འདུས་བྱས་ཀྱི་དོན་བཤད་པ་གང་ལ་གང་ཤེས་ཀྱི་གཏམ།

འཕྲིན་ལས། བསྟན་བཅོས་མཁན་ལོ་ངོ་དང་པ། སྤྱི་ལོ་ ༢༠༢༦   གང་ལ་གང་ཤེས་ཀྱི་གཏམ།  གང་ཞིག་རྟེན་ན་ཉེས་པ་ཟད་འགྱུར་ཞིང་། །ཡོན་ཏན་ཡར་ངོའི་ཟླ་ལྟར་འཕེལ་བས...

འཕྲིན་ལས།
བསྟན་བཅོས་མཁན་ལོ་ངོ་དང་པ།
སྤྱི་ལོ་ ༢༠༢༦

 གང་ལ་གང་ཤེས་ཀྱི་གཏམ། 

གང་ཞིག་རྟེན་ན་ཉེས་པ་ཟད་འགྱུར་ཞིང་། །ཡོན་ཏན་ཡར་ངོའི་ཟླ་ལྟར་འཕེལ་བས་ན། །བཤེས་གཉེན་དམ་པ་དེ་ལ་བསྟེན་པར་བྱ། ། ཞེས་གསུངས་པ་ལྟར། རང་ལ་ཚེ་འདིའི་ཕ་མ་གཉིས་ལས་ཀྱང་བཀའ་དྲིན་ལྷག་པའི་དགེ་བའི་བཤེས་གཉེན་དང་མཆེད་གྲོགས་ཡོངས་ལ། སྐུ་གཟུགས་བཟང་པོ་ཞུ་ནི་དང་།

ཐོག་མར་དགེ་བ་ཀླད་ཀྱི་དོན་ལ། མཆོད་བརྗོད་དང་རྩོམ་པ་དམ་བཅའ་གཉིས།

མཆོད་བརྗོད།

ཐུབ་བསྟན་དྲི་མ་མེད་པའི་བདུད་རྩིའི་ཆུས། །འགྲོ་བའི་རྨོངས་པ་མཐའ་དག་བཀྲུས་བྱས་ནས། །

བློ་གྲོས་རིན་ཆེན་རྒྱན་ཚོགས་སྦྱིན་མཛད་པའི། །མི་ཕམ་པདྨ་དཀར་པོ་དེར་ཕྱག་འཚལ། །

རྩོམ་པ་དམ་བཅའ།

འདུས་བྱས་གཏམ་ནི་ཕྲན་ཙམ་འབྲི་བར་བྱ། །

བར་དུ་དགེ་བ་གཞུང་དོན་ལ་ལྔ། ༡༽ འདུས་བྱས་ཀྱི་ཐ་སྙད་བྱུང་ཚུལ། ༢༽ མཚན་ཉིད་བཞག་པ། ༣༽ དབྱེ་བ། ༤༽ རྣམ་གྲངས། ༥༽ མཇུག་བསྡུ་བའོ། ། དང་པོ། 

འདུས་བྱས་ཀྱི་ཐ་སྙད་བྱུང་ཚུལ།  《འཕགས་པ་སྟོབས་པོ་ཆེའི་མདོ་》ལས། “འདུས་བྱས་ཐམས་ཅད་ནི་དྲི་ཟའི་གྲོང་ཁྱེར་དང་འདྲའོ། །འདུས་བྱས་ཐམས་ཅད་ནི་གློག་དང་སྤྲིན་དང་འདྲའོ། །འདུས་བྱས་ཐམས་ཅད་ནི་ཆུའི་ཆུ་བུར་དང་འདྲའོ། །འདུས་བྱས་ཐམས་ཅད་ནི་མར་མེ་དང་འདྲའོ། །” ཞེས་གསུངས་ཡོད་པ་དང་།

