ཟག་བཅས་ཟག་མེད་ཀྱི་སྐོར་མུན་པ་རབ་ཏུ་གསལ་བའི་འོད་སྣང་།

མུན་པ་རབ་ཏུ་གསལ་བའི་འོད་སྣང་།  མཆོད་བརྗོད། ཐམས་ཅད་མཁྱེན་པ་རྫོགས་པའི་སངས་རྒྱས་དང་། །ལུང་རྟོགས་ཆོས་ཀྱི་དམ་པ་མཛོད་ཆེན་པོ། །  བདེན་བཞི་རྟོགས་བྱེ...

མུན་པ་རབ་ཏུ་གསལ་བའི་འོད་སྣང་། 

མཆོད་བརྗོད།

ཐམས་ཅད་མཁྱེན་པ་རྫོགས་པའི་སངས་རྒྱས་དང་། །ལུང་རྟོགས་ཆོས་ཀྱི་དམ་པ་མཛོད་ཆེན་པོ། ། 

བདེན་བཞི་རྟོགས་བྱེད་འཕགས་པའི་འདུས་ཚོགས་ལ། །སྒོ་གསུམ་གུས་པའི་སྒོ་ནས་ཕྱག་འཚལ་ལོ། །

རྩོམ་པ་དམ་བཅའ།

གང་གི་མཁའ་དབྱིངས་མཐའ་ལྟར་མི་ཟད་པ། །ལིང་ཏོག་རྨོངས་པས་དཔོག་པར་མི་ནུས་ཀྱང་། ། 

མངོན་མཛོད་རྒྱ་མཚོའི་གཞུང་ལ་འཇུག་ཆེད་དང་། །རང་གི་ཡིད་ལ་གོམས་ཕྱིར་སྤྲོ་བས་རྩོམ། །

ཞེས་མཆོད་པར་བརྗོད་པ་དང་རྩོམ་པར་དམ་བཅའ་བའི་ལེགས་བཤད་གསེར་གྱི་ཕྲེང་བ་སྔོན་དུ་བཏང་ནས། འདིར་གང་ཞིག་ཞུ་བར་བྱ་བ་འདི་ཡང་། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བསྡུ་ན་ཟག་བཅས་དང་ཟག་མེད་གཉིས་སུ་བསྡུས་པ་ཡིན་ཏེ། གལ་ཏེ་ཟག་བཅས་དང་ཟག་མེད་ཀྱི་དོན་ཇི་ལྟ་བ་བཞིན་མ་རྟོགས་ན་སྲིད་པའི་མཚོ་འདིར་འཁྱམས་ཏེ། སངས་རྒྱས་ཀྱི་གོ་འཕང་ནམ་ཡང་རྙེད་པར་མི་འགྱུར་བས། ཟག་བཅས་དང་ཟག་མེད་ཀྱི་དོན་ནི་ནམ་མཁའི་མཐའ་ལྟར་རྒྱ་ཆེ་བས། བློ་གྲོས་དམན་ཞིང་སྦྱངས་པ་ཆུང་བའི་སྐྱེ་བོ་རང་ཉིད་ཀྱིས་རྟོགས་མི་ནུས་ལ། འོན་ཀྱང་དེ་རྟོགས་པའི་ཕྱིར་རིག་པའི་ཞིང་ས་ན་ས་བོན་དང་འདྲ་བའི་རྟེན་འབྲེལ་ཞིག་བསྐྲུན་ཏེ། དད་པའི་སེམས་ཀྱིས་རྩྭ་རྩེའི་ཟིལ་པ་ཙམ་ཞིག་བླངས་ནས་ཅི་ལྕོགས་གང་ཤེས་ཀྱི་སྒོ་ནས་དེ་ཉིད་ཞུ་བར་བྱ་བ་ཡིན་ལགས། །

