འཕྲིན་ལས་དབང་ཕྱུག བསྟན་བཅོས་མཁན་ལོ་ངོ་དང་པ། སྤྱི་ལོ་ ༢༠༢༦ མུན་པ་བཅོམ་པ་དང་གཏན་ནས་བཅོམ་པའི་རྣམ་བཞག་མངོན་པའི་ལུགས་བཟང་གསལ་བའི་སྒྲོན་མེ། ས་བཅད...
འཕྲིན་ལས་དབང་ཕྱུག
བསྟན་བཅོས་མཁན་ལོ་ངོ་དང་པ།
སྤྱི་ལོ་ ༢༠༢༦
མུན་པ་བཅོམ་པ་དང་གཏན་ནས་བཅོམ་པའི་རྣམ་བཞག་མངོན་པའི་ལུགས་བཟང་གསལ་བའི་སྒྲོན་མེ།
བསྟན་བཅོས་མཁན་ལོ་ངོ་དང་པ།
སྤྱི་ལོ་ ༢༠༢༦
ས་བཅད་དང་པོ། མཆོད་བརྗོད་དང་བརྩམ་པར་དམ་བཅའ་བ་ལས།
༡ .༡མཆོད་པར་བརྗོད་ནི།
གང་ཞིག་གདོད་ནས་སྤྲོས་པའི་མུན་བྲལ་ཡང་། །གདུལ་བྱའི་ངོར་ནི་མུན་པ་གཏན་བཅོམ་སྟེ། །
ཤེས་བྱ་ཀུན་ལ་ཆགས་ཐོགས་མེད་མཁྱེན་པ། །ཐུབ་དབང་སྨྲ་བའི་ཉི་མར་གུས་པས་འདུད། །
གང་གི་གསུང་རབ་མངོན་པའི་རྒྱ་མཚོ་ལས། །ལེགས་བཤད་རིན་ཆེན་གཏེར་ཁ་འབྱེད་པ་ལ། །
འགྲན་ཟླ་ཀུན་བྲལ་དབྱིག་གཉེན་ཞབས་པད་དེར། །བདག་གི་སྤྱི་བོའི་རྒྱན་དུ་རྟག་ཏུ་བཞུགས། །
༡ .༢ རྩམ་པར་དམ་བཅའ་བ་ནི།
ཟབ་མོའི་གནད་ལ་དཔྱད་པའི་བློ་གྲོས་དམན། །མཁས་པའི་མདུན་སར་སྨྲ་བའི་སྤོབས་པ་ཆུང་། །
འོན་ཀྱང་དད་པས་གཞུང་གིས་རྗེས་འབྲངས་ཏེ། །དཀའ་བའི་གནད་འདི་མདོར་ཙམ་བྲི་བར་བྱ། །
ས་བཅད་གཉིས་པ། མུན་པའི་དོན་དང་དེའི་དབྱེ་བ་བསྟན་པ།
༢.༡ ཆོས་མངོན་པའི་གཞུང་ལུགས་ནང་མུན་པ་ཞེས་པའི་ཐ་སྙད་འདི་དངོས་པོ་རགས་པ་འོད་མེད་པའི་གནས་སྐབས་ལ་མི་གོ་བར། ཤེས་བྱའི་གནས་ལུགས་ལ་རྨོངས་པའི་མི་ཤེས་པ་ལ་གོ་དགོས། ཇི་ལྟར་མུན་པས་གཟུགས་རྣམས་སྒྲིབ་པ་ལྟར་མི་ཤེས་པས་ཀྱང་དེ་ཁོ་ན་ཉིད་ཀྱི་དོན་མཐོང་བ་ལ་སྒྲིབ་པའི་ཕྱིར་རོ། ། ༢.༢ ཉོན་མོངས་ཅན་གྱི་མི་ཤེས་པ། འདི་ནི་འཁོར་བའི་རྩ་བ་སྟེ། བདག་ཏུ་ལྟ་བ་དང་། འདོད་ཆགས། ཞེ་སྡང་སོགས་ཀྱིས་ཀུན་ནས་བསླངས་པའི་རྨོངས་པ་ཡིན། འདིས་སེམས་ཅན་རྣམས་འཁོར་བ་ནས་འཁོར་བར་འཁྲིད་པར་བྱེད་པ་དེ་ཡིན་ནོ། །༢.