ཚད་མ་རྣམ་འགྲེལ་ལས་རང་དོན་ལེའུའི་དྲིས་ལན།
གཞུང་ལུགས་འཆད་པས་སྐལ་ལྡན་རྗེས་སུ་འཛིན། །རྩོད་པས་མི་ཤེས་རྒོལ་བའི་འགོ་བོ་འགེམས། །
ལེགས་བཤད་རྩོམ་པས་རྒྱལ་བསྟན་འཛིན་ཅིང་སྤེལ། །སྨྲ་བའི་ཟླ་བ་དཔལ་ལྡན་ཆོས་གྲགས་རྒྱལ། །
ཚད་མ་རྣམ་འགྲེལ་ལས་རང་དོན་ལེའུའི་དྲིས་ལན།
༡༽ ཚད་མ་རྣམ་འགྲེལ་ཞེས་པའི་འགྲེལ་པ་གང་ཤེས་རྒྱོབ?
ལན=དེ་ཡང་བསྟན་པ་སྤྱིའི་མགོན་པོ་གང་གིས་གསུངས་པའི་གསུང་རབ་རྣམས་ཚད་མ་ཡིན་པ་དང་སློབ་དཔོན་ཕྱོགས་ཀྱི་གླང་པོས་མཛད་པའི་ཚད་མ་ཀུན་བཏུས་ཀྱི་དགོངས་པ་རྣམས་ཕྱིན་ཅི་མ་ལོག་པར་ཇི་ལྟ་བ་བཞིན་དུ་རྣམ་པ་མང་པོའི་ཐོག་ཏུ་འགྲེལ་པའི་རྒྱུ་མཚན་གྱིས་ཚད་མ་རྣམ་འགྲེལ་ཞེས་བརྗོད་པ་དང་།
འཇམ་མགོན་མི་ཕམ་རིན་པོ་ཆེས དོན་མ་ནོར་བར་འཇལ་བའམ། གསར་དུ་མི་སླུ་བའི་རིག་པ་ལ་འཇུག་ཅིང་། དེ་ལ་དོན་འགྱུར་དུ་ཚད་མ་ཞེས་པར་མཛད་ལ། དེ་ལྟ་བུ་བརྗོད་བྱར་བསྟན་པའི་གཞུང་ཚད་མ་ཀུན་ལས་བཏུས་པ་ནི་སྐབས་འདིའི་ཚད་མ་ཡིན་ལ། དེ་དག་གི་དགོངས་པ་ཕྱིན་ཅི་མ་ལོག་པར་གཞུང་འདི་ཉིད་ཀྱིས་རྣམ་པར་འགྲེལ་བས་ན་ཚད་མ་རྣམ་འགྲེལ་པ་ཞེས་བྱའོ།། །།
༢༽ རྟོགས་པའི་དྲྭ་བ་རྣམས་བསལ་ཅིང་།། ཞེས་སོགས་མཆོད་བརྗོད་ཀྱི་ཚིག་རྐང་བཞིའི་མཆོད་ཡུལ་ངོས་འཛིན་ཚུལ་ལ་མི་འདྲ་བ་ཇི་ཙམ་ཡོད་པ་དང་དེའི་ནང་ནས་འཇམ་མགོན་མི་ཕམ་རིན་པོ་ཆེའི་དགོངས་པ་ནི་གང?
ལན=རྟོགས་པའི་དྲྭ་བ་རྣམས་བསལ་ཅིང་།། ཞེས་པའི་སྐབས་མཆོད་བརྗོད་ཀྱི་ཡུལ་ལ་་་་ཇི་ལྟ་བ་དང་ཇི་རྙེད་སྟེ་མཁྱེན་གཉིས་ཀྱི་ཡེ་ཤེས་ཀྱི་དཔལ་མངའ་བ་སངས་རྒྱས་བཅོམ་ལྡན་འདས་ལ་བརྗོད་ཚུལ་དང་། ཡང་ཆོས་སྐུ། ལོངས་སྐུ། སྤྲུལ་སྐུ། ངོ་བོ་ཉིད་སྐུ་སྟེ་སྐུ་བཞི་ཕྲིན་ལས་དང་བཅས་པ་ལ་བརྗོད་པ་དང་། ཡང་སློབ་དཔོན་གང་་འདི་ནི་འཕགས་པ་ཀུན་ཏུ་བཟང་པོའི་སྤྲུལ་སྐུ་ཡིན་པས་ཀུན་ཏུ་བཟང་པོ་ལ་བརྗོད་ཚུལ་དང་། ཡང་དུས་གསུམ་གཞོན་ནུའི་ལང་ཚོའི་དཔལ་དང་ལྡན་པ་འཇམ་དཔལ་དབྱངས་ལ་མཛད་པ་འདོད་པ་སོགས་འགྲེལ་ཚུལ་སྣ་ཚོགས་ཡོད་ཀྱང་། སྐབས་འདིར་འཇམ་མགོན་མི་ཕམ་རིན་པོ་ཆེའི་དགོངས་པ་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་ལ་ཕྱག་མཛད་པས་གང་ལྟར་ཡང་འགལ་བ་མེད་པར་ཤེས་པར་བྱའོ།། ཞེས་གསུངས་་སོ།། །།
༣༽ ཕྱོགས་ཆོས་དེ་ཆས་ཞེས་པའི་སྐབས་ཀྱི་ཕྱོགས་སྒྲ་ཡི་འཇུག་ཡུལ་ཇི་ཙམ་ཡོད་པ་ཡིན?
ལན=ཕྱོགས་སྒྲ་འཇུག་པའི་ཡུལ་ལ་མཁས་པ་རྣམས་ཀྱི་བཞེད་ཚུལ་མི་འདྲ་བ་དུ་མ་ཞིག་ཡོད་ཀྱང་། འདིར་འཇམ་མགོན་མི་ཕམ་རིན་པོ་ཆེས། ཚད་མ་རིག་གཏེར་ལས། ཕྱོགས་ནི་ཆོས་དང་ཆོས་ཅན་དང་། །
ཚོགས་པ་བརྗོད་ལ་དངོས་མིང་ཡིན། །
དེའི་ཕྱོགས་རེ་འཛིན་པའི་ཕྱིར། །
ཡ་གྱལ་གཉིས་ལ་བཏགས་ནས་འཇུག །ཅེས་གསུངས་པ་བཞིན་ཕྱོགས་སྒྲ་འཇུག་པའི་ཡུལ་ལ་ལྔར་བཞེད་པར་སྣང་སྟེ། ལེགས་བཤད་སྣང་བའི་གཏེར་ལས། སྤྱིར་བཏང་ཕྱོགས་ཀྱི་སྒྲ་ནི་ཆོས་ཅན་སྒྲ་དང་ཆོས་མི་རྟག་པའི་ཚོགས་དོན་ཏེ་མི་རྟག་པར་ཤེས་འདོད་ཞུགས་པའི་ཆོས་ཅན་ལྟ་བུ་ལ་དངོས་མིང་དུ་ཡོངས་སུ་གྲགས་པ་ཡིན་ལ། དེ་ཡི་ཕྱོགས་གཅིག་ཆོས་ཅན་རྐྱང་པ་དང་། བསྒྲུབ་ཆོས་རྐྱང་པའང་བཏགས་མིང་དུ་འཇུག་སྟེ། རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་ཅེས་ཕྱོགས་གཅིག་ལ་རིལ་པོའི་མིང་གི་འཇུག་པ་བཞིན་ནོ། །དེར་མ་ཟད་མཐུན་ཕྱོགས་དང་མི་མཐུན་ཕྱོགས་ལའང་ཕྱོགས་ཀྱི་མིང་འཇུག་མོད་ཀྱི། ཞེས་སོགས་གསུངས་པའི་ཕྱིར་རོ། །
༤༽སློབ་དཔོན་ཆོས་གྲགས་ཀྱིས་བསྟན་བཅོས་འདི་གཞན་ལ་ཕན་པའི་ཕྱིར་རྩོམ་པ་ཡིན་དང་མིན་རྒྱུ་མཚན་དང་བཅས་བྲིས?
ལན=གཞན་ལ་ཕན་པའི་ཕྱིར་རྩོམ་པ་ཡིན་ཏེ། སེམས་དཔའ་ཆེན་པོ་བསམ་བཞིན་གཞན་གྱི་དོན་གྱི་ཕྱིར་མིའི་སྲིད་པ་བཟུང་ནས་འཕྲིན་ལས་མཛད་པ་ཡིན་པའི་ཕྱིར་རོ།། འོ་ན་གཞུང་ལས།
སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས། །
དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང་། །
ཡོངས་གྱུར་དེས་ན་བདག་ལ་འདི་ནི་གཞན་ལ་ཕན་པ་ཡིན་ཞེས་བསམ་པའང་མེད། །
སེམས་ནི་ཡུན་རིང་ལེགས་བཤད་གོམས་པ་ལྷུར་ལེན་བསྐྱེད་ཕྱིར་འདི་ལ་དགའ་བ་སྐྱེས། །
ཞེས་གསུངས་པ་དང་འགལ་སྙམ་ན། མ་ཡིན་ཏེ། དེ་ནི་སྣོད་དུ་མི་རུང་བ་རྣམས་ལ་རེ་ཞིག་ཕན་མི་ཐོགས་པར་གསུངས་པ་ཙམ་ཡིན་པའི་ཕྱིར་རོ།།
༥༽ རྟགས་ཡང་དག་གི་མཚན་ཉིད་རྩ་ཚིག་དང་བཅས་བཀོད་ནས་གཏན་ཚིགས་ཡང་དག་ལ་དབྱེ་བ་ག་ཚོད་ཡོད་པ་ཡིན་དཔེར་བརྗོད་རེ་རེ་བཞིན་བྲིས?
ལན=རྟགས་ཡང་དག་གི་མཚན་ཉིད་རྩ་ཚིག་ནི། གཞུང་ལས།
ཕྱོགས་ཆོས་དེས་ཆས་ཁྱབ་པ་ཡི།།
གཏན་ཚིགས་དེ་ནི་རྣམ་གསུམ་ཉིད།།
ཞེས་ཕྱོགས་ཆོས། རྗེས་ཁྱབ། ལྡོག་ཁྱབ་སྟེ་ཚུལ་གསུམ་ཚང་བའི་གཏན་ཚིགས་ནི་རྟགས་ཡང་དག་གི་མཚན་ཉིད་དོ།།
དེ་ལ་དབྱེ་ན་དུ་མ་ཡོད་ཀྱང་གསུམ་ཉིད་དུ་འདུ་སྟེ། འབྲས་བུའི་རྟགས། རང་བཞིན་གྱི་རྟགས། མ་དམིགས་པའི་རྟགས་སོ།།
དང་པོ་འབྲས་བུའི་རྟགས་ཀྱི་དཔེར་བརྗོད་ནི། དུ་ལྡན་ལ་ལ་ཆོས་ཅན། དུ་བ་ཡོད་དེ། མེ་ཡོད་པའི་ཕྱིར་ཞེས་པ་ལྟ་བུའོ།།
གཉིས་པ་རང་བཞིན་གྱི་རྟགས་ཀྱི་དཔེར་བརྗོད་ནི། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པ་ལྟ་བུའོ།།
གསུམ་པ་མ་དམིགས་པའི་རྟགས་ཀྱི་དཔེར་བརྗོད་ནི། ཤ་ཟ་སྐལ་ལྡན་དུ་སོང་བའི་གང་ཟག་གི་ངོར་ཆོས་ཅན། ཤ་ཟ་མེད་དེ། ཤ་ཟ་ཚད་མས་མ་དམིགས་པའི་ཕྱིར་རོ།། ཞེས་སོ།། །།
༦༽ འབྲས་བུ་འདི་རང་གི་རྒྱུ་ཡོད་པར་སྒྲུབ་པའི་གཏན་ཚིགས་ཡང་དག་ཡིན་མིན་རྒྱུ་མཚན་དང་བཅས་བྲིས?
ལན=འབྲས་བུ་གང་ཞིག་སྐྱེད་བྱེད་ཀྱི་རྒྱུ་ལ་དངོས་པོའི་རང་བཞིན་ནི་ཇི་སྙེད་ཅིག་ཚོགས་དགོས་པ་དེ་ལས་གང་ཡང་རུང་བ་གཅིག་མེད་ན་འབྲས་བུ་དེ་ཡང་མི་འབྱུང་བར་ངེས་པའི་ཕྱིར་། འབྲས་བུ་དེ་ནི་རྒྱུ་ཡོད་པར་སྒྲུབ་པའི་གཏན་ཚིགས་ཡང་དག་ཡིན་ནོ།།
གཞུང་ལས། རྒྱུ་ལ་རང་བཞིན་ཇི་སྙེད་ཅིག།
མེད་ན་མི་འབྱུང་འབྲས་བུ་ནི།།
གཏན་ཚིགས་་་་་་་་་་་་་་་་་་་་་་།། ཞེས་པ་སྟེ་དཔེར་ན་
འབྲས་བུ་ཆོས་ཅན། རང་གི་རྒྱུ་ཡོད་པར་སྒྲུབ་པའི་གཏན་ཚིགས་ཡང་དག་ཡིན་ཏེ། རྒྱུ་ཚོགས་པ་ལས་འབྲས་བུ་བྱུང་བ་ཡིན་པའི་ཕྱིར་རོ།། །།
༧༽ རྒྱུ་ཚོགས་པས་འབྲས་བུ་སྐྱེ་རུང་དཔོག་པ་ཆོས་ཅན། རྟག་གསུམ་དུ་མ་འདུས་པ་ཐལ། འབྲས་རང་མ་དམིགས་པའི་རྟགས་གསུམ་པོ་གང་ཡང་མ་ཡིན་པའི་ཕྱིར། ཞེས་པའི་ཐལ་བ་ལ་ལན་ཇི་ལྟར་མཛད་འདུག?