འདིར་འབྲི་བ་ལ་ས་བཅད་རྣམ་པ་བཞི་སྟེ།

༡༽ ཆོས་མངོན་པ་མཛོད་ཀྱི་བརྗོད་བྱ། ༢༽ བརྗོད་བྱ་དེའི་མཚན་ཉིད། ༣༽ བརྗོད་བྱ་དེའི་དབྱེ་བ། ༤༽ བརྗོད་བྱ་དེ་ལ་བསྡུ་ཚུལ་ལོ། ། དང་པོ། ཆོས་མངོན་པ་མཛོད་ཀྱི་བརྗོད་བྱ། འདི་ལ་བརྗོད་བྱ་ངོས་བཟུང་བ་དང་། ཟག་བཅས་ཟག་མེད་ཀྱི་གོ་དོན། བརྗོད་བྱ་འདི་བཞག་པའི་དགོས་པ་གསུམ་ལས། ༡༽ བརྗོད་བྱ་ངོས་བཟུང་བ་ནི། 

རྩ་བ་ལས།

ཟག་བཅས་ཟག་པ་མེད་ཆོས་རྣམས། །

ཞེས་གསུངས་པ་ལྟར་ཟག་བཅས་དང་ཟག་མེད་ཀྱི་ཆོས་རྣམས་ནི་ཆོས་མངོན་པ་མཛོད་ཀྱི་བརྗོད་བྱ་ཡིན་ལགས། ཀུན་མཁྱེན་ཆེན་པོས་ཀྱང་། “གང་དག་ཆོས་མངོན་པར་བསྟན་པ་ལ་རག་ལས་པའི་རབ་ཏུ་རྣམ་པར་འབྱེད་པར་བྱ་བའི་ཆོས་ནི་ཟག་བཅས་རྣམས་དང་། ཟག་པ་མེད་པའི་ཆོས་རྣམས་སོ། །” ཞེས་གསུངས་སོ། །

༢༽ ཟག་བཅས་ཟག་མེད་ཀྱི་གོ་དོན་ནི། གང་ཟག་པ་ནི་རྩ་བའི་ཉོན་མོངས་པ་ལྔ་ (ཡང་ན་དྲུག་) དང་ཉེ་བའི་ཉོན་མོངས་པ་ཉི་ཤུ་ལ་གོ་དགོས་པ་ཡིན་ལ། དེ་དག་གི་སྒོ་ནས་འཁོར་བ་ལས་མ་ཐར་བར་ཟག་པར་བྱེད་པས་ན་“ཟག་པ་”ཞེས་བཞག་པ་ཡིན། ཟག་བཅས་ནི། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་པར་འགྱུར་བའི་ཆོས། དཔེར་ན་བུད་མེད་མཛེས་པ་ལྟ་བུ་ཟག་བཅས་ཀྱི་ཡུལ་ལོ། །

ཟག་མེད་ནི། དམིགས་པའམ་མཚུངས་ལྡན་གང་རུང་གི་སྒོ་ནས་ཀྱང་ཟག་པ་མ་རྒྱས་པའི་ཆོས། དཔེར་ན་ཟག་མེད་ཀྱི་ལམ་ལྟ་བུའོ། ། (དགྲ་བཅོམ་པའི་རྒྱུད་ཀྱི་ཟག་མེད་ཀྱི་ཆོས་ལྟར་རོ།)

༣༽ བརྗོད་བྱ་བཞག་པའི་དགོས་པ་ནི། ཆོས་མངོན་པ་མཛོད་ཀྱི་སྐབས་སུ་བརྗོད་བྱ་གཙོ་བོ་ཟག་བཅས་དང་ཟག་མེད་དུ་བཞག་སྟེ། འདུས་བྱས་དང་འདུས་མ་བྱས་ཞེས་གཙོ་བོར་མ་བཞག་པའི་དགོས་པ་ནི། གང་ཟག་བཅས་ཡིན་ན་ཐ་གཅིག་ཏུ་ (གཏན་དུ་) སྤང་བྱ་ཡིན་པས་ཁྱབ་པ་དང་། ཟག་མེད་ཡིན་ན་ཐ་གཅིག་ཏུ་བླང་བྱ་ཡིན་པས་ཁྱབ་པའི་རྒྱུ་མཚན་གྱིས་ཡིན། འདུས་བྱས་ཡིན་ན་ཐ་གཅིག་ཏུ་སྤང་བྱ་ཡིན་པས་མ་ཁྱབ་སྟེ། ལམ་གྱི་བདེན་པ་ནི་རྒྱུ་རྐྱེན་ལས་སྐྱེས་པའི་འདུས་བྱས་ཡིན་ཡང་། ལམ་བདེན་ནི་སྤང་བྱ་མ་ཡིན་པར་བླང་བྱ་ཡིན་པའི་ཕྱིར་རོ། །(ཟག་བཅས་ནི་ཉོན་མོངས་པའི་སྙིང་པོ་ཅན་ཡིན་པས་སྤང་བྱ་ཉིད་དོ།) དེ་བས་མཁས་མཆོག་དབྱིག་གཉེན་གྱིས་ཆོས་མངོན་པ་མཛོད་ཀྱི་སྐབས་སུ་བརྗོད་བྱའི་རྩ་བ་འདུས་བྱས་དང་འདུས་མ་བྱས་ཀྱི་སྒོ་ནས་མ་བཞག་པར། ཟག་བཅས་དང་ཟག་མེད་ཀྱི་སྒོ་ནས་འཇོག་པ་ཡིན་ནོ། །

གཉིས་པ། བརྗོད་བྱ་དེའི་མཚན་ཉིད། འདི་ལ་ཟག་བཅས་ཀྱི་མཚན་ཉིད། ཟག་མེད་ཀྱི་མཚན་ཉིད། འདུས་མ་བྱས་གསུམ་གྱི་མཚན་ཉིད་དེ་གསུམ་ལས། ༡༽ ཟག་བཅས་ཀྱི་མཚན་ཉིད། 

དམིགས་པ་དང་མཚུངས་ལྡན་གྱི་སྒོ་ནས་ཟག་པ་རྒྱས་སུ་རུང་བ།
༢༽ ཟག་མེད་ཀྱི་མཚན་ཉིད། དམིགས་པ་དང་མཚུངས་ལྡན་གྱི་སྒོ་ནས་ཟག་པ་རྒྱས་སུ་མི་རུང་བ། རྩ་བ་ལས། ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། ། ཞེས་གསུངས་སོ། །

༣༽ འདུས་མ་བྱས་གསུམ་གྱི་མཚན་ཉིད་ལ། ནམ་མཁའི་མཚན་ཉིད།  ཀུན་མཁྱེན་ཆེན་པོས་མཛད་པའི་འགྲེལ་པ་ལས། མི་སྒྲིབ་པ་སྟེ་གང་ན་གཟུགས་ཀྱི་གོ་འབྱེད་པའོ། ། སོ་སོར་བརྟགས་འགོག་གི་མཚན་ཉིད། བར་ཆད་མེད་པའི་ལམ་གྱིས་བསྡུས་པའི་ཤེས་རབ་ཀྱི་སྟོབས་ཀྱིས་ཐོབ་པར་བྱ་བའི་འགག་བྱ་ཟག་བཅས་དང་བྲལ་བའི་ཆའོ། ། སོ་སོར་བརྟགས་མིན་འགོག་པའི་མཚན་ཉིད། རྐྱེན་མ་ཚང་བའི་སྟོབས་ཀྱིས་ཆོས་མ་འོངས་པ་རྣམས་སྐྱེ་བ་ལ་གཏན་དུ་གེགས་བྱེད་པའོ། །

གསུམ་པ། བརྗོད་བྱ་དེའི་དབྱེ་བ། འདི་ལ་ཟག་བཅས་ཀྱི་དབྱེ་བ་དང་ཟག་མེད་ཀྱི་དབྱེ་བ་གཉིས་ལས། ༡༽ ཟག་བཅས་ཀྱི་དབྱེ་བ། ལམ་གྱི་བདེན་པ་མ་གཏོགས་པའི་འདུས་བྱས་ཀྱི་ཆོས་ཐམས་ཅད་ཟག་བཅས་ཡིན་ནོ། །