༣ ཉོན་མོངས་ཅན་མ་ཡིན་པའི་མི་ཤེས་པ། འདི་ནི་ཉོན་མོངས་པའི་ས་བོན་སྤངས་ཀྱང་། དེའི་ཤུགས་ཀྱིས་བཞག་པའི་བག་ཆགས་སམ་ཤེས་བྱའི་ཡུལ་ལ་མི་གསལ་བའི་རྨོངས་པ་ཞིག་ཡིན། འདིས་འཁོར་བར་འཆིང་མི་སྲིད་ཀྱང་། ཀུན་མཁྱེན་གྱི་ཡེ་ཤེས་ལ་སྒྲིབ་པར་བྱེད་པ་དེ་ཡིན་ནོ། །
ས་བཅད་གསུམ་པ། མུན་པ་བཅོམ་པའི་གོ་དོན་དང་གང་ཟག ཉན་རང་དགྲ་བཅོམ་པ།
༣.༡ ཉན་ཐོས་དང་རང་སངས་རྒྱས་ཀྱི་དགྲ་བཅོམ་པ་རྣམས་ལ་་མུན་པ་བཅོམ་པ་ཞེས་བརྗོད་དེ། ཁོང་རྣམས་ཀྱིས་རང་ཉིད་འཁོར་བ་ལས་ཐར་བར་བྱེད་པའི་གཉེན་པོ་རྟོགས་ཟིན་པའི་ཕྱིར། ༣.༢ བཅོམ་པའི་ངོ་བོ། ཁོང་རྣམས་ཀྱིས་ཉོན་མོངས་ཅན་གྱི་མི་ཤེས་པ་མ་ལུས་པ་བཅོམ་ཟིན། དེ་ཡང་བདེན་པ་བཞིའི་དོན་མངོན་སུམ་དུ་རྟོགས་པ་ལ་བརྟེན་ནས། འདོད་ཁམས་དང་། གཟུགས་ཁམས། གཟུགས་མེད་ཁམས་བཅས་ཀྱི་ཉོན་མོངས་པ་ཐམས་ཅད་སྤངས་པའོ།། ༣.༣ མུན་པ་བཅོམ་ཡང་ཡོན་ཏན་མ་རྫོགས་པའི་རྒྱུ་མཚན། འོན་ཀྱང་ཉན་རང་རྣམས་ལ་ཉོན་མོངས་ཅན་མ་ཡིན་པའི་མི་ཤེས་པ་བཞི་ལྷག་མར་ཡོད་དེ། {༡} སངས་རྒྱས་ཀྱི་ཆོས་ལ་མི་ཤེས་པ། སངས་རྒྱས་ཀྱི་སྟོབས་དང་མི་འཇིགས་པ་སོགས་ཀྱི་ཡོན་ཏན་ལ་རྨོངས་པ། {༢} ཡུལ་བསྐལ་པ་ལ་མི་ཤེས་པ། ཡུལ་ཤིན་ཏུ་རྒྱང་རིང་བའི་དངོས་པོ་ལ་རྨོངས་པ། {༣} དུས་བསྐལ་པ་ལ་མི་ཤེས་པ། དུས་ཤིན་ཏུ་རིང་བའི་ལོ་རྒྱུས་ལ་རྨོངས་པ་དཔེར་ན་ཤཱ་རིའི་བུས་རྒད་པོ་ཞིག་གི་ཐར་པའི་ས་བོན་མ་གཟིགས་པ་ལྟ་བུ། {༤} ཆོས་ཀྱི་བྱེ་བྲག་ལ་མི་ཤེས་པ། དངོས་པོ་སོ་སོའི་རྒྱུ་རྐྱེན་རྣམ་གྲངས་མཐའ་ཡས་པ་ལ་རྨོངས་པའོ། །
ས་བཅད་བཞི་པ།