ལན=གཞུང་ལས=
རྒྱུ་ཚོགས་པ་ལས་འབྲས་སྐྱེ་བར།།
རྗེས་སུ་དཔོག་པ་གང་ཡིན་པ།།
དོན་གཞན་ལ་ནི་མི་ལྟོས་ཕྱིར།།
དེ་ནི་རང་བཞིན་ཡིན་པར་བརྗོད།།
ཞེས་པས་རྒྱུ་ཚོགས་པ་ལས་འབྲས་བུ་སྐྱེ་བར་རྗེས་སུ་དཔོག་པ་གང་ཡིན་པ་འདི་ནི་ལེགས་པར་དཔྱད་ན་རྒྱུའི་ནུས་པ་དེ་དོན་གྱི་དངོས་པོ་གཞན་ལ་ནི་མི་ལྟོས་པར། རྒྱུའི་ཚོགས་པ་རང་ཉིད་གྲུབ་ཙམ་ནས་འབྲས་བུ་འབྱུང་རུང་གི་ངོ་བོར་གྲུབ་པའི་ཕྱིར། དཔེར་ན་མར་མེ་སྐྱེས་ཙམ་ནས་འོད་རང་ཆས་སུ་གྲུབ་པ་ལྟར་རྒྱུ་ཚོགས་པ་རང་གི་ཆོས་ཉིད་དམ་རང་བཞིན་ནི་འབྲས་བུ་སྐྱེད་པའི་ནུས་པ་དང་ལྡན་པར་ཤེས་པ་ཡིན་པས་ན། དེ་ནི་རང་བཞིན་གྱི་རྟགས་ཡིན་པར་བརྗོད་དེ་དེའི་ནང་དུ་འདུས་སོ།། ཞེས་གསུངས་སོ།། །།
༨༽རྒྱུ་ཡི་ཆོས་རྗེས་སུ་དཔོག་པའི་འབྲས་རྟགས་ཀྱི་དཔེར་བརྗོད་ཇི་ཙམ་ཡོད་པ་ཡིན་ལེགས་བཤད་སྣང་བའི་གཏེར་གྱི་འགྲེལ་པ་ལྟར་འཁོད?
ལན=གཞུང་ལས། རྒྱུ་ཆོས་རྗེས་སུ་དཔག་པ་སྟེ།།
དུ་བས་བུད་ཤིང་འགྱུར་བ་བཞིན།། ཞེས་པ་ལྟར། དཔེར་ན་རྟགས་དྲག་ཏུ་ཕྱུར་བའི་དུ་བས་བུད་ཤིང་གི་མདོག་འགྱུར་བ་རྗེས་སུ་དཔོག་པ་བཞིན་ཏེ། བུད་ཤིང་མ་ཚིག་པར་དུ་བ་མཐོང་བ་མེད་ལ། དེ་བཞིན་གཟུགས་སོགས་དང་བྲལ་བའི་རོ་མི་སྲིད་པས་སོ།། བུད་ཤིང་གི་འགྱུར་བ་ཐལ་བ་བཞེད་པའམ་ཡོད་དེ། དེ་བཞིན་ཨུཏྤལ་ལ་སོགས་ཀྱི་དྲི་ཚོར་བས་དེའི་གཟུགས་སོགས་ཡོད་པར་རྟོགས་པ་དང་། བུ་རམ་སྨུག་པོའི་གཟུགས་སོགས་ལས་རོ་མངར་བར་རྟོགས་པ་སོགས་སྦྱར་རོ།། །།
༩༽དགག་རྟགས་ལ་མི་སྣང་བ་མ་དམིགས་པ་དང་སྣང་རུང་མ་དམིགས་པའི་རྟགས་གཉིས་སུ་ཕྱེ་བའི་རྒྱུ་མཚན་གང?
ལན=འདི་བཤད་པའི་དགོས་པ་ནི་གཞི་གང་དུ་ཆོས་གང་ཞིག་མེད་ངེས་སུ་སྒྲུབ་པ་ལ་སྣང་དུ་རུང་བ་དང་མི་རུང་བའི་ཁྱད་པར་ཕྱེ་ནས་སྣང་རུང་རྣམས་མ་དམིགས་པས་ཁེགས་པར་སྟོན་ལ། སྣང་དུ་མི་རུང་བ་ནི་མ་མཐོང་བ་ཙམ་གྱིས་མི་ཁེགས་པར་བསྟན་པའི་ཕྱིར་ཡིན་ཏེ། ཡོད་ཀྱང་སྣང་དུ་མི་རུང་བ་ཡོད་དམ་སྙམ་ན། ཡོད་དེ་ཡུལ་དུས་རང་བཞིན་གྱི་བསྐལ་བ་གསུམ་ནི་སྣང་དུ་མི་རུང་བའོ།། །།ཞེས་གསུངས་སོ།། །།
༡༠༽ གཞུང་ལས་མེད་དོན་ཅན་མི་དམིགས་རྣམ་བཞི།། ཞེས་པའི་སྐབས་ཀྱི་སྣང་རུང་མ་དམིགས་པའི་གཏན་ཚིགས་བཞིའི་ངོས་འཛིན་དཔེར་བརྗོད་དང་བཅས་བྲིས?
ལན=མེད་དོན་ཅན་མི་དམིགས་རྣམ་བཞི། །ཞེས་པའི་སྐབས་ནས་བསྟན་པའི་གཏན་ཚིགས་བཞི་ནི། རང་བཞིན་འགལ་དམིགས། འབྲས་བུ་འགལ་དམིགས། རྒྱུ་མ་དམིགས་པ། རང་བཞིན་མ་དམིགས་པ་སྟེ་བཞི་ཡིན་ནོ།། དེ་དག་གི་དཔེར་བརྗོད་རྣམས་ཀྱི་རིམ་པ་བཞིན།
དང་པོ། མེ་སྟོབས་ཀྱི་ངེས་པའི་ས་གཞི་ནང་ཆོས་ཅན། གྲང་རེག་མེད་དེ། མེ་ཡོད་པའི་ཕྱིར་ཞེས་པ་ལྟ་བུའོ།།
གཉིས་པ་། གཞི་འདི་ནང་ཆོས་ཅན། གྲང་རེག་མེད་དེ། དུ་བ་ཡོད་པའི་ཕྱིར་ཞེས་པ་ལྟ་བུའོ།།
གསུམ་པ། གྲང་རེག་ཁྱབ་པའི་ས་གཞི་ནང་ཆོས་ཅན། དུ་བ་མེད་དེ། མེ་མ་དམིགས་པའི་ཕྱིར་ཞེས་པའོ།།
བཞི་པ། བུམ་པས་དག་པའི་ས་ཕྱོགས་ནང་ཆོས་ཅན། བུམ་པ་མེད་ནེ། བུམ་པ་མ་དམིགས་པའི་ཕྱིར་རོ།། །།
༡༡༽འགལ་འབྲས་དམིགས་ནས་དགག་བྱ་འགོག་ནུས་ན་འོ་ན་འགལ་རྒྱུ་དམིགས་པས་ཀྱང་དགག་བྱ་ཁེགས་སམ་ཞེས་པའི་རྒོལ་བ་ལ་ལན་ཇི་ལྟར་འདེབས་འདུག?
ལན=འོ་ན་འགལ་བའི་རྒྱུ་དམིགས་པས་ཀྱང་ཁེགས་སམ་ཞེ་ན། དགག་བྱ་དེ་དང་འགལ་བ་ཡི་ནི་རྒྱུ་དམིགས་པའི་སྦྱོར་བ་འགོད་པ་གང་ཡིན་པ་དེ་ལ་འགལ་རྒྱུ་ཡིན་པ་ཙམ་གྱིས་མི་ཁེགས་ཏེ་འགལ་རྒྱུ་དེ་ཡོད་ན་དགག་བྱ་དེ་ཡོད་མི་ཤེས་པའི་རྒྱུ་མཚན་དག་ནི་འགལ་བ་ཉིད་དམ། འགལ་བ་ཉིད་ཀྱི་རྒྱུ་མཚན་དག་ནི་མེད་ན་རྟགས་དེ་དེ་སྒྲུབ་ལ་འཁྲུལ་པ་ཅན་ཡིན་ཏེ་བུད་ཤིང་དམིགས་པས་གྲང་རེག་འགོག་པ་བཞིན་ནོ།། རྒྱུ་མཚན་ཡོད་ན་ཁེགས་ནུས་ཏེ། གྲང་འབྲས་སྤུ་ལོང་སོགས་ཀྱི་ཁྱད་པར་མེད་དེ། མེའི་བྱེ་བྲག་ཉེ་བའི་ཕྱིར་ཞེས་པ་བཞིན་ནོ།། །།
༡༢༽མུ་སྟེགས་རིག་པ་ཅན་པས སྐྱེ་བོ་ཕ་རོལ་པོ་ཆོས་ཅན། འདོད་ཆགས་དང་བཅས་པ་ཡིན་ཏེ། ལུས་དང་ལྡན་པའི་ཕྱིར་ཞེས་བཀོད་པའི་སྦྱོར་བ་དེ་ཆོས་ཅན། མ་ངེས་པའི་གཏན་ཚིག་མ་ཡིན་པ་ཐལ། ཐུང་མོང་དང་ཐུན་མིག་གྱི་མ་ངེས་པ་གཉིས་པོ་གང་ཡང་མ་ཡིན་པའི་ཕྱིར། ཞེས་པའི་ཐལ་བ་ལ་ལན་ཇི་ལྟར་འདེབས་དགོས་པ་ཡིན?
ལན=ཐུན་མོང་གི་མ་ངེས་པ་ཡིན་ཏེ། ལུས་དང་ལྡན་པའི་སྐྱེ་བོ་ཕ་རོལ་པོ་ལ་འདོད་ཆགས་ཡོད་པར་མཐོང་བ་ཙམ་གྱི་གཏན་ཚིག་ཡང་དག་ཉིད་དུ་མི་འགྱུར་ཏེ། ལུས་དང་ལྡན་ལ་འདོད་ཆགས་མེད་པ་ཡང་ཡོད་དེ་བདག་འཛིན་སྤངས་པའི་དགྲ་བཅོམ་པ་དང་བྱེ་བྲག་ས་རྡོ་སོགས་ལ་འདོད་ཆགས་མེད་པའི་ཕྱིར་་་ཞེས་ལན་དེ་ལྟར་དུ་འདེབས་དགོས་པ་ཡིན་ནོ།།
༡༣༽རྟགས་མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་གྲུབ་པར་འདོད་ན་སྐྱོན་ཇི་ཙམ་ཡོད་པ་ཡིན་རྒྱས་བསྡུས་མཚམས་པ་ཞིག་བྲིས?
ལན=རྟགས་མི་མཐུན་ཕྱོགས་ལ་མ་མཐོང་བ་ཙམ་གྱི་ལྡོག་ཁྱབ་གྲུབ་པར་འདོད་ན་སྐྱོན་དྲུག་ཡོད་དེ། མི་མཐུན་སྦྱོར་གྱི་ངག་སྨོས་པ་དོན་མེད་དུ་ཐལ་བ་དང་། ལྷག་ལྡན་ཡང་འཁྲུལ་པ་མེད་པར་ཐལ་བ་དང་། སྲོག་ལྡན་གོ་བྱེད་ཡིན་པར་ཐལ་བ་དང་། ལྡོག་ཁྱབ་ཐེ་ཚོམ་ཟ་བའམ་རྟགས་སུ་ཐལ་བ་དང་། མཉན་བྱས་ཕྱོགས་གཉིས་ཁེགས་པར་ཐལ་བ་དང་། རེག་བྱ་འོགག་པ་རིགས་པར་ཐལ་བ་སོགས་པའི་སྐྱོན་དྲུག་ཡོད་དོ།། །།
༡༤༽གཏན་ཚིགས་ཀྱི་ནི་ཚུལ་གསུམ་ལའང་། །དེ་ཡིས་མ་གྲུབ་ལྡོག་དོན་དང་། །འཁྲུལ་པ་ཅན་གྱི་གཉེན་པོར་ནི། ངེས་པ་བརྗོད་པར་མཛད་པ་ཡིན།། ཞེས་པའི་གཞུང་དོན་རང་བློས་གང་ནུས་པ་ཞིག་བྲིས?
ལན=རྟགས་འདི་རྩོད་གཞི་ཆོས་ཅན་གྱི་སྟེང་དུ་མ་གྲུབ་པའི་གཉེན་པོར་་་་རྟགས་འདི་རྩོད་གཞི་ཆོས་ཅན་གྱི་སྟེང་དུ་མི་ལྡན་རྣམ་གཅོད་ཀྱི་ཚུལ་དུ་གྲུབ་དགོས་ཞེས་ཕྱོགས་ཆོས་ངེས་པ་བརྗོད་པ་དང་། རྟགས་འདི་ཡིན་ན་བསྒྲུབ་བྱའི་ཆོས་ཡིན་པས་མ་ཁྱབ་པའི་གཉེན་པོར་་་་་རྟགས་འདི་ཡིན་ན་བསྒྲུབ་བྱའི་ཆོས་ཡིན་པས་ཁྱབ་དགོས་ཞེས་རྗེས་འགྲོའི་ངེས་པ་དང་། བསྒྲུབ་བྱའི་ཆོས་ལས་ལོག་ན་་རྟགས་འདི་ལས་ལོག་པས་མ་ཁྱབ་པའི་གཉེན་པོར་་་་་་བསྒྲུབ་བྱའི་ཆོས་ལས་ལོག་ན་རྟགས་འདི་ལས་ལོག་པས་ཁྱབ་ཞེས་ལྡོག་ཁྱབ་ངེས་པ་བརྗོད་པའོ།། །།
༡༥༽ མུ་སྟེགས་རིག་པ་ཅན་པས་ གསོན་ལས་ཆོས་ཅན་ བདག་དང་བཅས་པ་ཡིན་ཏེ། སྲོག་དང་ལྡན་པའི་ཕྱིར། ཞེས་བཀོད་པའི་སྦྱོར་བ་དེ་ཆོས་ཅན། མ་ངེས་པའི་གཏན་ཚིག་མ་ཡིན་པ་ཐལ། ཐུན་མོང་དང་ཐུན་མིན་གྱི་མ་ངེས་པ་གཉིས་པོ་གང་ཡང་མ་ཡིན་པའི་ཕྱིར། ཞེས་པའི་ཐལ་བ་ལ་ལན་ཇི་ལྟར་འདེབས་དགོས་པ་ཡིན?
ལན=རྟགས་འདི་འདྲ་བ་ཐུན་མིན་གྱི་མ་ངེས་པ་ཡིན་ཏེ། གསོན་ལུས་ཐམས་ཅད་ནི་ཕྱོགས་ཤེས་འདོད་དུ་གྱུར་པས་མཐུན་དཔེ་མི་སྲིད་ལ། བདག་མེད་ཀྱང་སྲོག་ཡོད་པ་ལ་འགོག་བྱེད་མེད་པས་ མི་མཐུན་ཕྱོགས་ལས་ལྡོག་པ་ལ་ངེས་པ་སྐྱེ་མི་རུང་བས་སོ།། ཞེས་ཐལ་བ་ལ་ལན་དེ་ལྟར་འདེབས་དགོས་པ་ཡིན་ནོ།། །།
༡༦༽རྟགས་མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་གྲུབ་པར་འདོད་ན་སྐྱོན་ཇི་ཙམ་ཡོད་པ་ཡིན་རྒྱས་བསྡུས་མཚམས་པ་ཞིག་བྲིས?
ལན=རྟགས་མི་མཐུན་ཕྱོགས་ལ་མ་མཐོང་བ་ཙམ་གྱི་ལྡོག་ཁྱབ་གྲུབ་པར་འདོད་ན་སྐྱོན་དྲུག་ཡོད་དེ། མི་མཐུན་སྦྱོར་གྱི་ངག་སྨོས་པ་དོན་མེད་དུ་ཐལ་བ་དང་། ལྷག་ལྡན་ཡང་འཁྲུལ་པ་མེད་པར་ཐལ་བ་དང་། སྲོག་ལྡན་གོ་བྱེད་ཡིན་པར་ཐལ་བ་དང་། ལྡོག་ཁྱབ་ཐེ་ཚོམ་ཟ་བའམ་རྟགས་སུ་ཐལ་བ་དང་། མཉན་བྱས་ཕྱོགས་གཉིས་ཁེགས་པར་ཐལ་བ་དང་། རེག་བྱ་འགོག་པ་རིགས་པར་ཐལ་བ་སོགས་པའི་སྐྱོན་དྲུག་ཡོད་དོ།། །།
༡༧༽མ་མཐོང་བ་ཙམ་གྱིས་མེད་པར་ཁྱབ་ན་གཞན་སྡེ་བྲེ་བྲག་པ་སོགས་ཀྱིས་གསོན་ལུས་བདག་ཡོད་པར་འདོད་པ་སོགས་ལ་ཁས་ལེན་འགལ་བའི་དགག་པ་ཇི་ལྟར་མཛད་འདུག?
ལན=གཞུང་ལས།
བདག་ལ་ས་ལ་ཤེས་ཡོད་སོགས།། མེད་པར་རབ་སྒྲུབ་བྱེད་མིན་པའི།།
མ་དམིགས་གང་ཡིན་དེ་ཁོ་ན།། གཏན་ཚིགས་མེད་སྒྲུབ་ཡིན་ནམ་ཅི།།
ཞེས་པར་ལྟར་བྱེ་བྲག་པས་གསོན་ལུས་བདག་བཅས་སུ་སྒྲུབ་པ་དང་། རྒྱང་འཕེན་པས་ས་ལ་ཤེས་པ་ཡོད་པ་དང་། སོགས་ཁོངས་ནས་གྲངས་ཅན་པས་འོ་མ་ལ་ཞོ་ཡོད་པར་འདོད་པས་སོགས་ནི་ཡོད་པར་སྒྲུབ་ཀྱི། དེ་དག་མེད་པར་རབ་ཏུ་སྒྲུབ་པར་བྱེད་པ་མིན་པའི་བདག་ཉིད་དུ་ཁས་ལེན་ཡང་། མ་མཐོང་བ་ཙམ་གྱིས་མེད་པར་འགྲུབ་ན་བདག་ལ་སོགས་པ་དེ་དག་ཀྱང་མ་དམིགས་པའི་ཕྱིར་དེ་དག་མ་དམིགས་པ་གང་ཡིན་པ་དེ་ཙམ་ཁོ་ན། གཏན་ཚིགས་ཡང་དག་པ་བདག་སོགས་མེད་པར་སྒྲུབ་པ་ཉིད་དུ་ཁས་ལེན་པ་ཡིན་ནམ་ཞེས་བརྒལ་བའོ།། །།
༡༨༽དེ་ཕྱིར་ཆོས་མི་མཐུན་དཔེ་ལ། །ངེས་པར་འདི་ལ་གཞི་མི་འདོད། །དེ་དག་མེད་ནའམ་དེ་མེད་ཅེས། །བརྗོད་པ་ལས་ཀྱང་དེ་རྟོགས་ཕྱིར།། ཞེས་པའི་འགྲེལ་བ་རྒྱོབ?
ལན=ལྡོག་ཁྱབ་འབྲེལ་བའི་སྒོ་ནས་ངེས་ནུས་པ་དེ་ཕྱིར་ཆོས་མི་མཐུན་པའི་དཔེ་ལ། ངེས་པར་ཏེ་མཐའ་གཅིག་ཏུ་ལྡོག་ཁྱབ་འདི་ལ་གང་ལས་ལྡོག་པར་བྱ་བའི་གཞི་ཉིད་དུ་གྲུབ་པ་ཞིག་དགོས་པར་མི་འདོད་དེ། མེ་དང་མི་རྟག་ལྟ་བུ་དེ་དག་མེད་པ་ཙམ་ནའང་དུ་བ་དང་བྱས་པ་ལྟ་བུ་དེ་དག་མེད་པར་འགྱུར་ཅེས་བརྗོད་པ་ལས་ཀྱང་ལྡོག་ཁྱབ་དེ་རྟོགས་པར་འགྱུར་རིགས་པའི་ཕྱིར་རོ།། །།
༡༩༽སྒྲུབ་རྟགས་ཁྱབ་པ་གཉིས་པོ་འབྲེལ་བར་ལྟོས། ཅེས་པའི་འབྲེལ་བའི་དབྱེ་བ་དང་དབྱེ་བ་འདི་ཡང་ བསྡུ་ན་འབྲེལ་བ་གང་དུ་བསྡུ་བ་ཡིན?
ལན=གཞུང་ལས། མེད་ན་མི་འབྱུང་ངེས་ཕྱིར་རོ།། ཞེས་འབྲེལ་བའི་དབྱེ་བ་ལ་གཉིས་ཡོད་དེ་ངོ་བོ་བདག་གཅིག་གི་འབྲེལ་བ་དང་དེ་ལས་དེ་བྱུང་གི་འབྲེལ་བའོ།། དབྱེ་བ་འདི་ཡང་བསྡུ་ན་མེད་ན་མི་འབྱུང་གི་དབྱེ་བ་ན་བསྡུ་བ་ཡིན་ནོ།། །།
༢༠༽མ་དམིགས་པའི་རྟགས་ཐམས་ཅད་ངོ་བོ་མ་དམིགས་པ་དང་འབྲེལ་ཡུལ་མ་དམིགས་པ་དང་འགལ་ཟླ་དམིགས་པ་གསུམ་ལ་བསྡུ་བར་བཤད་ན་བསྡུ་ཚུལ་ཇི་ལྟར་ཡིན?
ལན=དེ་ཡང་རང་བཞིན་མ་དམིགས་པ་ནི་རང་གི་ངོ་བོ་མ་དམིགས་པ་ཡིན་ལ། རྒྱུ་ཁྱབ་བྱེད་འབྲས་བུ་མ་དམིགས་པ་གསུམ་འབྲེལ་ཡུལ་མ་དམིགས་པ་དང་། ལྷག་མ་དྲུག་འགལ་ཟླ་དམིགས་པ་ཡིན་ནོ།། ཞེས་གསུངས་སོ།། །།
༢༡༽རྒྱུ་དང་འབྲས་བུའི་དངོས་པོའམ།། རང་བཞིན་ངེས་པར་བྱེད་པ་ལས།། མེད་ན་མི་འབྱུང་ངེས་པ་སྟེ།། མ་མཐོང་ལས་མིན་མཐོང་ལས་མིན།། ཞེས་པའི་འགྲེལ་པ་སྦྱོར་བ་གང་རུང་ཞིག་ལ་སྦྱར་ནས་བྲིས?
ལན=ཞེས་པའི་གཞུང་དེ་བྱས་རྟགས་ཀྱིས་སྒྲ་མི་རྟག་པར་སྒྲུབ་པ་ལ་མཚོན་ནས་འགྲེལ་ན་ བྱས་དང་མི་རྟག་པ་རང་བཞིན་འབྲེལ་བར་ངེས་པར་བྱེད་པའི་ཚད་མས་མི་རྟག་པ་མེད་ན་བྱས་པ་མི་འབྱུང་བར་ངེས་པས་རྗེས་སུ་འགྲོ་ལྡོག་འགྲུབ་པ་ཡིན་པ་དང་། གཞན་རྟགས་མཐུན་ཕྱོགས་ལ་མཐོང་བ་དང་མི་མཐུན་ཕྱོགས་མ་མཐོང་བ་ཙམ་གྱིས་རྗེས་སུ་འགྲོ་ལྡོག་འཁྲུལ་མེད་དུ་གྲུབ་པ་མིན་ནོ་ཞེས་པ་ཡིན་ནོ།། །།
༢༢༽རྟགས་ཡང་དག་གི་སྔ་རྒོལ་ཡིན་ན་ཁྱབ་པ་དཔེའི་སྟེང་དུ་གཏན་ལ་འབེབས་དགོས་པར་ཁྱབ་མི་ཁྱབ་རྒྱུ་མཚན་དང་བཅས་བྲིས?
ལན=རྟགས་ཡང་དག་གི་སྔ་རྒོལ་ཡིན་ན་ཁྱབ་པ་དཔེའི་སྟེང་དུ་ངེས་པ་གཏན་ལ་འབེབས་མི་དགོས་ཏེ། རྒོལ་བ་མཁས་པ་རྣམས་ནི་ཆོས་མཐུན་སྦྱོར་གྱི་གྲུབ་ངག་ལ་ལྟོས་མི་དགོས་པས། ཕྱོགས་ཆོས་འབའ་ཞིག་ཙམ་བརྗོད་པས་ཁྱབ་པ་ངེས་ནུས་པའི་ཕྱིར་རོ།། །།
༢༣༽མུ་སྟེགས་བརྡ་སྤྲོད་པས་མེ་མེད་ན་དུ་བ་མེད་པས་མ་ཁྱབ་པའི་དཔེ་ཇི་ལྟར་ཡོད་པ་དང་ནང་པ་སངས་རྒྱས་པས་དེ་ལ་ལན་ཇི་ལྟར་འདུག?
ལན=བརྡ་སྤྲོད་རྣམས་ན་རེ། མེ་མེད་པར་དུ་བ་སྐྱེ་བ་མེད་པར་མ་ངེས་ཏེ། དཔེར་ན་དུ་བ་བརྒྱ་བྱིན་གྱི་སྤྱི་བོར་གྲགས་པ་གྲོག་མཁར་ལས་ཀྱང་འབྱུང་བར་མཐོང་བས་སོ་ཞེས་ནང་པ་སངས་རྒྱས་པར་ལ་རྒོལ་བ་དང་། ནང་པ་སངས་རྒྱས་པས་དེའི་བརྒལ་ལན་དུ། དེ་ལྟར་གསུངས་ཏེ། བརྒྱ་བྱིན་གྱི་སྤྱི་བོ་དེ་དངོས་སུ་དུ་བ་སྐྱེད་ནུས་ཀྱི་མེའི་རང་བཞིན་ཡིན་ནམ་མིན། ཡིན་ན་རྒྱུ་མེ་དངོས་ལས་དུ་བ་སྐྱེད་པས་སྐྱོན་མེད་ཅིང་། མེ་མིན་ན་དུ་བ་ཇི་ལྟར་གྲུབ་ཀྱི་མེ་ལོག་པ་ཁོ་ནས་མེ་འབྲས་དུ་བ་མ་ཡིན་པར་གྲུབ་ཀྱི་དཔྱད་པ་གཞན་མི་དགོས་སོ།། ཞེས་ལན་དེ་ལྟར་མཛད་འདུག་གོ། །།
༢༤༽ཕྱི་རོལ་པས་ བྱས་པའི་རྟགས་ཀྱིས་སྒྲ་མི་རྟག་པར་འགྲུབ་པའི་སྦྱོར་བ་ཆོས་ཅན། སྦྱོར་བ་ཡང་དག་མ་ཡིན་པ་ཐལ། རྟགས་ཆོས་ངོ་བོ་ཐ་དད་མེད་པའི་ཕྱིར།། ཞེས་པའི་ཐལ་བ་ལ་ལན་རྒྱས་བསྡུས་མཚམས་པ་ཞིག་རྩ་ཚིག་དང་སྦྱར་ནས་བྲིས?
ལན=རྩ་ཚིག་ནི། གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་ཕྱིར།།
མཐུན་དོངས་གཞན་གྱི་དངོས་དག་ལས།། ལྡོག་པ་ལ་ནི་བརྟེན་པ་ཅན། །ཞེས་ཐལ་བ་ལ་ལན་ཇི་ལྟར་འདེབས་འདུག་ན་རྟགས་ཆོས་ངོ་བོ་ཐ་དད་མེད་ཀྱང་། ལྡོག་པ་ཐ་དད་ཡོད་པའི་ཕྱིར་སྦྱོར་བ་ཡང་དག་མ་ཡིན་པ་ཉིད་དུ་མི་འགྱུར་རོ།། ཞེས་གསུངས་སོ།། །།
༢༥༽འགལ་བའི་ཁྱབ་བྱ་ཙན་དན་གྱི་མེ་དམིགས་ནས་གྲང་རེག་འགོག་པ་ལ་འོ་ན་མེའི་བྱེ་བྲག་མཐའ་ཡས་པ་ལ་སྦྱོར་དགོས་པས་མི་འཐད་ཅེས་པའི་རྒོལ་བ་ལ་ལན་བྲིས་ནས་གཞན་མེའི་དངོས་རྒྱུ་དམིགས་པ་དང་མེའི་རྒྱུ་ནུས་པ་ཐོག་མེད་ཀྱིས་གྲང་རེག་འགོག་མི་ནུས་པའི་ཇི་ལྟར་གསུངས་འདུག?
ལན=སྦྱོར་བས་དབྱེ་ཙམ་གྱི་སྐབས་ཁྱབ་བྱ་གཅིག་ལ་སྦྱར་ནས་གཞན་ཀུན་དེ་དང་འདྲ་བས་སོ་སོར་སྦྱར་དགོས་པར་མི་འགྱུར་ལ། སྦྱོར་བ་འདི་ཡང་འགོད་ཚུལ་ཡང་དག་ཡིན་པ་དང་། ཁྱབ་བྱ་ཉིད་དགག་བྱར་སྦྱོར་ཏེ་གཞུང་ལས་གསུངས་པས་ཁྱབ་བྱེད་ལའང་སྦྱར་ན་འགལ་བ་མེད་པའི་ཕྱིར་རོ་ཞེས་ལན་འདེབས་འདུག་པ་དང་། མེའི་དངོས་རྒྱུ་དང་ནུས་པ་ཐོགས་མེད་གྲངས་རེག་འགོག་མི་ནུས་ཏེ། གྲང་རེག་དང་འགལ་བ་ཙམ་གྱིས་དེ་འགོག་ནུས་པའི་རྒྱུ་མཚན་མེད་པའི་ཕྱིར་དང་། འགལ་རྒྱུ་ནུས་པ་ཐོགས་མེད་དེ་ཡོན་ན་འགལ་ཟླ་གྲང་རེག་མེད་པའི་རྒྱུ་མཚན་མ་དམིགས་སོ།། །།
༢༦༽སེལ་འཇུག་དང་སྒྲུབ་འཇུག་གི་གོ་དོན་ངོས་བཟུང་ནས་སྒྲ་རྟོག་ཡུལ་ལ་སེལ་བའི་སྒོ་ནས་འཇུག་ཚུལ་བྲིས?
