད་བརྗོད་ཚིག་རྐང་གསུམ་པ་འདིས་དགོས་པ་བསྟན་པ་ལ་གཉིས་ཏེ། གནས་སྐབས་དང་མཐར་ཐུག་གི་དགོས་པ་ལས། དང་པོ་ལ་གསུམ་ཏེ། སྟོན་པའི་ཆེ་བ་བརྗོད་པ་དང་། བསོད་ནམས་འཕེལ་བ་དང་། དམ་པའི་སྤྱོད་པ་སྟོན་པ་དང་གསུམ་ལས།
དང་པོ་ནི། གང་ཞིག་ཀུན་ལ་སོགས་ཚིག་རྐང་གཅིག་འདིས། རང་དོན་ལ་སྤངས་རྟོགས་ཕུན་སུམ་ཚོགས་པ་བསྟན་པ་དང་། འཁོར་བའི་འདམ་ལས་སོགས་ཚིག་རྐང་བར་པ་གཅིག་འདིས་གཞན་དོན་ཕྲིན་ལས་ཕུན་སུམ་ཚོགས་པ་བསྟན་པ་དང་།
གཉིས་པ་བསོད་ནམས་འཕེལ་བ་ནི། སྟོན་པ་གང་ལ་སློབ་དཔོན་དབྱིག་གཉེན་གྱིས་མཆོད་པར་བརྗོད་པ་དང་བསྟོད་པ་དང་ཕྱག་འཚལ་བ་དང་གདུལ་བྱ་རྣམས་ཀྱིས་གཞུང་འདི་ལ་ཐོས་བསམ་བྱེད་པ་དང་དད་གུས་སོགས་བྱེད་པ་ལས་བསོད་ནམས་འཕེལ་བ་དང་།
གསུམ་པ་དམ་པའི་སྤྱོད་པ་དང་མཐུན་པར་ནི། སློབ་དཔོན་དབྱིག་གཉེན་རང་ཉིད་སྐྱེས་བུ་དམ་པའི་སྤྱོད་པ་རྟོགས་པ་སོགས་ཀྱི་ཆེད་དུ་གཞུང་རྩོམ་པའི་སྔ་རོལ་དུ་ཡུལ་གོང་མ་ལ་མཆོད་པར་བརྗོད་ནས་བསྟན་བཅོས་འདི་བརྩམ་པ་ལ་རྩོམ་པ་མཐར་ཕྱིན་པ་དང་། དེ་ལ་བར་ཆད་མེད་པ་དང་། གདུལ་བྱའི་གུས་ལ་བསོད་ནམས་ཀྱི་ཚོགས་རྫོགས་པ་སོགས་དམ་པའི་སྤྱོད་པ་དང་མཐུན་པ་ཡོད་དོ།།
གཉིས་པ་བསྡུས་དོན་ནི། གཞུང་གང་ཞིག་ཀུན་ལ་སོགས་ཚིག་རྐང་གསུམ་འདིས་སྟོན་པ་ལ་མཆོད་པར་བརྗོད་པ་སྟོན་པ་ཡིན་ནོ།།
གསུམ་པ་ཚིག་དོན་ནི། དེ་ཡང་གང་ཞེས་པ་ནི་སྤྱིའི་སྒྲ་ཡིན་ཀྱང་དེ་ལ་བྱེ་བྲག་ལ་འཇུག་པའི་རྒྱུ་སྐབས་དང་། ཤུགས་དང་། ལྡན་བྲལ་དང་། ཁྱད་པར་གྱི་སྒྲ་དང་སྦྱར་བ་བཞི་ལས་འདིར་ཁྱད་པར་གྱི་སྒྲ་སྦྱར་བས་སངས་རྒྱས་སུ་ཤེས་ཏེ་དེ་ཡང་གང་ལ་འཇོག་ན་མཚན་ཉིད་ནི། སངས་རྒྱས་སངས་རྒྱས་སུ་འདོད་པའི་ཆོས་མི་སློབ་པའི་ལམ་མམ་སངས་རྒྱས་ཆོས་སྐུ་ལ་གོ་དགོས་ཏེ་འགྲེལ་པ་ཁ་ཅིག་ལས་སངས་རྒྱས་ཤཱཀྱ་ཐུབ་པ་ཞེས་སྤྲུལ་སྐུ་ལ་འཇོག་འདུག་པས་དེ་ལྟར་ཡིན་ན་ཉན་ཐོས་ཀྱི་ལུགས་ལ་གཟུགས་སྐུ་སངས་རྒྱས་སུ་མི་འདོད་པས་ཅིའི་ཕྱིར་ན་ཉན་ཐོས་སྡེ་པ་དག་གིས་ནི་འཕགས་པ་གང་རྒྱུ་ལས་དང་ཉོན་མོངས་པས་བསྡུས་པའི་ཀུན་འབྱུང་གི་བདེན་པ་སྤངས་པའི་སོ་སོར་བརྟགས་འགོག་ཐོབ་ཅིང་མངོན་དུ་བྱས་ལ་འབྲས་བུ་སྡུག་བསྔལ་སྤངས་པའི་འགོག་པ་མངོན་དུ་མ་བྱས་པ་ནི་ལྷག་བཅས་ཏེ། སངས་རྒྱས་བཅོམ་ལྡན་འདས་ཀྱང་ཞབས་ལ་སེང་ལྡེང་གི་ཚལ་པ་ཟུག་པ་དང་། སྐུ་རོ་རྒྱབ་བསྙུང་བ་དང་། ལྷས་བྱིན་གྱིས་འཁྲུལ་འཁོར་གྱི་སྒྱོགས་ཀྱི་ཆ་ཤས་ཕོག་པས་སྐུ་མཚལ་ཕྱུང་བ་ལ་སོགས་པ་སྡུག་བསྔལ་གྱི་སྡུག་བསྔལ་དང་བཅས་པར་མདོ་སྡེ་དེ་དག་ལས་འབྱུང་བ་སོགས་མཐོང་བ་སྟེ། ཉན་ཐོས་རྣམས་ཀྱིས་གཟུགས་སྐུ་གཉིས་ལ་ལྷག་བཅས་དང་ཆོས་སྐུ་ལ་ལྷག་མེད་ཀྱི་ཐ་སྙད་འཇོག་སྟེ། ཇི་སྐད་དུ།
ཕུང་པོར་བཅས་པའི་མྱ་ངན་འདས།།ཐུབ་སྐུ་གཉིས་ལ་བཞག་པ་ཡིན།།
ཕུང་པོ་ཀུན་དང་བྲལ་བའི་ཕྱིར།།ཆོས་ཀྱི་སྐུ་ལ་ཕུང་པོ་མེད།།
ཅེས་གསུངས་པ་བཞིན་ནོ།། དེ་བས་ན་གང་མངོན་པའི་གཞུང་ལ་ཡིད་ཆེ་ཡོད་པ་ནི་འདིའི་མཆོད་བརྗོད་ཀྱི་ཡུལ་ལའང་ཡིད་ཆེ་དགོས་ཏེ། སློབ་དཔོན་དབྱིག་གཉེན་གྱིས་ཆོས་ཅན། མཆོད་བརྗོད་ཀྱི་ཡུལ་སངས་རྒྱས་གཟུགས་སྐུ་འཇོག་པ་ལ་དགོས་པ་དང་ཡིད་ཆེ་མེད་པར་ཐལ། གཞུང་འདི་ལ་དོན་གཉེར་ཅན་གྱི་ཐེག་པ་དམན་པ་རྣམས་ཀྱིས་སངས་རྒྱས་ཤཱཀྱ་ཐུབ་པའི་གཟུགས་ཕུང་འདི་སྡུག་ལྡན་གྱི་ཕུང་པོ་ལྡན་པའི་ཕྱིར་ཞེས་འདོད་པའི་ཕྱིར་ཏེ། གང་སྡུག་ལྡན་གྱི་ཕུང་པོ་ལྡན་པ་ཡིན་ན་མུན་པ་གཏན་ནས་བཅོམ་པ་ཡིན་པས་མ་ཁྱབ་སྟེ། ཉན་ཐོས་ལ་གདམས་པའི་མདོ་ལས་ཀྱང་།
ཇི་སྲིད་ཕུང་པོ་འཛིན་ཡོད་པ།། དེ་སྲིད་དེ་ལ་ངར་འཛིན་ཡོད།།
ཞེས་སོགས་གསུངས་པའི་ཕྱིར་རོ།། དེ་བས་ན་ད་ལྟར་མངོན་པའི་གཞུང་ལས་སྟོན་པའི་སྟོན་པ་ཞེས་པའང་སངས་རྒྱས་མི་སློབ་བམ་མཁྱེན་པ་ལ་གོ་དགོས་མཁྱེན་པ་ཞེས་པའང་ཕུང་ཁམས་སྐྱེ་མཆེད་སོགས་ཀྱི་གནས་ལུགས་ཀྱི་ཤེས་བྱ་ཀུན་ལ་མུན་པ་མ་ལུས་པ་གཏན་ནས་སམ་ཡེ་ནས་བཅོམ་ཟིན་པའི་མཁྱེན་པའམ་ཡེ་ཤེས་ལ་དགོངས་པ་ཡིན་ནོ།།