《དབུ་མ་རྩ་བ་ཤེས་རབ་》ལས།

གལ་ཏེ་སྐྱེ་བ་འདུས་བྱས་ན། །དེ་ལ་མཚན་ཉིད་གསུམ་ལྡན་གྱུར། །

ཅི་སྟེ་སྐྱེ་བ་འདུས་མ་བྱས། །ཇི་ལྟར་འདུས་བྱས་མཚན་ཉིད་ཡིན། །

ཞེས་དང་།

འདུས་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་གྲུབ། །

ཞེས་གསུངས་པ་དང་། (《རྡོ་རྗེ་གཅོད་པ་》) ལས་ཀྱང་།

སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །

རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་ལྟ། །

ཞེས་གསུངས་པ་དང་། 《མངོན་པ་མཛོད་》ལས་ཀྱང་།

འདུས་བྱས་ཆོས་རྣམས་དེ་དག་ཀྱང་། །གཟུགས་ལ་སོགས་པའི་ཕུང་པོ་ལྔ། །

ཞེས་གསུངས་པས། འདུས་བྱས་ཞེས་པའི་ཐ་སྙད་འདི་《མངོན་པའི་མཛོད་》ལས་ཙམ་མ་ཡིན་པར། མདོ་དང་ཐེག་ཆེན་ཐེག་དམན་གྱི་གཞུང་ལས་ཀྱང་བཤད་སྲོལ་རྒྱ་ཆེན་པོ་འདུག །མདོར་ན་འདུས་བྱས་ཞེས་པའི་ཐ་སྙད་འདི་རང་རང་སོ་སོའི་གཞུང་དང་སྦྱར་ནས་དོན་བརྡ་ཐ་དད་པར་ཡོད་པར་སྙམ་མོ། །

གཉིས་པ། མཚན་ཉིད་བཞག་པ་ལ་གཉིས། གཞན་གྱི་བཞག་ཚུལ་དང་རང་ལུགས་ཀྱི་བཞག་ཚུལ་ལོ། ། ༡༽ གཞན་གྱི་བཞག་ཚུལ་ནི།

རྗེ་བཙུན་ཆོས་ཀྱི་རྒྱལ་མཚན་གྱིས་མཛད་པའི་《མངོན་པའི་མཛོད་ཀྱི་དཀའ་གནད་ལེགས་བཤད་》ལས། “རང་གི་རྒྱུ་རྐྱེན་ལས་སྐྱེས་པས་རབ་ཏུ་ཕྱེ་བར་དམིགས་པ།” ཞེས་བཞག་ཡོད་པ་དང་། རྒྱལ་དབང་དགེ་འདུན་གྲུབ་ཀྱིས་མཛད་པའི་《མཛོད་འགྲེལ་ཐར་ལམ་གསལ་བྱེད་》ལས། “རྒྱུ་རྐྱེན་རྣམས་ཕྲད་ཅིང་འདུས་ནས་བྱས་པའི་འདུས་བྱས།” ཞེས་བཞག་འདུག ། 《མཛོད་འགྲེལ་གཞོན་ནུའི་རྣམ་རོལ་》ལས། “རྒྱུ་རྐྱེན་དུ་མ་འདུས་ཤིང་ཕྲད་ནས་བྱས་པའི་འདུས་བྱས་ཀྱི་ཆོས་རྣམས་ཡིན་ལ།” ཞེས་གསུངས་པ་དང་། 《མཆིམས་ཆུང་》ལས། “མཚན་ཉིད་ནི་རྒྱུ་ལས་སྐྱེས་པའོ། །” ཞེས་གསུངས་སོ། །

༢༽ རང་ལུགས་ལ་བཞག་ཚུལ་ནི།

གོང་གི་མཚན་ཉིད་རྣམས་ལས་ཐ་དད་པ་ཞིག་རང་ལུགས་ལ་མི་བཞག་པར་སྙམ་མོ། །《མཛོད་རང་འགྲེལ་》ལས། “རྐྱེན་རྣམས་འདུས་ཤིང་ཕྲད་ནས་བྱས་པ་དག་ནི་འདུས་བྱས་ཀྱི་ཆོས་རྣམས་ཏེ།” ཞེས་གསུངས་སོ། །