ལན=རང་ཡུལ་ལ་འཇུག་པའི་སྐབས་ཆ་ཤས་སུ་ཕྱེ་ནས་འཇུག་པ་སེལ་འཇུག་དང་།
རང་ཡུལ་ལ་འཇུག་པའི་སྐབས་ཆ་ཤས་སུ་ཕྱེ་ནས་མ་འཇུག་པ་སྒྲུབ་འཇུག་ཡིན་ནོ།།
སྒྲ་སེལ་བའི་སྒོ་ནས་འཇུག་ཚུལ་ནི་ཀ་བ་ཞེས་པའི་སྒྲས་ནི་གཞན་ཀ་བའི་སྟེང་གི་བྱས་མི་རྟག་སོགས་སེལ་བའི་སྒོ་ནས་འཇུག་པ་དང་། བློ་རྟོག་ངོར་ནས་ཤར་བའི་ཀ་བ་སོགས་ཀྱི་མི་རྟག་པ་འཛིན་པའི་སྐབས་ཀ་བའི་དོན་བྱེད་དང་ཀ་བའི་བྱས་པ་སོགས་སེལ་བ་ཡིན་པས་་་་སྒྲ་རྟོག་ཡུལ་ལ་སེལ་བའི་སྒོ་ནས་དེ་ལྟར་འཇུག་པ་ཡིན་ནོ།། །།
༢༧༽གང་ཕྱིར་དངོས་ཀུན་རང་བཞིན་གྱིས།། རང་རང་ངོ་བོ་ལ་གནས་ཕྱིར།། མཐུན་དངོས་གཞན་གྱི་དངོས་དག་ལས།། ལྡོག་པ་ལ་ནི་བརྟེན་པ་ཅན།། ཞེས་པའི་གཞུང་ཚིག་འདིའི་ཚིག་འགྲེལ་རྒྱོབ?
ལན=འདི་ལྟར་གང་གི་ཕྱིར་ཇི་སྙེད་པའི་དངོས་པོ་འདི་ཀུན་རང་གྲུབ་ཙམ་ནས་ཐ་སྙད་ཀྱི་ཆོས་ཉིད་དམ་རང་བཞིན་གྱིས་རང་རང་སོ་སོའི་ཐུན་མིན་མ་འདྲེས་པའི་ངོ་བོ་ལ་གནས་པའི་ཕྱིར། རང་དང་རིགས་མཐུན་པའི་དངོས་པོ་ཕལ་དང་རིགས་མི་མཐུན་པ་གཞན་གྱི་དངོས་པོ་མཐའ་དག་ལས་ལྡོག་པ་ལ་ནི་བརྟེན་པ་ཅན་ཏེ། གཞན་གང་དང་ཡང་མ་འདྲེས་པ་དེ་ལྟ་བུའི་ངང་ཚུལ་དང་ལྡན་པ་ཡིན་ནོ།། །།
༢༨༽བུམ་པ་རྟོགས་པའི་མངོན་སུམ་གྱིས་དེའི་བྱས་མི་རྟག་ཀྱང་མཐོང་ན་ བུམ་པ་མི་རྟག་པར་སྒྲུབ་པའི་རྗེས་དཔག་དགོས་མེད་དུ་འགྱུར་རོ་ ཞེས་པའི་ལན་དང་ཕྱི་ནང་གི་འཁྲུལ་པའི་རྒྱུ་ཡང་ངོས་ཟུངས?
ལན=འདི་ལྟར་བུམ་པ་མཐོང་བ་ན་དེའི་སྟེང་གི་བྱས་མི་རྟག་སོགས་དེ་དང་ངོ་བོ་གཅིག་པ་ཀུན་མཐོང་བ་ཡིན་ཡང་། གཟུགས་དཀར་བ་ལ་སོགས་པ་ཆོས་མཐུན་པ་མཐོང་བ་ཡི་རྒྱུ་མཚན་ལས། ཉ་ཕྱིས་ལ་དངུལ་ཡིན་པའི་རྣམ་པ་སྣང་བ་ལྟར། གལ་ཏེ་གཟུགས་མཐོང་བ་ན་འདྲ་བ་གཞན་འབྱུང་བ་སོགས་འཁྲུལ་པའི་རྒྱུ་མཚན་གྱིས་མི་རྟག་པར་མ་ངེས་ཤིང་། དངོས་པོ་དེ་ལ་མེད་པའི་ཡོན་ཏན་གཞན་རྟག་པ་སོགས་སུ་སྦྱོར་བའམ་སྒྲ་འདོགས་པར་མི་བྱེད་པ་ཞིག་ན་ཁྱེད་བདེན་ཡང་། འཁྲུལ་རྒྱུས་བསླད་ནས་ཕྱིནཅི་ལོག་རྟག་འཛིན་སོགས་སྲིད་པའི་ཕྱིར་རྟགས་ཀྱིས་བསྒྲུབ་པ་མི་དགོས་པར་མི་འགྱུར་རོ།།
ལེགས་བཤད་སྣང་བའི་གཏེར་ལས།
གཟུགས་ཆོས་མཐུན་པ་མཐོང་བ་ལས།། ཉ་ཕྱིས་ལ་དངུལ་རྣམ་པ་ལྟར།།
གལ་ཏེ་འཁྲུལ་བའི་རྒྱུ་མཚན་གྱིས།། ཡོན་ཏན་གཞན་སྦྱོར་མི་བྱེད་ན།།
ཞེས་སོ།།
ཕྱི་ནང་གི་འཁྲུལ་པའི་རྒྱུ་ནི། ཕྱི་རོལ་གྱི་དོན་འདྲ་བ་བར་མ་ཆད་དུ་བྱུང་བ་དང་། ནང་གི་བློ་མི་གསལ་ཞིང་གྲུབ་མཐའ་ངན་པས་བསླད་པ་སོགས་ཕྱི་ནང་གི་འཁྲུལ་རྒྱུས་གེགས་བྱས་ཏེ་ལོག་པར་འཛིན་པ་ཡིན་ནོ།།
༢༩༽སྒྲ་ཏོག་ཡུལ་ལ་སྒྲུབ་པའི་སྒོ་ནས་འཇུག་ན་སྒྲ་བློ་རྣམ་གྲངས་ཐལ་ཚུལ་ཇི་ལྟར་ཡིན?
ལན=ལེགས་བཤད་སྣང་བའི་གཏེར་ལས།
གཞན་དུ་དངོས་པ་གཅིག་པུ་པ།། སྒྲ་འམ་བློ་གཅིག་གིས་ཁྱབ་ན།།
གཞན་ཡུལ་མ་ཡིན་དེ་ཡི་ཕྱིར།། རྣམ་གྲངས་པ་ནི་ཉིད་དུ་འགྱུར།།
ཞེས་གཞན་དུ་བསལ་བྱ་ཐ་དད་མིན་ན་བྱས་མི་རྟག་སོགས་ཀྱི་དངོས་པོ་གཅིག་པུ་པ་སྟེ་སྒྲ་རང་མཚན་གྱི་སྟེང་ན་ཆ་ཤས་མེད་པ་གཅིག་པུ་དེ་ཉིད་དེ་རྗོད་ཀྱི་སྒྲའམ་དེ་ཤེས་ཀྱི་བློ་གཅིག་གིས་སྒྲུབ་པས་འཇུག་པའི་ཚུལ་གྱིས་ཁྱབ་པར་གཅོད་ན། སྒྲ་བློ་དེ་དག་གཞན་དང་གཞན་གྱི་ཡུལ་ཅན་ནམ་ཡུལ་ཐ་དད་ལ་འཇུག་པ་མ་ཡིན་པ་དེ་ཡི་ཕྱིར། བྱས་མི་རྟག་སོགས་ཀྱི་སྒྲ་བློ་ལ་གོ་བྱ་ཐ་དད་མེད་པར་རྣམ་གྲངསད་པ་ནི་ཉིད་དུ་འགྱུར་ཏེ། གང་བརྗོད་ཀྱང་ཐམས་ཅད་ཀྱིས་ཐམས་ཅད་གོ་བ་ལ་ཁྱད་མེད་པའི་ཕྱིར་རོ།། །།
༣༠༽གཞུང་འདིར་མངོན་སུམ་གྱིས་མྱོང་བ་ལ་ངེས་པ་འདྲེན་ནུས་པའི་མཐུན་རྐྱེན་ག་ཚོད་གསུངས་འདུག་གོ་དོན་དང་བཅས་བྲིས?
ལན=མཐུན་རྐྱེན་ལྔ་ཡོད་དེ། ནང་གི་བློ་གསལ་བ་དང་། གོམས་པ་དང་། སྐབས་སུ་བབ་པ་དང་། དོན་དུ་གཉེར་བ་དང་། དོན་གྱི་ཤུགས་ལ་སོགས་པ་ངེས་པ་འདྲེན་ནུས་པའི་མཐུན་རྐྱེན་ནོ།།
ནང་གི་བློ་གསལ་བ་ནི=རྣམ་འབྱོར་པ་རྣམས་ཀྱི་བློ་གསལ་བས་མཐོང་བ་ཙམ་གྱི་སྐད་ཅིག་མ་ལ་སོགས་པར་ངེས་པ་ལྟ་བུའོ།།
གོམས་པ་ནི=ངེས་པར་བྱ་བའི་དོན་ལ་གོམས་པར་གྱུར་པས་དོན་གང་མཐོང་བ་ལ་བློ་གཏད་པ་ཙམ་གྱིས་བདེ་བླག་ཏུ་ངེས་པ་འདྲེན་པ་ནུས་པའོ།།
སྐབས་སྐབས་སུ་བབ་པ་ནི=དཔེར་ན་སྨན་ལ་སོགས་པའི་གཏན་གྱི་སྐབས་སུ་བབ་པ་ན། སྨན་དེ་མཐོང་བ་ན་སྐྱེས་བུ་དེ་ལ་ཆོས་གཞན་དུ་མ་ཡོད་དུ་ཟིན་ཀྱང་སྨན་པ་ཉིད་དུ་ངེས་པ་ལྟ་བུའོ།།
དོན་དུ་གཉེར་བ་ནི=མི་མང་པོའི་ཁྲོད་ནས་གཅིག་ཡོད་མེད་ལ་ཆེད་དུ་ཡིད་གཏད་ན་དེ་མཐོང་བ་ཙམ་གྱིས་ཡོད་པར་ངེས་ལ། གཞན་དབང་མངོན་ལ་སྣང་དུ་ཟིན་ཀྱང་རྗེས་སུ་ཡོད་མེད་མ་ངེས་པ་ལྟ་བུའོ།།
དོན་གྱི་ཤུགས་ནི=ལྟད་མོ་སྣ་ཚོགས་པའི་ནང་ནས་ཡ་མཚན་པ་དང་ཉེ་ཞིང་གསལ་བ་པོར་མཐོང་བ་དག་བྱེ་བྲག་ཏུ་ངེས་པ་ལ་སོགས་པ་བཞིན་ནོ།། །།
༣༡༽ཆོས་ཅན་བརྗོད་པའི་སྒྲ་དང་ཆོས་བརྗོད་པའི་སྒྲའི་ཁྱད་པར་དཔེ་དང་བཅས་ཁོད?
ལན=ཁྱད་གཞིའི་དེའི་ཁྱད་པར་གྱི་ཆོས་གཞན་མི་སྤོང་བར་ཁྱད་གཞི་འདི་བརྗོད་པའི་སྒྲ་དེ་ཁྱད་གཞི་དེ་ལ་ལྟོས་ནས་ཆོས་ཅན་བརྗོད་པའི་སྒྲ་སྟེ། དཔེར་ན་སྒྲ་ཞེས་བརྗོད་པའི་སྒྲ་ལྟ་བུའོ།། ཁྱད་གཞིའི་དེའི་ཁྱད་པར་གྱི་ཆོས་གཞན་རྣམས་སྤངས་ནས་ཁྱད་གཞི་དེའི་ཁྱད་ཆོས་འགའ་གཞི་བརྗོད་པའི་སྒྲ་དེ་ཁྱད་གཞི་དེ་ལ་ལྟོེས་ནས་ཆོས་བརྗོད་པའི་སྒྲ་སྟེ། དཔེར་ན་སྒྲ་མི་རྟག་པ་ཞེས་བརྗོད་པའི་སྒྲ་ལྟ་བུའོ། ། །།
༣༢༽ཚད་མ་ཀུན་བཏུས་ལས། རང་དབང་མེད་ཕྱི་དེ་ལྡན་མིན།། བཏགས་པའི་ཕྱི་དང་མི་སྲིད་ཕྱིར།། འབངས་ལ་རྒྱལ་པོ་བཏགས་པ་བཞིན།། ཞེས་པའི་གཞུང་དོན་ཇི་ལྟར་འགྲེལ་འདུག?
ལན=བ་ལང་གི་སྒྲས་དངོས་ཀྱི་བརྗོད་བྱ་བ་ལང་གི་སྤྱི་རྟག་དངོས་ཡིན་ན། དེ་ལྡན་གསལ་བ་རྫས་ཐ་དད་ལ་སྒྲ་དེ་རང་དབང་གིས་མི་འཇུག་སྟེ། ཀ་བའི་མིང་བུམ་པ་ལ་མི་འཇུག་པ་བཞིན། དེས་ན་སྤྱི་བརྗོད་པའི་སྒྲས་དེ་ལྡན་གོ་བ་མིན་ལ། གཞན་ཡmmqqcv ང་བ་ལང་གི་མིང་བ་ལང་གི་གསལ་བ་རྣམས་ལ་བཏགས་པ་ཁོ་ནས་འཇུག་པར་ཐལ་བའི་ཕྱིར་དང་། དེ་ལྟ་ནའང་བཏགས་པ་དེ་དོན་མི་མཐུན་ཏེ། བརྗོད་བྱ་སྤྱི་རྟག་པ་དེ་དང་བ་ལང་གི་གསལ་བ་མི་རྟག་པ་གཉིས་གཞི་མཐུན་མི་སྲིད་པས་འབངས་ལ་རྒྱལ་པོར་བཏགས་པ་བཞིན་དོན་མེད་དོ།། ཞེས་སོ།། །།
༣༣༽རྩ་བར་ལས། གསལ་བ་རྣམས་ནི་རྗེས་མི་འགྲོ།།རྗེས་འགྲོ་གཞན་ནི་སྣང་བ་མེད།། ཅེས་གསུངས་པའི་སྐབས་སྤྱི་དངོས་པོ་བ་དེ་གསལ་བ་རྣམས་དང་ངོ་བོ་གཅིག་དང་ཐ་དད་གང་དུའང་མ་གྲུབ་པའི་ཚུལ་ཇི་ལྟར་བཀོད་འདུག?