ཡང་གོང་ལྟར་ཁ་ཅིག་གིས་འདོད་པ་ལའང་དཔྱད་ན་བདེན་པའི་ཆ་གཅིག་ཡོད་དེ། མཆོད་བརྗོད་ཀྱི་ཡུལ་སྤྲུལ་སྐུ་བཞག་པ་འདི་སློབ་དཔོན་དབྱིག་གཉེན་རང་ཉིད་ཐེག་པ་ཆེན་པོའི་ལམ་ལ་བཞུགས་ནས་བཞག་པ་མི་ནམ་སྙམ་སྟེ་ཅིའི་ཕྱིར་ན་མཆོད་བརྗོད་ལས།འཁོར་བའི་འདམ་ལས་འགྲོ་བ་དྲངས་མཛད་པ།།དོན་བཞིན་སྟོན་པ་འདི་ལ་ཕྱག་འཚལ་ནས།།ཞེས་པའི་སྐབས་སུ་ཆོས་ཀྱི་འཁོར་ལོ་བསྐོར་མཁན་ལ་ཕྱག་འཚལ་བ་ཡིན་པས་ན་འདིས་ནི་སྤྲུལ་སྐུ་ཡིན་པ་གྲུབ་པ་དང་ཉན་ཐོས་ཤཱ་རི་བུ་སོགས་ཀྱིས་མི་ཤེས་པ་རྒྱུ་བཞིའི་དྲི་བའི་ལན་གསུངས་པ་པོ་ནི་སྤྲུལ་སྐུ་ཡིན་པ་གྲུབ་པ་དང་བཅས་གོང་གི་ལུང་གིས་ཀྱང་གྲུབ་པ་དང་ཚིག་རྐང་དང་པོ་གཉིས་ཀྱི་རང་དོན་དང་གཞན་དོན་ཕྲིན་ལས་ཕུན་སུམ་ཚོགས་པ་སྟོན་པ་སོགས་ཐེག་པ་ཆེན་པའི་ཁྱད་ཆོས་ཡིན་པས་སྙམ་མོ་འདི་ལ་དཔྱད་པའི་གཞིའོ།།
རང་ལུགས་ལྟར་ན་སློབ་དཔོན་རང་ཉིད་ཀྱི་དབང་དུ་བཏང་ནས་བཞག་ན་སངས་རྒྱས་སངས་རྒྱས་སུ་འདོད་པའི་ཆོས་མི་སློབ་པའི་ལམ་བརྟེན་པ་ཆོས་སྐུ་དང་ཆོས་འཁོར་བསྐོར་བ་སོགས་རྟེན་པ་སྤྲུལ་སྐུ་སྟེ་རྟེན་བརྟེན་པའི་སྒོ་ནས་བཞག་པ་ཁས་བླངས་པ་ཡིན་ནོ།།
སྤྱིར་མུན་པ་ཞེས་པའི་སྐབས་སུ་མུན་པའི་མཚན་ཉིད་ནི། འགྲེལ་པ་ལས། མི་ཤེས་པ་ནི་ཡང་དག་པའི་དོན་མཐོང་བ་ལ་བགེགས་སུ་གྱུར་པའི་ཕྱིར་མུན་པ་སྟེ། དེ་ལ་དབྱེ་ན་གཉིས་ཏེ། ཉོན་མོངས་པ་ཅན་གྱི་མུན་པ་དང་། ཉོན་མོངས་པ་ཅན་མ་ཡིན་པའི་མུན་པའོ། དང་པོའི་མཚན་ཉིད་ནི། གཙོ་བོ་དགྲ་བཅོམ་པའི་གོ་འཕང་ལ་བར་དུ་གཅོད་པ། གཉིས་པའི་མཚན་ཉིད་ནི། གཙོ་བོ་མི་སློབ་པའི་ལམ་ལ་བར་དུ་གཅོད་པ། དང་པོ་ལ་དབྱེ་ན་གཉིས་ཏེ། བདག་དང་བདག་གིར་ལྟ་བའི་བློའོ། གཉིས་པ་ལ་དབྱེ་ན་བཞི་སྟེ། སངས་རྒྱས་ཀྱི་ཆོས་མི་ཤེས་པ། ཡུལ་བསྐལ་པ་མི་ཤེས་པ། དུས་བསྐལ་པ་མི་ཤེས་པ། དོན་གྱི་དབྱེ་བ་མཐའ་ཡས་པ་མི་ཤེས་པའོ།། ཡང་དག་པའི་དོན་མཐོང་བ་ཞེས་པའི་སྐབས་སུ་ཡང་དག་པའི་དོན་ནི་གང་ཞེ་ན། བདེན་པ་བཞིའི་དོན་མཐོང་བ་ལ་གོ་དགོས་པ་དང་།