༢༽ ཟག་མེད་ཀྱི་དབྱེ་བ། འདུས་བྱས་ལས་ལམ་གྱི་བདེན་པ་དང་། འདུས་མ་བྱས་གསུམ་སྟེ་ནམ་མཁའ། སོ་སོར་བརྟགས་པའི་འགོག་པ། སོ་སོར་བརྟགས་མིན་གྱི་འགོག་པ་བཅས་བཞིའོ། །གཞུང་ལས། ཟག་མེད་ལམ་གྱི་བདེན་པ་དང་། །འདུས་མ་བྱས་རྣམས་གསུམ་ཡང་སྟེ། ། ཞེས་གསུངས་སོ། །

བཞི་པ། བརྗོད་བྱ་དེ་ལ་བསྡུ་ཚུལ། འདི་ལ་ཁམས་བཅོ་བརྒྱད་ཟག་བཅས་ཟག་མེད་དུ་བསྡུ་ཚུལ་དང་། དབང་པོ་ཉེར་གཉིས་ཟག་བཅས་ཟག་མེད་དུ་བསྡུ་ཚུལ་གཉིས་ལས། ༡༽ ཁམས་བཅོ་བརྒྱད་ཟག་བཅས་ཟག་མེད་དུ་བསྡུ་ཚུལ་ནི། 

ཀུན་མཁྱེན་གྱི་འགྲེལ་ལུགས་ལས། ཁམས་བཅོ་བརྒྱད་ལས་ཡིད་ཀྱི་ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་ཏེ་དེ་དག་གསུམ་ནི་ཟག་བཅས་དང་ཟག་མེད་གཉིས་ཀ་ཡིན་ལ། ལྷག་མ་བཅོ་ལྔ་པོ་རྣམས་ནི་ཟག་བཅས་ཁོ་ན་ལས། ཟག་མེད་མ་ཡིན་ནོ། །ཞེས་གསུངས་པ་ལྟར། ཟག་བཅས་ནི། གཟུགས་ཅན་གྱི་དབང་པོ་ལྔ་དང་དོན་ལྔ། མིག་གི་རྣམ་ཤེས་སོགས་སྒོ་ལྔའི་རྣམ་ཤེས་ཁམས་ལྔ་སྟེ་བཅོ་ལྔ་པོ་ནི་ཟག་བཅས་ཁོ་ན་ཡིན་ལ། ཡིད་དང་། ཆོས་། ཡིད་ཤེས་གསུམ་གྱི་ནང་གི་ཟག་བཅས་ཀྱི་ཆའོ། ། ཟག་མེད་ནི། ཡིད་དང་ཡིད་ཤེས་ཀྱི་ཁམས་ལས་ལམ་གྱི་བདེན་པས་བསྡུས་པ་དང་། ཆོས་ཀྱི་ཁམས་ལས་ལམ་བདེན་དང་འདུས་མ་བྱས་གསུམ་གྱིས་བསྡུས་པ་རྣམས་སོ། ། གཞུང་ལས།