མུན་པ་གཏན་ནས་བཅོམ་པའི་ཁྱད་པར་བཤད་པ། སངས་རྒྱས་ཁོ་ན་ལ་མུན་པ་གཏན་ནས་བཅོམ་པ་ཞེས་པའི་མཚན་ཉིད་འདི་ཚང་བ་ཡིན། འདི་ལ་ཁྱད་པར་གསུམ་གྱི་སྒོ་ནས་དབྱེ་ཞིབ་བྱ་སྟེ། ༤.༡ གཏན་ནས་ཞེས་པའི་ཚིག་གི་དོན། འདིས་སྤངས་པ་ཕུན་སུམ་ཚོགས་པ་སྟོན་ཏེ། ཉོན་མོངས་ཅན་གྱི་མི་ཤེས་པ་ཙམ་མ་ཟད། དེའི་བག་ཆགས་སམ་ཉོན་མོངས་ཅན་མ་ཡིན་པའི་མི་ཤེས་པ་ཡང་མ་ལུས་པ་གཏན་ནས་སྤངས་པའོ།། ཇི་ལྟར་སྣོད་ནང་གི་སྒོག་པ་བཏོན་ཡང་དྲི་མ་ལྷག་པ་ལྟ་བུ་མ་ཡིན་པར། དྲི་མ་དང་བཅས་པ་དག་པར་མཛད་པའོ།། ༤.༢ ཀུན་ལ་ཞེས་པའི་ཁྱབ་ཁོངས། སངས་རྒྱས་ཀྱིས་ཤེས་བྱ་ཇི་ལྟ་བ་གནས་ལུགས་སྟོང་པ་ཉིད་དང་ཇི་སྙེད་པ་ཡུལ་དུས་རྣམ་གྲངས་ཐམས་ཅད་ལ་མི་ཤེས་པའི་མུན་པ་སངས་ཟིན་པས། ཅི་ཡང་མི་མཁྱེན་པ་མེད་པ་དེ་ཡིན་ནོ། ། ༤.༣ གཉེན་པོ་ཤེས་རབ་ཀྱི་ཁྱད་པར། ཉན་རང་གི་ཤེས་རབ་ནི་སྒྲོན་མེ་ཆུང་ངུ་ལྟར་རང་གི་མདུན་གྱི་ལམ་ཙམ་གསལ་བར་བྱེད་པ་དང་། སངས་རྒྱས་ཀྱི་མཁྱེན་རབ་ནི་ཉི་མ་ཤར་བ་ལྟར་འཇིག་རྟེན་ཐམས་ཅད་ཅིག་ཅར་དུ་གསལ་བར་བྱེད་པའི་ཁྱད་པར་ཡོད་དོ། །
ས་བཅད་ལྔ་པ། མཇུག་བསྡོམས་དང་བཟོད་གསོལ་བསྔོ་བ།
༥.༡ མདོར་ན། ཆོས་མངོན་པའི་གཞུང་དུ་སངས་རྒྱས་ལ་ཕྱག་འཚལ་བའི་སྐབས་སུ། མུན་པ་གཏན་ནས་བཅོམ་པ་ཞེས་པའི་ཚིག་འདི་སྦྱར་བ་ནི། སངས་རྒྱས་ཀྱི་མཁྱེན་པ་དང་སྤངས་པ་གཉིས་ཀ་མཐར་ཐུག་པ་བསྟན་པའི་དོནཡིན་ནོ། ། ཉན་ཐོས་དགྲ་བཅོམ་པ་རྣམས་ཀྱིས་རང་དོན་དུ་འཁོར་བའི་མུན་པ་བཅོམ་ནས་ཐར་པ་ཐོབ་ཀྱང་། གཞན་དོན་དུ་ཤེས་བྱ་ཐམས་ཅད་ལ་རྨོངས་པ་མེད་པའི་ཀུན་མཁྱེན་གྱི་གོ་འཕང་མ་ཐོབ་པས། ཁོང་རྣམས་ལ་བཅོམ་པ་ཞེས་པའི་ཚིག་ཙམ་ལས་གཏན་ནས་ཞེས་པའི་ཆོས་མ་ཐོབ་པ་ཡིན་ནོ། །འདི་ནི་སངས་རྒྱས་དང་ཉན་རང་བར་གྱི་སྤངས་རྟོགས་ཀྱི་ཁྱད་པར་རམ་གནད་འགག་ཆེན་པོ་ཞིག་ལགས་པས། བདག་ལྟ་བུ་ཤེས་རྒྱ་ཆུང་ཞིང་སྦྱངས་པ་དམན་པ་ཞིག་གིས། ཟབ་ཅིང་རྒྱ་ཆེ་བའི་གནད་དོན་འདི་འདྲའི་སྐོར་ལ་དཔྱད་པ་བརྗོད་པ་ནི། མཁའ་ལྡིང་འདབ་ཆགས་ཀྱི་རྗེས་སུ་བྱེའུ་ཆུང་གིས་སྙེག་པ་ལྟར་རང་གི་ནུས་ཚོད་དང་མ་འཚམ་པ་ཞིག་ལགས་མོད་ཡིན་ཀྱང་ཚེ་རབས་ཀྱི་འཕྲེང་བ་གཞན་དུ་ཡང་བརྒྱུད་ལ་བག་ཆགས་བཟང་པོ་འཇོག་པའི་ཆེད་དུ་མདོར་ཙམ་བྲི་པའོ། །བཟོད་གསོལ་ལམ་གཤགས་པ།
༥.༢ རྒྱལ་བའི་གསུང་རབ་མངོན་པའི་རྒྱ་མཚོ་ལས། །ཟབ་མོའི་གནད་དོན་དཔྱད་པ་འདི་བགྱིས་པས། །
བདག་བློ་རྨོངས་པས་འཁྲུལ་དང་མ་རྟོགས་པ། །ཅི་མཆིས་མཁས་པའི་མདུན་སར་བཤགས་པར་བགྱི། །
ཇི་ལྟར་མཁའ་ལ་འདབ་ཆགས་འཕུར་བ་ན། །རང་གི་རྩལ་ལས་ནམ་མཁའི་མཐའ་མི་རྙེད། །
དེ་བཞིན་རྒྱལ་བའི་མཁྱེན་རབ་ཟབ་མོའི་དོན། །བདག་བློས་ཇི་བཞིན་མ་རྟོགས་བཟོད་པར་གསོལ། །
ལུང་རིགས་གཏེར་གྱི་མཛོད་ཁང་འབྱེད་པ་ལ། །རྣམ་དཔྱོད་ལྡེ་མིག་རྣོ་བ་མ་མཆིས་པས། །
ཚིག་དོན་འགལ་དང་ནོངས་པའི་ཆ་ཀུན་ལ། །ཆོས་སྤྱན་མངའ་བའི་ལྷ་རྣམས་བཟོད་པར་མཛོད།
དགེ་བ་བསྔོ་བ།
༥.༣འདི་བགྱིས་དགེ་བའི་སྣང་བ་དཀར་པོ་དེས། །འགྲོ་བའི་སེམས་ཀྱི་མི་ཤེས་མུན་བཅོམ་སྟེ། །
ཀུན་མཁྱེན་ཉི་མ་གསལ་བའི་གོ་འཕང་ལ། །མྱུར་དུ་རེག་པའི་རྒྱུ་རུ་བསྔོ་བར་བགྱི། །
སྤངས་པ་མཐར་ཐུག་མུན་པ་གཏན་བཅོམ་ནས། །རྟོགས་པ་མཐར་ཐུག་ཤེས་བྱ་ཀུན་མཁྱེན་ཏེ། །
སྨྲ་བའི་ཉི་མ་ཐུབ་པའི་དབང་པོ་བཞིན། །འགྲོ་བའི་མགོན་དུ་བདག་ཉིད་འགྱུར་བར་ཤོག །
དགེ་བ་འདི་ཡིས་སྐྱེ་བ་ཐམས་ཅད་དུ། །དམ་པའི་ཆོས་དང་ནམ་ཡང་མི་འབྲལ་ཞིང་། །
རང་དོན་མུན་པ་བཅོམ་པའི་དགྲ་བཅོམ་དང་། །གཞན་དོན་རྫོགས་པའི་སངས་རྒྱས་མྱུར་ཐོབ་ཤོག །
ཅེས་སྨོན་པའང་དགེའོ།། །།
དར་དཀར་ འཕྲིན་ལས་དབང་ཕྱུག
བསམ་འཆར།