གཏན་བཅོམ་ཞེས་པ་ནི། དེ་ཡང་སངས་རྒྱས་བཅོམ་ལྡན་འདས་ཀྱིས་གཉེན་པོ་བརྙེས་ནས་ཤེས་བྱ་ཐམས་ཅད་ལ་ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་གཏན་ནས་བཅོམ་པའམ་ཡེ་ནས་བཅོམ་པ་ཞེས་བྱ་ལ། ཉོན་ཐོས་དང་རང་སངས་རྒྱས་རྣམས་ཀྱི་ཉོན་མོངས་པ་ཅན་གྱི་མུན་པ་ཙམ་ལས་གཞན་མ་བཅོམ་པར་བསྟན་ཏེ། སངས་རྒྱས་ཀྱི་ཆོས་དང་ཡུལ་དང་དུས་ཤིན་ཏུ་བསྐལ་པ་དང་དོན་རབ་ཏུ་མཐའ་ཡས་པ་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པ་ཉིད་དོ།། ད་ནི་འཁོར་བའི་འདམ་ལས་འགྲོ་བ་སོགས་ཚིག་རྐང་བར་མ་འདི་ཕྲིན་ལས་ཕུན་སུམ་ཚོགས་པ་བསྟན་ཏེ། དེ་ཡང་འགྲོ་བ་སེམས་ཅན་རྣམས་འཁོར་བ་ལ་ཆགས་ཞིང་ཞེན་པའི་དབང་གིས་འཁོར་བའི་ཕ་རོལ་ཏུ་བརྒལ་བར་དཀའ་བ་ལྟ་བུ་གྱུར་པའི་ཕྱིར་འཁོར་བའི་འདམ་ཞེས་འདམ་རྫབ་དང་ཆོས་མཚུངས་པར་བསྟན་ནས་འགྲོ་བ་རྣམས་ལ་དམ་པའི་ཆོས་ཀྱི་ཐག་པའི་སྒོ་ནས་འགྲོ་བ་རྣམས་དྲངས་པར་མཛད་པ་ཡིན་ཏེ། དེ་ཡང་ཁྱབ་འཇུག་ཀྱི་རྫུ་འཕྲུལ་དང་དབང་ཕྱུག་གིས་དམ་པ་སྦྱིན་པའི་མཐུ་ལྟ་བུ་དེ་འདྲ་མ་ཡིན་པར་སངས་རྒྱས་ཀྱིས་བདེན་པ་བཞིའི་དོན་ཇི་ལྟ་བ་བཞིན་དུ་སྟོན་པའི་སྒོ་ནས་འགྲོ་བ་དྲངས་པར་མཛད་པ་དེ་ལ་སློབ་དབྱིག་གཉེན་རང་གིས་སྒོ་གསུམ་གུས་པའི་སྒོ་ནས་བསྟན་བཅོས་རྩོམ་པ་ལ་བར་ཆད་མེད་པ་དང་། རྩོམ་པ་མཐར་ཕྱིན་པ་དང་། གདུལ་བྱ་སློབ་མ་རྣམས་ཀྱིས་འཆད་ཉན་མཛད་ནས་རྒྱུད་ལ་བསོད་ནམས་རྫོགས་པ་སོགས་དེ་འདྲར་འགྱུར་བའི་དགོངས་པ་ལ་གཟིགས་ནས་ཕྱག་འཚལ་བ་ཡིན་ནོ།།
གཉིས་པ་བསྔོ་བས་རྒྱས་འདེབས་པ་ནི།
དེ་ལྟར་རྩོམ་པའི་དགེ་བ་འདིས།།ཐེག་དམན་གཞུང་ལ་མངོན་གྱུར་ནས།།
འཇིག་རྟེན་རྨོངས་པའི་ཡུལ་ཁམས་སུ།།ལུང་རྟོགས་བསྟན་པ་རྒྱས་པར་ཤོག། །།
བསམ་འཆར།