གཟུགས་ཅན་མིན་པ་ཡིད་དང་ནི། །

ཆོས་དང་ཡིད་ཀྱི་རྣམ་ཤེས་ཁམས། །

དེ་གསུམ་ཟག་བཅས་ཟག་པ་མེད། །

ཞེས་གསུངས་སོ། །

༢༽ དབང་པོ་ཉེར་གཉིས་ཟག་བཅས་དང་ཟག་མེད་དུ་བསྡུ་ཚུལ་ནི། རྩ་བ་ལས།

གསུམ་ཡིན་གསུམ་ནི་དྲི་མ་མེད། །

གཟུགས་ཅན་སྲོག་དང་སྡུག་བསྔལ་དག ། 

ཟག་དང་བཅས་པ་དགུ་རྣམ་གཉིས། །

ཞེས་གསུངས་པ་ལྟར། ཟག་མེད་ཁོ་ན་ནི། ཀུན་ཤེས་པར་བྱེད་པའི་དབང་པོ་དང་། ཀུན་ཤེས་པའི་དབང་པོ། ཀུན་ཤེས་ལྡན་པའི་དབང་པོ་སྟེ་ཟག་མེད་ཀྱི་དབང་པོ་གསུམ་མོ། ། ཟག་བཅས་ཁོ་ན་ནི། གཟུགས་ཅན་མིག་སོགས་ལྔ་དང་ཕོ་མོའི་དབང་པོ་གཉིས་ཏེ་བདུན། སྲོག་གི་དབང་པོ། སྡུག་བསྔལ་གྱི་དབང་པོ་དང་ཡིད་མི་བདེ་བའི་དབང་པོ་སྟེ་ཁྱོན་དབང་པོ་བཅུ་ནི་ཟག་བཅས་ཁོ་ནའོ། ། རྣམ་པ་གཉིས་ཀ་ (ཟག་བཅས་ཟག་མེད་གཉིས་ཀ་) ནི། དད་སོགས་ལྔ་ (དད་པ། བརྩོན་འགྲུས། དྲན་པ། ཏིང་ངེ་འཛིན། ཤེས་རབ།) དང་། ཡིད་ཀྱི་དབང་པོ། བདེ་བ། མཆོག་ཏུ་དགའ་བ། (ཡིད་བདེ།) བཏང་སྙོམས་ཀྱི་དབང་པོ་བཅས་དགུ་ནི་ཟག་བཅས་ཟག་མེད་གཉིས་ཀར་འགྱུར་རོ། །
མདོར་ན་གཞུང་གི་རྩ་བའི་སྡོམ་ནི།

ཟག་བཅས་ཟག་པ་མེད་ཆོས་རྣམས། །ལམ་མ་གཏོགས་པའི་འདུས་བྱས་རྣམས། ། 

ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། ། 

ཟག་མེད་ལམ་གྱི་བདེན་པ་དང་། །འདུས་མ་བྱས་རྣམས་གསུམ་ཡང་སྟེ། ། 

ནམ་མཁའ་དང་ནི་འགོག་པ་གཉིས། །དེ་ལ་ནམ་མཁའ་མི་སྒྲིབ་པའོ། ། 

སོ་སོར་བརྟགས་པའི་འགོག་པ་གང་། །བྲལ་བ་སོ་སོར་སོ་སོར་ཡིན། ། 

སྐྱེ་ལ་གཏན་དུ་གེགས་བྱེད་པ། །འགོག་གཞན་སོ་སོར་བརྟགས་མིན་པས། །

ཞེས་གསུངས་པ་ལྟར་རོ། །
བཟོད་གསོལ།

རིག་པ་དམན་ཞིང་སྦྱངས་པ་ཆུང་སྟོབས་ཀྱིས། །དེ་ལྟར་ཡི་གེའི་སྡེབ་སྦྱོར་ཚིག་དོན་སོགས། ། 

སྐྱོན་འཁྲུལ་ནོངས་པ་ཇི་སྙེད་མཆིས་པ་རྣམས། །མཁྱེན་ཅན་དམ་པ་རྣམས་ཀྱི་བཟོད་གསོལ་ཞུ། །

བསྔོ་བ།

དེ་ལྟར་གང་ཤེས་བརྩམས་པའི་དགེ་བ་དེས། །འགྲོ་བ་རིགས་དྲུག་ཕ་མ་སེམས་ཅན་རྣམས། ། 

ཟག་བཅས་ཟག་མེད་ཆོས་ཀྱི་དོན་རྟོགས་ནས། །མྱུར་དུ་རྣམ་མཁྱེན་གོ་འཕང་འཐོབ་པར་ཤོག །

འཇམ་དབྱངས་ཀུན་དགའ་པས་སོ།།