ལན=འདི་ལྟར་གསལ་བ་རྣམས་ནི་རྗེས་སུ་མི་འགྲོ་བས་ན་དེ་སྤྱི་དང་གཅིག་མ་ཡིན་ལ། གསལ་བ་རྣམས་ལ་རྗེས་སུ་འགྲོ་བའི་སྤྱི་དོན་གཞན་པའམ་ཐ་དད་པ་ནི་མ་འཁྲུལ་པའི་བློ་ལ་སྣང་བ་མེད་པས་ན་དེ་ནི་དེ་ལྟར་སྒྲོ་བཏགས་པ་ཙམ་དུ་ཟད་པ་ཡིན་ནོ།།
༣༤༽རྣམ་ཤེས་ལ་སོགས་པའི་དཔེ་དང་སྨན་གྱི་དཔེའི་སྒོ་ནས་ ཐ་དད་གཅིག་གི་བློ་རྒྱུར་འཐད་ཚུལ་བྲིས”
ལན=ལེགས་བཤད་སྣང་བའི་གཏེར་ལས་ཀྱང་།།
་་་་དབང་པོ་ལ་སོགས་བཞིན།། དཔེར་སྨན་ཁ་ཅིག་ཐ་དད་ཀྱང་།།
ལྷན་ཅིག་པ་འམ་སོ་སོ་ཡིས།།། རིམས་ལ་སོགས་པ་ཞི་བྱེད་པར།།
མཐོང་གི་གཞན་གྱིས་མ་ཡིན་བཞིན།།
ཞེས་དཔེར་ན་དབང་པོ་དང་ལ་སོགས་པ་ཞེས་པ་ཡུལ་དང་ཡིད་བྱེད་དག་ངོ་བོ་ཐ་དད་ལ་སྤྱི་ཐུན་མོང་བ་འབྲས་བུ་སྐྱེད་ནུས་གཞན་དེལ་མེད་ཀྱང་དབང་ཤེས་གཅིག་སྐྱེད་པ་བཞིན་ཏེ། དཔེར་ན་སླེ་ཏྲེས་དང་པརྤ་ཏ་སོགས་སྨན་ཁ་ཅིག་ངོ་བོ་ཐ་དད་ཀྱང་། དེ་དག་ལྷན་ཅིག་སྤྱད་པར་གྱུར་པའམ། ཡུལ་དུས་ཐ་དད་པ་ཡིན་ཀྱང་རིམས་དེ་ཞི་བའི་བྱ་བ་གཅིག་པ་བྱེད་པ་མཐོང་གི་གཞན་གྱིས་མ་ཡིན་ནོ།། ཞེས་སོ།། །།
༣༥༽མེའི་དོན་སྤྱི་དེ་མེད་རང་མཚན་ཉིད་དུ་གྲུབ་པར་འདོད་ན་སྐྱོན་ཇི་ལྟར་གསུངས་འདུག?
ལན=རྩ་བར། སྣང་བ་གང་ཡིན་བརྟག་པ་ཡི།།
ཡན་ལག་མེད་ཕྱིར་དེ་ཉིད་མིན།། ཞེས་གཞུང་ལས་སྐྱོན་ཇི་ལྟར་གསུངས་འདུག་ཞེ་ན། དོན་སྤྱི་འཛིན་གྱི་སྣང་ཡུལ་མེ་ལྟ་བུ་དེ་ལ་འབྲས་བུ་དོན་གཉེར་གྱི་སྐྱེས་བུས་བཙོ་སྲེག་གི་དོན་བྱེད་ནུས་སོགས་སུ་བརྟག་པ་ཡི་ཡན་ལག་ཅུང་ཟད་ཀྱང་མེད་པའི་ཕྱིར་སྣང་བ་དེ་རང་མཚན་དེ་ཉིད་མིན་ནོ། གལ་ཏེ་ཡིན་ན་མེ་
སྣང་དེས་ཀྱང་གྲང་རེག་འགོག་པ་དང་། ལྷ་ཡུལ་གྱི་དོན་སྤྱི་སྣང་བས་ཀྱང་ལྷ་ཡུལ་མངོན་སུམ་མཐོང་བར་ཐལ་བའི་སྐྱོན་ཡོད་དོ།།
༣༦༽སྒྲ་མི་རྟག་རྟོགས་པའི་རྗེས་དཔག་དང་སྒྲ་རྟག་འཛིན་རྟོག་པ་གཉིས་འཁྲུལ་པར་འདྲ་ཡང་འཇུག་ཡུལ་རང་མཚན་འཐོབ་མི་འཐོབ་ཀྱི་ཁྱད་པར་དཔེ་དང་བཅས་ཁོད?
ལན=རྩ་བར། འཁྲུལ་པར་འདྲ་ཡང་གཞན་ལས་མིན།།
མར་མེའི་འོད་ལས་ནོར་བུ་བཞིན།། ཞེས་པ་ལྟར། དེས་ན་ཐ་སྙད་དོན་མི་མཐུན་གྱི་རྟོག་པ་ཐམས་ཅད་དོན་སྤྱི་ལ་ཡུལ་དུ་ཞེན་པས་འཁྲུལ་པར་འདྲ་ཡང་སྒྲ་རྟག་པ་ལ་སོགས་པའི་ཐ་སྙད་ཕྱིན་ཅི་ལོག་གཞན་ལས་དོན་ཡང་དེ་བཞིན་འཐོབ་པ་མིན་ཏེ། མར་མེའི་འོད་ལ་ནོར་བུར་འཁྲུལ་པ་ལས་ནོར་བུའི་ཕྱིར་རྒྱུག་ཀྱང་ནོར་བུ་མི་འཐོབ་པ་བཞིན་ནོ། །སྒྲ་མི་རྟག་པའི་ཐ་སྙད་ནི་དེ་ལ་ཞུགས་པ་ལྟར་དོན་ཡང་དེ་བཞིན་འཐོབ་པ་སྟེ་ནོར་བུའི་འདོ་ལ་ནོར་བུར་འཁྲུལ་ཡང་དེར་རྒྱུག་པས་ནོར་བུ་འཐོབ་པ་བཞིན་ནོ།། །།ཞེས་སོ།།
༣༧༽གཞི་མཐུན་ཞེས་པ་དོན་གྱི་སྟེང་ན་གྲུབ་ན་སྐྱོན་ཇི་ལྟར་ཡོད་པ་ངོས་བཟུང་ནས་བློ་རྟོག་པའི་ངོར་གཞི་མཐུན་གྲུབ་ཚུལ་ཡང་བྲིས?
ལན=དམ་པའི་དོན་དུ་གཞི་མཐུན་པ་ཞེས་སུ་མ་གྲུབ་སྟེ། མཐུན་རྒྱུ་གཉིས་དང་དེ་གཉིས་ཀ་ཡིན་པར་གྱུར་པའི་གཞི་གཅིག་དང་གསུམ་དུ་མ་ཕྱེ་ན་གཞི་མཐུན་དུ་བཞག་མི་ཤེས་ལ་དོན་གྱི་སྟེང་ན་ཆོས་གཉིས་སུ་ཡོད་ན་ཕན་ཚུན་ཡིན་པ་མི་སྲིད་ལ། མེད་ན་མཐུན་རྒྱུ་ཡང་མེད་པས་ན་བློ་ངོར་ལྡོག་པ་ཐ་དད་ཀྱི་རྣམ་པ་སྣང་བ་དེ་དག་དོན་གྱི་ངོ་བོར་སྣང་བའི་ལྡོག་པ་ལ་དབྱེར་མེད་པར་སྣང་བའི་སེལ་འཇུག་གི་དབང་གིས་དེ་ལྟ་བུའི་ཐ་སྙད་སྦྱར་པ་ཡིན་ནོ།། །།
༣༨༽བརྡ་འདོགས་པའི་ཡུལ་ལ་རང་མཚན་རྐྱང་པ་བརྗོད་བྱར་འདོད་པའི་ཕྱོགས་སྔའི་འདོད་པ་ངོས་བཟུང་ནས་དེ་ལ་དགག་པ་ཇི་ལྟར་མཛད་འདུག?
ལན=རྩ་བར། སྒྲ་རྣམས་ཀྱིས་ནི་བརྡར་བཏགས་སྟོན།།
དེ་ནི་ཐ་སྙད་ཆེད་དུ་བྱས།།
དེ་ཚེ་རང་གིས་མཚན་ཉིད་མདེ།།
དེས་ན་དེ་ལ་བརྡར་མ་ཡིན།།
ཞེས་མུ་སྟེགས་བརྡ་སྤྲོད་པས། མེ་བྱིན་ཅིག་ཅེས་ཟེར་ན་ཚ་ཞིང་སྲེག་པ་དེ་ལེན་པས་བརྡ་ནི་རང་མཚན་ཁོ་ན་ལ་སྦྱར་རོ་ཞེས་འདོད་པས་། དེ་ལ་དགག་པ་ཇི་ལྟར་མཛད་འདུག་ཞེ་ན་ཕྱིས་ཐ་སྙད་བྱེད་པ་དེ་ཚེ་སྔར་བརྡ་གདགས་པའི་དུས་ཀྱང་རང་གི་མཚན་ཉིད་ནི་འགག་ནས་མེད་པ་དེས་ན་རང་མཚན་དེ་ལ་བརྡར་བྱས་པ་མ་ཡིན་ཏེ། རང་མཚན་ཡུལ་དུས་རྣམ་པ་མ་འདྲེས་པའི་དངོས་པོ་ཡིན་ལ། བརྡ་ནི་དེ་འདྲའི་ངེས་པ་མེད་པར་རང་གི་བརྗོད་བྱ་ཐམས་ཅད་ལ་འཇུག་པའི་ཕྱིར་རོ།། །།
༣༩༽སྤྱི་ལྡན་རང་མཚན་བརྗོད་བྱར་འདོད་པའི་མུ་སྟེགས་གཅེར་བུ་པ་རྣམས་ཀྱིས་གསལ་བ་ཉིད་དངོས་སུ་བརྗོད་བྱར་མི་འདོད་པའི་སྒྲུབ་བྱེད་བཀོད་ནས་དེ་ལ་མགོ་མཚུངས་ཀྱི་རིགས་པ་ཇི་ལྟར་གཏོང་འདུག?
ལན=རྩ་བར། དེ་ལྡན་ནུས་པ་དེ་ཡང་ནི།།
ཅི་ཕྱིར་དངོས་སུ་སྦྱར་མི་བྱེད།།
གལ་ཏེ་མཐའ་ཡས་ཕྱིར་འདི་མཚུངས།། ཞེས་གསལ་བ་ཉིད་དངོས་སུ་བརྗོད་བྱར་མི་འདོད་པའི་སྒྲུབ་བྱེད་ནི་གསལ་བ་ནི་ཡུལ་དུས་རང་བཞིན་མཐའ་ཡས་པའི་ཕྱིར་བརྡ་སྦྱར་མི་ནུས་ལ། ཞེས་འདོད་དེ། དེ་ལ་མགོ་མཚུངས་ཀྱི་རིགས་པ་ནི། མཐའ་ཡས་པ་འདི་སྤྱི་ལྡན་ལའང་མཚུངས་ཏེ་མཐའ་ཡས་པའི་གསལ་བ་རེ་རེ་བཞིན་སྤྱི་ལྡན་ཡིན་པས་སྤྱི་ལྡན་གསལ་བ་བརྡ་ཡུལ་དེ་མཐའ་ཡས་པ་སོ་ན་གནས་ཏེ་རིགས་ཀྱིས་གསལ་བ་ཉུང་དུ་བཏང་བ་ནི་གང་ཡང་མེད་དོ།། དེ་ལྟར་གཏོང་འདུག་གོ། །།
༤༠༽སྤྱི་འཛིན་ཤེས་པ་ལ་རང་མཚན་དངོས་སུ་སྣང་ན་སྐྱོན་ཇི་ལྟར་ཡོད?
ལན=སྤྱི་འཛིན་ཤེས་པ་ལ་རང་མཚན་དངོས་སུ་སྣང་ན།
རྣམ་འགྲེལ་ལས།
བསྒྲུབ་བྱ་སྒྲུབ་པར་རྟོག་པ་ལ།།
དངོས་པོ་མཐོང་བ་ཉམས་པའི་ཕྱིར།། ཞེས་དང་། སྒྲ་ཡོད་མ་ཡིན་རྟོག་པ་ཡང་།།
སྤྱི་ཉིད་དུ་ནི་འཇུག་ཕྱིར་རོ།། ཞེས་གསུངས་པ་ལྟར་སྤྱི་འཛིན་གྱི་ཤེས་པ་ལ་རང་མཚན་དངོས་སུ་སྣང་ན་སྒྲ་དང་རྟོག་པ་གཞན་རྣམ་པར་བཅད་པའི་སྤྱི་ཉིད་དུ་འཇུག་པ་མིན་པ་ཐལ་བ་དང་། གཞན་ཡང་སྤྱི་འཛིན་གྱི་བློ་དེ་རང་མཚན་སྣང་བའི་སྒོ་ནས་འཇུག་པས་སྒྲིབ་འཇུག་ཡིན་པར་ཐལ་བ་དང་། སྤྱི་འཛིན་གྱི་བློ་དེས་བསྒྲུབ་བྱའི་ཆོས་ལ་སྒྲུབ་འཇུག་ཡིན་པས་དེ་གཅིག་ངེས་པས་དེ་དང་ངོ་བོ་གཅིག་པའི་ཆོས་ཐམས་ཅད་ངེས་པར་འགྱུར་བ་དང་། སྒྲོ་བློ་རྣམ་གྲངས་པར་ཐལ་བ་སོགས་སྐྱོན་དུ་མ་ཡོད་དོ།། །།
༤༡༽གཞན་སེལ་གྱི་མཚན་ཉིད་དང་དབྱེ་བ་མཚན་གཞི་བཅས་བྲིས?
ལན=གཞན་སེལ་གྱི་མཚན་ཉིད་ནི། ཚད་མ་རིགས་གཏེར་ལྟར་ན། དངོས་འགལ་བཅད་པའི་སྒོ་ནས་ཡུལ་འདིར་སྣང་བའི་སྒྲོ་བཏགས་པའོ།།
དབྱེ་ན། དངོས་པོ་ལ་བརྟེན་པའི་གཞན་སེལ་མཚན་གཞི་ནི་རྗེས་དཔག་གི་དངོས་ཡུལ་དུ་གྱུར་པའི་བསྒྲུབ་བྱའི་དོན་སྤྱི་ལྟ་བུའོ།། དངོས་མེད་ལ་བརྟེན་པའི་གཞན་སེལ་ནི་དགག་བྱ་ཤེས་བྱ་ལ་ཡོད་པ་བུམ་མེད་ཀྱི་གཞན་སེལ་ལྟ་བུའོ།། གཉིས་ཀ་ལ་བརྟེན་པའི་གཞན་སེལ་ནི་དཔེར་ན་ཤེས་བྱ་ཞེས་པའི་སྒྲས་ཤེས་བྱ་མ་ཡིན་པར་བཅད་པ་ལ་བཞག་པ་ཡིན།
ཡང་ན་མེད་དགག་གི་གཞན་སེལ་དང་ མ་ཡིན་དགག་གི་གཞན་སེལ་ལོ།།
༤༢༽སྤྱི་བློ་ཁྱད་པར་གསུམ་ལྡན་ཞེས་པའི་ཁྱད་པར་གསུམ་ངོས་བཟུང་ནས་བུམ་པ་ཞེས་པའི་སྒྲས་བུམ་པ་རང་མཚན་དངོས་ཀྱི་བརྗོད་བྱར་མི་བྱེད་ཀྱང་བུམ་པའི་རང་མཚན་ལ་མི་བསླུ་བ་ཡིན་ཚུལ་བྲིས?
ལན=སྣང་བརྟག་གཅིག་ཏུ་བསྲེས་ནས་ལྷག་པར་ཞེན་པ་ནི་ཁྱད་པར་དང་པོ་དང་། རང་མཚན་མཐོང་གོམས་ཀྱི་བག་ཆགས་ལས་བྱུང་བ་ནི་ཁྱད་པར་གཉིས་པ་དང་། རང་མཚན་ལྟར་ཞེན་ནའང་དོན་རང་མཚན་གྱི་དངོས་པོར་གྱུར་པ་ཅུང་ཟད་ཀྱང་མེད་པའི་རྟོག་སྣང་ཙམ་སྟེ་དེ་ལྟར་བློ་ཁྱད་པར་གསུམ་ལྡན་ནོ།།
མདོར་ན་བུམ་སྒྲས་བུམ་མིན་རྣམ་པར་བཅད་པས་བུམ་པ་པ་ཡོངས་གཅོད་དུ་བློ་ཡུལ་ལ་གྲུབ་པར་བྱས་པ་ལྟ་བུའི་རྒྱུ་མཚན་དེ་གཉིས་ཀྱིས་ནི། དོན་རང་མཚན་ལ་མི་སླུ་བ་དེས་དེ་མི་འཁྲུལ་བར་གོ་ནུས་པ་ཡོད་པར་འདོད་དོ།། །།
༤༣༽སྤྱི་འཛིན་གྱི་བློ་ཡིན་ན་རང་མཚན་དངོས་སུ་མཐོང་གོམས་ཀྱི་བག་ཆགས་ལས་བྱུང་བས་ཁྱབ་དང་མི་ཁྱབ་རྒྱུ་མཚན་བཅས་ཁོད?
ལན=སྤྱི་འཛིན་གྱི་བློ་ཡིན་ན་རང་མཚན་དངོས་སུ་མཐོང་གོམས་ཀྱི་བག་ཆགས་ལས་བྱུང་བས་མི་ཁྱབ་སྟེ། སྒྲ་རྟག་འཛིན་གྱི་འདོགས་དང་དངོས་མེད་འཛིན་པའི་རྟོག་པ་རྣམས་སྤྱི་འཛིན་གྱི་བློ་ཡིན་ཡང་སྤྱི་བློ་ཁྱད་པར་གསུམ་ལྡན་མིན་པས་རང་མཚན་མཐོང་གོམས་ལས་འབྱུང་བ་མིན་ནོ།། །།
༤༤༽གལ་ཏེ་ཤུག་པའི་ཤིང་གི་སྟེང་དུ་ཤིང་མ་ཡིན་པ་ལས་ལོག་པ་དེ་ཤུག་པ་རང་དང་རྫས་ཐ་དད་དུ་གྲུབ་ན་སྐྱོན་ཇི་ལྟར་གསུངས་འདུག་?
ལན=ཤུག་པའི་སྟེང་ན་ཤིང་མིན་ལས་ཐ་དད་པ་དེ་དངོས་པོར་ཡོད་དུ་ཆུག་ཀྱང་ཤུག་པའི་དངོས་པོ་ནི་ཤིང་མིན་ལས་ལོག་པའམ་ཤིང་མིན་ལས་ཐ་དད་པ་མིན་པའི་ཕྱིར་ཤུག་པ་ཤིང་མིན་པར་འགྱུར་རོ་ཞེས་པའི་སྐྱོན་ཡོད་དོ།། །།
༤༥༽མི་ཕམ་རིན་པོ་ཆེ་རང་ཉིད་ཀྱིས་དོན་རང་མཚན་གྱི་གཞན་སེལ་ཁས་ལེན་དང་མི་ལེན་སྒྲུབ་བྱེད་དང་བཅས་བྲིས?
ལན=མི་ཕན་རིན་པོ་ཆེས་དོན་རང་མཚན་གྱི་གཞན་སེལ་ཁས་ལེན་ཏེ། སྔོན་པོ་ཡིན་པ་ཙམ་གྱིས་སྔོ་མིན་སེལ་བ་ནི་དོན་ལ་ཐ་དད་མེད་པར་གནས་པའི་འབྲས་མེ་ཤེས་པ་ཡིན་པས་དོན་རང་མཚན་གྱི་གཞན་སེལ་འཇུག་ཡོད་སྨྲ་བའི་ཕྱོགས་འདི་སེལ་འཇུག་གི་ཐ་སྙད་སྨྲ་བའི་སྐབས་སུ་ཁས་མི་ལེན་པར་འོད་མེད་ཀྱིས་གྲུབ་པའི་ཕྱིར་དེའི་ཕྱོགས་འཛིན་པར་བྱའོ་ཞེས་མི་ཕམ་རིན་པོ་ཆེའི་གསུངས་སོ།། །།
༤༦༽སྤྱི་གསལ་རྫས་གཅིག་དང་ཐ་དད་དུ་འདོད་པ་ལ་གཞི་མཐུན་མི་འཐད་པའི་ཚུལ་བྲིས?
ལན=དང་པོ་གྲངས་ཅན་པ་སྤྱི་གསལ་གཅིག་ཏུ་འདོད་པ་ལ་བརྗོད་པ། སྤྱི་གསལ་དབྱེར་མེད་པར་དངོས་པོའི་ངོ་བོ་གཅིག་བུ་ཆ་མེད་པ་ཉིད་ཀྱི་ཕྱིར། ཨུཏྤལ་དང་སྔོན་པོ་ལ་སོགས་པའི་ངོ་བོ་སོགས་པའི་ངོ་བོ་ཐ་དད་པའི་བློ་དེ་ནི་ཡུལ་གང་ལས་ཡིན་ཏེ། རྒྱུ་མེད་པར་ཐལ་བ་དང་། བྱེ་བྲག་པ་ལྟར་སྤྱི་གསལ་ཐ་དད་དུ་འདོད་ནས་སྔོན་པོ་དང་ཨུཏྤལ་གྱི་སྤྱི་ཐ་དད་པ་ཤིང་ལ་བྱ་གནས་པ་ལྟར་འགྱུར་བས་ཆོས་ཅན་གཅིག་ལ་སྔོན་པོ་ཡང་ཡིན་ལ་ཨུཏྤ་ལ་ཡང་ཡིན་པ་དབྱེར་མེད་པའི་ཐ་སྙད་དག་ཀྱང་རྒྱུ་མེད་པར་འགྱུར་ཏེ། ཀ་བུམ་གཞི་མཐུན་མི་སྲིད་པ་བཞིན་ནོ།། །།
༤༧༽སྒྲ་བློས་བཟུང་བ་ན་དེ་དང་ཐ་མི་དད་པའི་ཆོས་ཀུན་གཟུང་བས་ཁྱབ་དང་མི་ཁྱབ་རྒྱུ་མཚན་དང་བཅས་ཁོདཨ
ལན=སྒྲ་བློ་གསལ་འཇུག་ཡིན་པས་དེས་བཟུང་བ་ན་དེ་དང་ངོ་བོ་གཅིག་པའི་ཆོས་ཀུན་གཟུང་མི་དགོས། དཔེར་ན་སྒྲ་འཛིན་རྟོག་པས་སྒྲ་འཛིན་ཡང་རང་དང་ངོ་བོ་གཅིག་པའི་ཆོས་མི་རྟག་སོགས་མ་གཟུང་བ་བཞིན་ནོ། ། །།
༤༨༽རང་མཚན་གསལ་བ་རྣམས་བརྡ་སྦྱར་ན་སྐྱོན་ཇི་ལྟར་གསུངས་འདུག?
ལན=རང་མཚན་གསལ་བ་རྣམས་ལ་བརྡ་སྦྱར་ན་དངོས་པོ་ཀུན་ནི་གཞན་དང་མ་འདྲེས་པར་རང་རང་གི་ངོ་བོ་ཐུན་མིན་ལ་གནས་པའི་ཕྱིར་བ་ལང་ཁྲ་བོ་ཡི་ནི་ངོ་བོ་གང་ཡིན་པ་དེ་ནི་སེར་སྐྱ་ལ་ཡོད་པ་མིན་པས་ན་བ་ལང་ཞེས་པའི་སྒྲ་གཅིག་གིས་དེ་གཉིས་ཀ་གོ་བར་མི་རུང་པས། བཞོ་བཀལ་སོགས་ཀྱི་དོན་བྱེད་པའི་དངོས་པོ་ལ་འཇུག་པའི་ཕྱིར་བ་ལང་ཞེས་པའི་བརྡ་སྦྱར་བ་དགོས་པ་མེད་པར་འགྱུར་རོ་ཞེས་པའི་སྐྱོན་ཡོད་དོ།།
གཞུང་ལས། དངོས་པོ་ལ་མིན་དངོས་པོ་ཀུན།། རང་རང་ངོ་བོ་ལ་གནས་ཕྱིར།།
ཁྲ་བོ་ཡི་ནི་ངོ་བོ་གང་།། དེ་ནི་སེར་སྐྱ་ལ་ཡོད་མིན།། ཞེས་སོ།། །།
༤༩༽སྒྲའི་འཇུག་པ་ཡན་ལག་བཞི་ལྡན་ངོས་བཟུང་ནས་རྒྱུ་དགག་པའི་སྒོ་ནས་སྟོན་པ་ཡིན་ན་དགག་ཚིག་དངོས་སུ་ཡོད་པས་ཁྱབ་མི་ཁྱབ་རྒྱུ་མཚན་བཅས་བྲིས?
ལན=སྒྲའི་འཇུག་པ་ཡན་ལག་བཞི་ལྡན་ནི། འབྲས་བུ་སྒྲུབ་པ། རྒྱུ་སྒྲུབ་པ། འབྲས་བུ་དགག་པ། རྒྱུ་དགགཔའོ།། རྒྱུ་དགག་པའི་སྒོ་ནས་སྟོན་པ་ཡིན་ན་དགག་ཚིག་དངོས་སུ་ཡོད་པས་མི་ཁྱབ་སྟེ། རྩོལ་བྱུང་མིན་པ་ཞེས་པས་སྐྱེས་བུའི་རྩོལ་བའི་རྒྱུ་མེད་པ་གློག་སོགས་གཞན་ཀུན་བརྗོད་ཅིང་། དེ་བཞིན་དུ་ཆུ་ལས་མ་སྐྱེས་པ། བདག་པོ་མེད་པ། མགོན་མེད་པ། མི་སྟོན་པ་རྣམས་ཀྱང་ཕན་འདོགས་པའི་རྒྱུ་དེ་དག་མེད་པ་ཅན་མཚོན་པ་ཡིན་ལ། མ་སྐྱེས་པ་དང་སྟོང་པ་ཉིད་ཀྱང་རྒྱུ་དགག་པར་གསུངས་སོ།། །།
༥༠༽མཁར་གཞོང་ལ་རྒྱ་ཤུག་ལྟར་གསལ་བ་རྣམས་ལ་སྤྱི་རྟེན་པར་འདོད་ན་སྐྱོན་ཇི་ལྟར་ཡོད?
ལན=གཞུང་ལས། རྟག་པ་ཕན་འདོགས་མེད་པའི་ཕྱིར།། རྟེན་མིན་ལྷུང་པའི་ཚུལ་ཅན་གྱི།།
རྒྱ་ཤུག་སོགས་པའང་དེ་ཡི་ཡུལ།། སྐྱེད་པ་མཁར་གཞོང་སོགས་པས་ནུས།།
དེ་ཡང་དེ་ལ་མི་སྲིད་དོ། །
ཞེས་པ་ལྟར། དཔེ་མི་མཚུངས་ཏེ། ཇི་ལྟར་ན་རྒྱ་ཤུག་མཁར་གཞོང་ལ་རྟེན་པའི་ཕྱིར་ཕན་བཏགས་པ་མ་ཡིན་ཏེ། སྣོད་དེས་མ་བཟུང་ན་ཐུར་དེ་ལྷུང་བས་ཕན་མ་བཏགས་པ་མ་ཡིན་ནོ། ། རྟག་པ་ལ་ཕན་འདོགས་པ་མི་སྲིད་དེས། ཁྱེད་རང་རྣམས་ཀྱིས་བཞག་པའི་སྤྱི་རྟག་པ་ཡིན་པ་གང་ཞིང་དེ་ལ་་རྟེན་དང་བརྟེན་པ་མི་སྲིད་དེ་ཞེས་པའི་སྐྱོན་དེ་ལྟར་འཕངས་འདུག་གོ། །།
༥༡༽རིགས་སམ་སྤྱི་འདི་ནི་རང་མཚན་གྱི་གསལ་བྱར་འདོད་པ་ལ་སྐྱོན་ཇི་ཙམ་ཡོད་པ་ཡིན?
ལན=རིགས་སམ་སྤྱི་འདི་ནི་རང་མཚན་གྱི་གསལ་བྱར་འདོད་ན་སྐྱོན་གསུམ་ཡོད་དེ། རྟག་ལ་གསལ་བྱེད་ནམ་ཡང་མི་འཐད་པ་དང་། གསལ་བྱ་རིགས་སུ་འདོད་པ་ཧ་ཅང་ཐལ་བ་དང་། སྔོན་མེད་གསལ་བར་རིགས་ཀྱིས་མ་ཁྱབ་པའི་སྐྱོན་ཡོད་དོ།། །།
༥༢༽སྤྱི་རང་གི་རྟེན་རང་མཚན་ལས་གཞན་དུ་མ་ཁྱབ་པར་འདོད་པ་དང་རང་མཚན་ཡོད་མེད་ཀུན་ལ་ཁྱབ་པར་འདོད་མཁན་སུ་ཡིན་ངོས་བཟུང་ནས་དེ་དག་གིས་ལུགས་དགག་ཚུལ་བཅས་བྲིས?