གསུམ་པ། དབྱེ་བ་ནི།

《མཛོད་རང་འགྲེལ་》ལྟར་བཞག་ན། དེ་དག་ཀྱང་གཟུགས་ཀྱི་ཕུང་པོ་དང་། ལ་སོགས་པ་ཚོར་བའི། འདུ་ཤེས་ཀྱི། འདུ་བྱེད་ཀྱི། རྣམ་པར་ཤེས་པའི་ཕུང་པོ་ལྔ་སྟེ། དེ་དག་ཉིད་ནི་འདུས་བྱས་སོ། །རྩ་བ་ལས། “གཟུགས་ལ་སོགས་པའི་ཕུང་པོ་ལྔ།” ཞེས་གསུངས་སོ། ། སྤྱིར་འདུས་བྱས་ཀྱི་ཆོས་ལ་གྲངས་ལས་འདས་པ་ཡོད་ཀྱང་། ལྔར་གྲངས་ངེས་དགོས་པའི་རྒྱུ་མཚན་ཅི་ཡིན་ཞེ་ན། དེ་ལ་ལུང་གིས་སྒྲུབ་པ་དང་། རིགས་པས་སྒྲུབ་པ་གཉིས་ལས། དང་པོ་ལུང་གིས་སྒྲུབ་པ་ནི། 《མཆིམས་ཆེན་》ལས། “བདག་དང་བདག་གིར་འཛིན་པའི་གཞི་རབ་ཏུ་བསྟན་པའི་ཕྱིར་མང་བའམ་ཉུང་བ་མ་ཡིན་ཏེ། བྱིས་པ་དག་ནི་ཕལ་ཆེར་རྣམ་པར་ཤེས་པ་ཉིད་ལ་ནི་བདག་ཏུ་འཛིན་ལ། གཟུགས་ལ་སོགས་པ་ལྷག་མ་རྣམས་ལ་ནི་བདག་གིར་འཛིན་ཏེ།” ཞེས་པ་དང་། 《ཀུན་ལས་བཏུས་》ལས་ཀྱང་། “བདག་ཏུ་འཛིན་པའི་གཞི་རྣམ་པ་ལྔ་བསྟན་པའི་ཕྱིར་ཕུང་པོ་བསྟན་ཏོ། །” ཞེས་དགོས་པ་ལ་ལྟོས་ནས་གྲངས་ངེས་པར་བཤད་དོ། །《མཛོད་འགྲེལ་དབྱིག་གཉེན་དགོངས་རྒྱན་》ལས་ཀྱང་། “བདག་དང་བདག་གིར་འཛིན་པའི་གཞི་བསྟན་པའི་ཕྱིར།” ཞེས་གསུངས་སོ། ། གཉིས་པ་རིགས་པས་སྒྲུབ་པ་ནི། སྤྱིར་ཁ་དོག་ལ་གྲངས་ལས་འདས་པ་ཡོད་ཀྱང་། ཁ་དོག་ཡིན་ན། རྩ་བའི་ཁ་དོག་དང་ཡན་ལག་གི་ཁ་དོག་གཉིས་ཀྱི་ནང་དུ་བསྡུ་བ་བཞིན་ནོ། །

བཞི་པ། རྣམ་གྲངས་ནི།

《མཛོད་》རྩ་བ་ལས།

དེ་དག་ཉིད་དུས་གཏམ་གཞི་དང་། །ངེས་པར་འབྱུང་བཅས་གཞི་དང་བཅས། །

སྤྱིར་བཏང་མིང་གི་རྣམ་གྲངས་ནི། དཔེར་ན། སངས་རྒྱས་ཤཱཀྱ་ཐུབ་པ། ཀུན་མཁྱེན་ཉི་མའི་གཉེན། བུ་རམ་ཤིང་པ་དེ་དག་ནི་སངས་རྒྱས་ཀྱི་མིང་གི་རྣམ་གྲངས་ཡིན་པ་མ་ཟད་ཕན་ཚུན་ཁྱབ་མཉམ་ཡིན་པ་འདུག་ལགས། གཞན་ཡང་དཔེར་ན། རྗེས་སུ་དཔག་པའི་གཞི་དང་བསྒྲུབ་བྱའི་ཆོས་རྣམས་དོན་གཅིག་མིང་གི་རྣམ་གྲངས་ (ཁྱབ་མཉམ་) ཡིན་ཡང་། གོང་གི་འདུས་བྱས་ཀྱི་ཆོས་ཀྱི་རྣམ་གྲངས་ (དུས་དང་། གཏམ་དང་། གཞི་ལྟ་བུ་) ནི་དེ་བཞིན་མ་ཡིན་ནོ། །ཅི་ཕྱིར་ཞེ་ན། རྣམ་གྲངས་དེ་དག་རེ་རེ་བཞིན་འདུས་བྱས་ཀྱི་ཆོས་དང་ཁྱབ་མཉམ་མེད་པའི་ཕྱིར་རོ། ། (ནུས་པ་མེད་པའི་དུས་ལ་སོགས་པ་འདུས་བྱས་ཡིན་ཡང་དུས་ཀྱིས་མ་བསྡུས་པ་སོགས་ཀྱི་ཞིབ་ཆ་ཡོད།)

མཐར་འཇུག་མཇུག་བསྡུ་བ་ནི།

བདག་གིས་ཆོས་མངོན་པ་ལ་བསམ་ཞིང་འཛིན་པའི་དགེ་བའི་རྩ་བ་ཐམས་ཅད་མ་རྒན་སེམས་ཅད་ཐམས་ཅད་ཀྱི་ཕན་བདེའི་རྒྱུར་འགྱུར་བར་ཤོག །

ཆུ་ཁ་ འཕྲིན་ལས།