ལན=སྤྱི་རང་གི་རྟེན་རང་མཚན་ལས་གཞན་དུ་མ་ཁྱབ་པར་འདོད་པ་ནི་སློབ་མ་པེ་ཐར་ཡིན་པ་དང་། རང་མཚན་ཡོད་མེད་ཀུན་ལ་ཁྱབ་པར་འདོད་མཁན་ནི་བེ་ལུ་ཀ་ཡིན་ནོ།།
དང་པོ་པེ་ཐར་གྱི་ལུགས་དགག་ཚུལ་ནི། གཞུང་ལས། མི་འགྲོ་དེ་ན་ཡོད་པའམ་མིན།།
ཕྱིས་ཡོད་ཆ་དང་ལྡན་པའམ་མིན་།།
ཞེས་དེ་ལ་བརྗོད་པ་སྔར་བ་ལང་མེད་པའི་ཕྱོགས་སུ་བ་ལང་གསར་དུ་སྐྱེས་པ་ན་གསལ་བ་གཞན་ལ་ཡོད་པའི་སྤྱི་དེ་ནི་རང་གི་རྟེན་དེ་ལས་གཞན་དུ་མི་འགྲོ་བ་ལང་གསར་དུ་སྐྱེ་བའི་ཕྱོགས་དེ་ན་སྔར་ཡོད་པའང་མིན་ལ། གསལ་བ་གསར་དུ་བྱུང་བའི་ཕྱིས་ཡོད་པར་གྱུར་པའང་མིན་ཏེ་སྔར་ཡོད་རྟག་པ་ཡིན་པས་སོ་ཞེས་དེ་ལྟར་དགག་འདུག་གོ།
གཉིས་པ་བེ་ལུ་ཀ་ཡི་ལུགས་དགག་ཚུལ་ནི།
གཞུང་ལས། གལ་ཏེ་ཀུན་ན་རིགས་ཡོད་ན།།
གཅིག་ཏུ་གསལ་བས་དེ་གསལ་ཉིད།།
ཐ་དད་མེད་ཕྱིར་ཀུན་ཏུ་མཐོང་།། ཞེས་སྤྱི་རང་གི་རྟེན་གསལ་བ་ཡོད་པ་དང་མེད་པའི་ཕྱོགས་ཀུན་ན་རིགས་ཡོད་ན་ནི། ཡུལ་གཅིག་ཅིག་ཏུ་གསལ་བས་སྤྱི་དེ་གསལ་བར་བྱས་པ་ཉིད་ནི་སྤྱི་དེ་ལ་ཐ་དད་མེད་པའི་ཕྱིར་ཕྱོགས་ཀུན་ཏུ་ཁྱབ་པའི་སྤྱི་དེ་མཐོང་བར་ཐལ་ལོ་ཞེས་པའི་སྐྱོན་འདུག་གོ། །།
༥༣༽སྤྱི་དངོས་མེད་ཀྱང་སྒྲ་གཅིག་འཇུག་པར་འཐད་པའི་ཚུལ་མཚན་གཞི་གང་རུང་ཞིག་ལ་སྦྱར་ནས་བྲིས?
ལན=གཞུང་ལས། ཐ་དད་མེད་དོན་མེད་པར་ཡང་།།
འཚེད་པ་པོ་སོགས་བརྗོད་པ་ཡིན།།
སྤྱི་དངོས་པོ་མེད་ན་དུ་མ་ལ་སྒྲ་གཅིག་ཅི་སྟེ་འཇུག་ཅེ་ན། ཐ་དད་པ་མེད་པའི་དོན་ཅིག་སྤྱི་དངོས་པོ་བ་གཅིག་མེད་པར་ཡང་། སྐྱེས་བུ་དུ་མ་ལ་འབྲས་སོགས་བཙོ་བའི་བྱ་བ་བྱེད་པའི་ཆ་ནས་་འཚེད་པ་པོ་ཞེས་དང་། དེ་བཞིན་དུ་བྱ་བ་གཞན་དང་གཞན་ལ་བརྟེན་ནས་ཀློག་པ་པོ་སོགས་སྒྲ་གཅིག་བརྗོད་པ་ཡིན་ནོ།། ཞེས་སྦྱར་འདུག་གོ། །།
༥༤༽མུ་སྟེགས་པ་སྤྱི་སྨྲ་བས་སྤྱི་དོན་གྱི་སྟེང་ན་མེད་ན་འོ་ན་ཤིང་ཞེས་པའི་སྒྲ་ཆོས་ཅན། བ་ལང་སོགས་གཞན་ལ་ཡང་གོ་བ་ཐལ། ཤིང་དང་བ་ལང་སོགས་གཞན་སྤྱི་མེད་པར་འདྲ་བ་དང་རང་མཚན་ཐ་དད་ཕན་ཚུན་རྗེས་སུ་མི་འགྲོ་བ་ཡང་འདྲ་བའི་ཕྱིར། ཞེས་པའི་ལན་ཇི་ལྟར་མཛད་འདུག?
ལན=གཞུང་ལས། ཐ་དད་མཚུངས་པ་ཡིན་ན་རིགས།།
ཉེ་བ་གང་གིས་འགའ་ཞིག་ལ།།
རབ་འཇུག་གཞན་ལ་མིན་དེ་ཉིད།།
སྒྲ་དང་ཤེས་པའི་རྒྱུ་ཡིན་ནོ།། ཞེས་པའི་ལན་ནི་ཤུག་པ་དང་བ་ལང་གཅིག་ལ་གཅིག་མེད་པའི་ཐ་དད་པར་མཚུངས་པ་ཡིན་ནའང་ཤིང་མིན་བསལ་བའི་རིགས་ཉེ་བའམ་འདྲ་བ་གང་གིས་ཙནྡན་དང་ཤུག་པ་སོགས་འགའ་ཞིག་ལ་ཤིང་གི་སྒྲ་རབ་ཏུ་འཇུག་ལ། གཞལ་བ་ལང་མིན་པ་གཞན་སེལ་གྱིས་འདྲ་བར་སྣང་བ་དེ་ཙམ་ཞིག་ཉིད་དུ་མ་ལ་སྒྲ་གཅིག་འཇུག་པ་དང་དེར་ཤེས་པའི་རྒྱུ་ཡིན་ནོ།། ཞེས་ནང་པས་ལན་དེ་ལྟར་མཛད་འདུག་གོ། །།
༥༥༽དངོས་མེད་ལ་བརྟེན་པའི་གཞན་སེལ་གྱི་རྣམ་བཞག་གང་ཤེས་བྲིས?
ལན=གཞུང་ལས། དངོས་མེད་ངོ་བོ་མེད་པའི་ཕྱིར།།
ངོ་བོ་བརྗོད་པ་དཔྱད་བྱ་ཉིད།།
མ་ཡིན་སྒྲ་ནི་དེ་དག་ཉིད།།
རྣམ་གཅོད་རྗོད་པར་བྱེད་པར་གྲུབ།། ཞེས་དངོས་མེད་ལ་ཐ་སྙད་དུ་ཡང་རང་གི་ངོ་བོ་ཅུང་ཟད་ཀྱང་མེད་པའི་ཕྱིར་དེའི་ངོ་བོ་བརྗོད་པ་ཡིན་ནམ་མ་ཡིན་ཞེས་དཔྱད་པར་བྱ་བ་ཉིད་མ་ཡིན་ཡང་དེ་བརྗོད་ཀྱི་སྒྲ་ནི་དེ་དག་ཉིད་རྒྱུ་མཚན་གང་ལས་འཇུག་ན། དགག་བྱ་གཞན་རྣམ་པར་གཅོད་པ་ཙམ་རྗོད་པར་བྱེད་པར་གྲུབ་པ་ཡིན་ནོ།། དེས་ན་སྒྲས་འཕངས་པའམ་དགག་བྱ་བཅད་པ་ལས་དེར་རྟོག་པ་ཙམ་དུ་ཟད་དེ་ཡུལ་དང་དུས་གང་ན་ཆོས་གང་ཞིག་མེད་ཅེས་དགག་གཞི་གང་དུ་དགག་བྱ་བཅད་པའི་སྟོབས་ཙམ་ལས་འགྲུབ་ཀྱི་དངོས་མེད་ཅེས་རང་ཚུགས་ཐུབ་པ་གང་ཡང་མེད་དོ།། ཞེས་སོ།། །།
༥༦༽རང་བཞིན་རྟགས་ཀྱི་དབྱེ་བ་དང་དབྱེ་བ་དེའི་ཁྱད་པར་དཔེར་བརྗོད་དང་བཅས་བྲིས?
ལན=གཞུང་ལས། རང་བཞིན་ཁྱད་པར་བྱེ་བྲག་ལ། །
ལྟོས་པའམ་འོན་ཏེ་འབའ་ཞིག་པ།།
བསྒྲུབ་བྱ་སྒྲུབ་པའི་ཕྱིར་བརྗོད་དེ། །
འཇིག་ལ་འབྲས་དང་ཡོད་ཉིད་བཞིན།།
ཞེས་རང་བཞིན་རྟགས་ལ་དབྱེ་ན་གཉིས་ཡོད་དེ། རང་བཞིན་དག་པ་བ་དང་ལྟོས་པ་བ།
རང་བཞིན་དག་པ་བ་ནི། ཁྱད་ཆོས་གང་ཡང་མ་ལྟོས་པར་ངོ་བོ་ཙམ་རྟགས་སུ་བཀོད་པ་སྟེ། དཔེར་ན་སྒྲ་ཆོས་ཅན། མི་རྟག་སྟེ། བྱས་པ་ཡིན་པའི་ཕྱིར་རོ།།
ལྟོས་པ་བ་ནི། རང་གི་ཁྱད་པར་བྱེ་བྲག་ལ་ལྟོས་པ་ལྟ་བུ་སྟེ། དཔེར་ན། སྒྲ་ཆོས་ཅན། མི་རྟག་སྟེ། རྩོལ་བྱུང་ཡིན་པའི་ཕྱིར་ཞེས་པ་ལྟ་བུའོ།། །།
༥༧༽མུ་སྟེགས་གྲངས་ཅན་པས་སྤྱི་འམ་གཙོ་བོ་ཆོས་ཅན། ཡོད་དེ། རང་གི་གསལ་བ་རྣམས་ལ་རྗེས་སུ་འགྲོ་བའི་ཕྱིར། ཞེས་པ་ལ་ནང་པ་སངས་རྒྱས་པས་ལན་ཇི་ལྟར་མཛད་འདུག?
ལན=སློབ་དཔོན་ཕྱོགས་གླང་གིས། ཚད་མའི་ཡུལ་མི་ཤེས་པའི་ཕྱིར། །
གཙོ་དང་རྗེས་འགྲོ་རྗེས་འགྲོ་མིན།། ཞེས་སྐྱོན་བརྗོད་པར་མཛད་དེ་གཙོ་བོའི་རང་མཚན་སྒྲུབ་པར་འདོད་པ་ལ་ཡོད་པ་དེའི་ཐུན་མིན་དུ་འགྱུར་གྱི་རྗེས་འགྲོ་མེད་ལ། སྤྱི་མཚན་སྒྲོ་བཏགས་ཀྱི་སྤྱི་ཙམ་ནི་གྲུབ་ཀྱང་ཞེ་འདོད་ལ་མི་ཕན་པས་རྗེས་དཔག་གི་ཡུལ་སྤྱི་མཚན་ཡིན་པར་མ་ཤེས་པ་ཡིན་ནོ།། ཞེས་གསུངས་སོ།། །།
༥༨༽ཡོད་པའི་རྟགས་ཀྱི་སྒྲ་མི་རྟག་པར་འགྲུབ་པའི་སྦྱོར་བ་འདི་སྒྲ་ཇི་བཞིན་དང་ཇི་བཞིན་མ་ཡིན་པའི་ཁྱད་པར་བཞེད་ཚུལ་ཇི་ལྟར་འདུག?
ལན=བདག་མེད་དང་ནམ་མཁའ་ལ་སོགས་པ་དང་ལྡོག་པའི་རྣམ་པ་ཐ་སྙད་དུ་མེད་པར་ཁས་ལེན་མི་ནུས་པ་ཇི་སྙེད་པ་འཕངས་ནས་ཡོད་པ་ལ་མི་རྟག་པས་མ་ཁྱབ་པར་བོད་ཕྱི་རབས་ཀྱི་མཁས་པ་དག་བཞེད་ལ། བོད་ལྔ་རབས་ཀྱི་མཁས་པ་ཕལ་ཆེ་བས་ནི་གཞུང་སྒྲ་ཇི་བཞིན་དུ་ཞལ་བཞེས་མཛད་དོ།། །།
༥༩༽གཙོ་བོ་ཡོད་པར་རྟགས་གང་གིས་ཀྱང་བསྒྲུབ་མི་ནུས་པའི་ཚུལ་བྲིས?
ལན=གཞུང་ལས། མ་གྲུབ་པ་ལ་ཡོད་ཆོས་མེད།།
ཞེས་གཙོ་བོ་ཡོད་པར་རྟགས་གང་གིས་ཀྱང་སྒྲུབ་མི་ནུས་ཏེ། གཙོ་བོའི་ངོ་བོ་མ་གྲུབ་པ་ལ་ཡོད་པ་སྟེ་དངོས་པོའི་ཆོས་སུ་གཏོགས་པ་ཇི་བཀོད་ཀྱང་དེ་ལ་གྲུབ་པ་མེད་དེ་མོ་གཤམ་གྱི་བུ་ཡོད་པའི་སྒྲུབ་བྱེད་དུ་དོན་བྱེད་ནུས་པའམ་དཀར་པོ་ཡིན་པ་སོགས་བཀོད་པ་བཞིན་ནོ།། །།
༦༠༽སྒྲ་ཆོས་ཅན། མི་རྟག་པ་ཡིན་ཏེ། འཇིག་རྒྱུ་གཞན་ལ་ལྟོས་པའི་ཕྱིར། ཞེས་པའི་རྟགས་འདི་ཡང་དག་ལྟར་སྣང་གང་ཡིན་རྒྱུ་མཚན་དང་བཅས་བྲིས?
ལན=རྟགས་ལྟར་སྣང་ཡིན་ཏེ། གཞུང་ལས། རྒྱུ་མེད་ཕྱིར་ན་འཇིག་པ་ནི།།
རང་གི་ངོ་བོས་རྗེས་འབྲེལ་ཉིད།། ཞེས་མི་རྟག་པ་ཡིན་ན་འཇིག་རྒྱུ་གཞན་ལ་མི་ལྟོས་ཏེ། སྒྲ་རང་ཉིད་སྐྱེད་བྱེད་ཀྱི་རྒྱུ་དེ་ལས་གཞན་པའི་འཇིག་རྒྱུ་ལ་ལྟོས་པ་མེད་པའི་ཕྱིར་ན་སྒྲའི་འཇིག་པ་ནི་དངོས་པོ་དེ་གྲུབ་ཙམ་ནས་རང་གི་ངོ་བོས་རྗེས་སུ་འབྲེལ་བ་ཉིད་ཡིན་ཏེ་མེའི་ཚ་བ་བཞིན་ནོ།། །།
༦༡༽བསྟན་བཅོས་སྐབས་དང་འབྲེལ་མེད་དང་།། དོན་རྣམས་དབང་པོ་ལས་འདས་པ།། རྟགས་མེད་པ་ཅན་དེ་རྣམས་ནི།། མི་དམིགས་ཕྱིར་ན་ཇི་ལྟར་མེད།། ཅེས་པའི་སྐབས་ཀྱི་བསྟན་དོན་མ་ནོར་བར་བྲིས?
ལན=དེས་ན་མདུན་འདིར་ཤ་ཟ་མེད་ངེས་སུ་སྒྲུབ་པ་ལ་འཇལ་བྱེད་ཀྱི་ལུང་དཔྱད་གསུམ་གྱིས་དག་པའི་བསྟན་བཅོས་ཀྱི་སྐབས་དང་འབྲེལ་བ་མེད་ནས་ལུང་གིས་སྒྲུབ་མི་ནུས་པ་དང་བསྐལ་བའི་དོན་དེ་རྣམས་བསྐལ་དོན་དུ་སོང་བ་དེའི་དབང་པོ་ཡི་ཡུལ་ལས་འདས་པ་ཡིན་པས་མངོན་སུམ་གྱིས་འཇལ་མི་ནུས་ལ། བསྐལ་དོན་དེ་མེད་པའི་རྟགས་ཡང་དག་ཏུ་གྱུར་པའམ་གང་ཟག་དེའི་ངོར་གནས་སྐབས་དེར་མེད་པ་ཅན་དུ་གྱུར་པ་ཤ་ཟ་ལ་སོགས་པ་དེ་རྣམས་ནི། བསྐལ་དོན་དུ་སོང་བ་ཅན་དེས་ཡོད་པར་མ་དམིགས་ཀྱང་དེས་མི་དམིགས་པ་ཙམ་གྱི་ཕྱིར་ན་ཇི་ལྟར་མེད་ངེས་སུ་སྒྲུབ་ནུས་ཏེ་མི་ནུས་སོ།། །།
༦༢༽མ་དམིགས་གཉིས་བཤད་དེ་ལ་རྩོད་པ་སྤང་།། ཞེས་པའི་རྩོད་སྤང་ལ་ས་བཅད་དབྱེ་བ་ག་ཡོད་འདུག?
ལན=མ་དམིགས་གཉིས་བཤད་དེ་ལ་རྩོད་སྤང་ལ་དབྱེ་བ་གཉིས་ཡོད་དེ། སྣང་རུང་མ་དམིགས་སྐབས་ལ་རྩོད་པ་དང་། མི་སྣང་མ་དམིགས་སྐབས་ལ་རྩོད་པའོ།། །།
༦༣༽མུ་སྟེགས་གྲངས་ཅན་པས་གཙོ་བོ་མེད་ན་སློབ་དཔོན་ཕྱོགས་གླང་གིས་གཙོ་བོར་ཆོས་ཅན་དུ་བཞག་པར་མི་འཐད་ལ་གལ་ཏེ་ཡོད་ན་མེད་པར་འདོད་པ་འགལ་ཞེས་པའི་འགལ་སྤོང་གང་ཤེས་བྲིས?
ལན=དེ་ནི་སྣང་བརྟགས་མ་ཕྱེད་པའི་རྩོད་པ་སྟེ། སྒྲ་དོན་ཡོད་པས་ཆོས་ཅན་མེད་པ་སོགས་སྐྱོན་གསུམ་མེད་ཅིང་། རང་མཚན་མེད་པས་དམ་བཅའ་འགལ་བ་སོགས་གཉིས་སེལ་བ་ཡིན་ནོ།། །།
༦༤༽མུ་སྟེགས་རིག་བྱེད་པས་ལུང་གིས་མ་དམིགས་ན་མེད་པས་ཁྱབ་སྟེ། ལུང་ཚད་མ་ནི་ཤེས་བྱ་ཀུན་གྱི་ཡུལ་ཅན་ཡིན་པའི་ཕྱིར། དཔེར་ན་རིག་བྱེད་བཞིན་ཞེས་འདོད་པ་ལ་སྐྱེས་བུས་བྱས་ཙམ་ལུང་དུ་མ་ངེས་པའི་ཚུལ་ཇི་ལྟར་འདོད་འདུག?
ལན=ལུང་རྣམས་ནི་རང་རང་གི་སྐབས་ཀྱི་བརྗོད་བྱ་ཙམ་སྟོན་གྱི་དེར་ཉེ་བར་མཁོ་བ་མེད་པ་གཞན་དང་གཞན་སྟོན་པ་ནི་སྐབས་དང་མ་འབྲེལ་བ་ཡིན་ལ་ཐམས་ཅད་ལུང་གཅིག་གིས་བསྟན་པར་ཡང་མི་ནུས་སོ་ཞེས་དེ་ལྟར་འདོད་འདུག་གོ། །།
༦༥༽སྐལ་དོན་ཞེས་པ་ཇི་ལྟ་བུ་ལ་བཞག་པ་ཡིན་དེ་ཚད་མས་ཡོད་ངེས་དང་མེད་ངེས་བསྒྲུབ་ནུས་སམ་རྒྱུ་མཚན་དང་བཅས་བྲིས་ནས་མ་དམིགས་ཙམ་གྱིས་མེད་པར་འདོད་མཁན་སུ་ཡིན?
ལན=མངོན་སུམ་རྗེས་དཔག་ལུང་དང་གསུམ་ལོག་པ་དེ་ལ་བསྐལ་དོན་ཞེས་བྱའི་གལ་ཏེ་ཡོད་མེད་དུ་སྒྲུབ་པའི་ལུང་ཡང་དག་དང་རྟགས་ཡོད་ན་རྣམ་པ་ཀུན་ཏུ་བསྐལ་དོན་ཡང་མི་འགྱུར་བ་དེས་ན་འདིར་དེ་གསུམ་མེད་པའི་དབང་དུ་བྱས་པའོ།། དེ་ཡང་མ་དམིགས་པ་ཙམ་གྱི་མེད་ངེས་ཀྱིས་ཐ་སྙད་སྦྱོར་བ་པོ་ནི་འཇིག་རྟེན་ཕ་རོལ་དང་སྦྱིན་པའི་འབྲས་བུ་མ་དམིགས་པ་ཙམ་གྱིས་མེད་དོ་ཞེས་སྨྲ་བ་རྒྱང་འཕེན་པ་ལ་སོགས་པ་ཡིན་ནོ།། །།
༦༦༽སྣང་རུང་མ་དམིསག་པའི་སྐབས་རྩོད་པ་སྤང་བ་ལ་ས་བཅད་དབྱེ་བ་ཡོད་མེད་གང་རང་ཡིན?
ལན=སྣང་རུང་མ་དམིགས་པའི་སྐབས་རྩོད་པ་སྤང་བ་ལ་ས་བཅད་དབྱེ་བ་ཡོད་དེ། དང་པོ་གཙོ་སོགས་ཆོས་ཅན་སྒྲ་དོན་ཙམ་དུ་བསྟན། དེ་ལས་གཞན་དུ་རང་མཚན་ཡོད་མི་འཐད། དེ་ལ་ལུང་འགལ་སྙམ་པའི་དོགས་པ་སྤང་པ་སྟེ་གསུམ་ཡོད་དོ།། །།
༦༧༽ཡིད་ཆེས་ཚིག་ནི་མི་བསླུ་བའི།། ཞེས་གསུངས་ན་ཡིད་ཆེས་པའི་ཚིག་ཅེས་པ་ལ་ཁྱད་ཆོས་ཇི་ཙམ་ཚང་དགོས་པར་གསུངས་འདུག?
ལན=གཞུང་ལས། ཡིད་ཆེས་ཚིག་ནི་མི་སླུ་བའི།།
སྤྱི་ལས་རྗེས་སུ་དཔག་པ་ཉིད།།
འབྲེལ་བ་དང་ནི་རྗེས་མཐུན་ཐབས།།
སྐྱེས་བུའི་དོན་ནི་རྗོད་བྱེད་དག།
ཞེས་པ་ལྟར་ཡིད་ཆེས་ཚིག་ནི་ཞེས་བྱ་བ་དང་། མི་སླ་བ་ཞེས་བྱ་བ་དང་། སྤྱི་ལས་རྗེས་སུ་དཔག་པ་ཞེས་བྱ་བ་རིམ་བཞིན་ཚིགས་བཅད་རེ་རེས་བཤད་པའི་དབང་དུ་མཛད་དེ། ངག་གང་ལ་བླང་དོར་བཏང་སྙོམས་སུ་བྱ་བའི་དོན་སྟོན་པ་ན་ངག་དེ་བསྟན་བྱའི་དོན་ལ་འབྲེལ་བ་ཅན་ནི་བརྗོད་བྱའི་དོན་དེ་ལ་ཕན་ཚུན་ཕན་པའི་ཕན་པའི་ཡན་ལག་ཏུ་གྱུར་པ་ཡིན་གྱི་འབྲེལ་བ་མེད་པ་ནི་སེ་འུ་བཅུ་པའི་ངག་ལྟ་བུ་སྟེ། སེ་འུ་བཅུ་དང་ཁུར་བ་དྲུག རི་དྭགས་པགས་པ་རྩྭའི་གོང་བུ། ཞེས་པ་ལ་སོགས་པའི་ངག་དེ་ནི་ཕན་ཚུན་ཕན་པའི་འབྲེལ་བ་མེད་པ་དཔེར་ན་ནད་ལ་ཕན་པའི་སྨན་གྱི་ཚུལ་འཆད་པ་ན་སྒྲའི་རྐྱེན་དང་རྣམ་འགྱུར་ལ་སོགས་པ་གཞན་བརྗོད་པ་བཞིན་ནོ།། །།
༦༨༽སངས་རྒྱས་པས་གང་ཟག་ལ་ལ་རྒྱུད་ཀྱི་ཉོན་མོངས་པའམ་སྐྱོན་ཐམས་ཅད་ཟད་པར་ཡོད་པའི་ཁུངས་སམ་རྒྱུ་མཚན་ཇི་ལྟར་དྲངས་འདུག?
ལན=གཞུང་ལས། འགྲིབ་དང་ཕུལ་བྱུང་བརྟེན་པ་ཀུན།།
མི་མཐུན་ཕྱོགས་དང་བཅས་ཉིད་ཕྱིར།།
དེ་གོམས་པ་ལས་བདག་འགྱུར་བས།།
ལ་ལ་ཟག་པ་ཟད་པར་འགྱུར།། ཞེས་པ་ལྟར་རང་གི་གཉེན་པོ་འཕེལ་བས་འགྲིབ་པ་དང་གཉེན་པོ་འགྲིབ་པ་ན་དེ་ཕུལ་དུ་བྱུང་བ་སྟེ་ལྷག་པར་འཕེལ་བ་ལ་བརྟེན་པ་ཆགས་སོགས་ཉེས་པ་ཀུན་ནི་འཕེལ་འགྲིབ་ཡོད་པ་དེའི་ཕྱིར་ན་རང་སྤོང་བྱེད་ཀྱི་མི་མཐུན་ཕྱོགས་དང་བཅས་པ་ཉིད་ཀྱི་ཕྱིར། བདག་མེད་པ་སོགས་གཉེན་པོ་དེ་གོམས་པ་རབ་ཀྱི་མཐར་ཐུག་པ་ལས་ཤེས་རྒྱུད་གཉེན་པོ་དེའི་བདག་ཉིད་དུ་འགྱུར་བ་ཡོད་པ་དེ་བས་ན། རྒྱུད་ཀྱི་ཁྱད་པར་ལ་ལ་དག་གི་ཟག་པ་སྟེ་འདིས་འཁོར་བར་ཟག་ཅིང་ལྟུང་བར་བྱེད་པ་ཉོན་མོངས་པ་ཐམས་ཅད་ཟད་པར་འགྱུར་བ་སྲིད་དོ།། །།
༦༩༽མུ་སྟེགས་རིག་བྱེད་པས་རིག་བྱེད་ཆོས་ཅན། བདེན་པའི་དོན་ཅན་ཡིན་ཏེ། སྐྱེས་བུས་མ་བྱས་པའི་ཕྱིར། ཞེས་པ་ལ་སངས་རྒྱས་པས་འགོ་མཚུངས་ཀྱི་རིགས་པས་ཇི་ལྟར་བཀག་འདུག?
ལན=གཞུང་ལས། ཚིག་རྣམས་བདེན་པ་ཉིད་ཀྱི་རྒྱུ།། ཡོན་ཏན་སྐྱེས་བུ་ལ་བརྟེན་ཕྱིར།།
སྐྱེས་བུས་མ་བྱས་ལོག་པའི་དོན།། ཅིས་མིན་ཞེས་ནི་གཞན་དག་བརྗོད།།
ཞེས་པ་ལྟར་ཚིག་རྣམས་བདེན་པ་ཉིད་ཀྱི་རྒྱུ་ཤེས་རབ་དང་བརྩེ་བ་ལ་སོགས་པའི་ཡོན་ཏན་ནི་སྐྱེས་བུ་ལ་བརྟེན་པ་ཁོ་ནའི་ཕྱིར་སྐྱེས་བུས་མ་བྱས་པ་རིག་བྱེད་ནི་བདེན་པའི་རྒྱུ་ལོག་པས་ན་ལོག་པའི་དོན་ཅན་ཅིས་མིན་ཞེས་ནི་གཞན་སངས་རྒྱས་པ་དག་གིས་བརྗོད་དོ། ། །།
༧༠༽འབྲེལ་བ་སྐྱེས་བུས་བྱེད་མིན་ན། བརྡ་རིག་མེད་པར་རྟོགས་པར་འགྱུར། །བརྡ་ལས་དེ་ནི་གསལ་ཡིན་ན། །བརྟགས་པ་གཞན་དག་ནུས་མེད་འགྱུར།། ཞེས་པའི་འགྲེལ་པ་བྲིས?
ལན=དེ་ལྟ་ན་ཨགྣི་ཞེས་པའི་སྒྲ་ཙམ་ཞིག་ཐོས་པ་ན་དེ་མི་ཡི་བརྡ་ཡིན་པར་སྔར་རིག་པའམ་ཤེས་པ་མེད་པར་ཡང་སྒྲ་དེས་མར་མེ་སྣང་བ་ཙམ་གྱིས་དངོས་པོ་གསལ་བ་ལྟར་སྒྲ་རང་གི་ངོ་བོས་མེ་རྟོགས་པར་འགྱུར་དགོས་ན་ཡང་དེ་ནི་མི་རིགས་ཏེ་ཡུལ་དེའི་བརྡ་ལ་མ་བྱང་བས་སྒྲ་རྣམས་ཐོས་སུ་ཟིན་ཀྱང་དོན་མི་གོ་བ་ཡོད་པ་དང་། རིག་བྱེད་འདོན་པ་པོ་རྣམས་ཀྱིས་ཀྱང་བརྡ་དོན་སྦྱར་ནས་སློབ་དགོས་པའི་ཕྱིར་རོ།། །།
༼ བཀྲ་ཤིས་བདེ་ལེགས་དཔལ་ལ་སྤྱོད་པར་ཤོག༽
བསམ་འཆར།