རྣམ་པར་ཤེས་པའི་སྐོར་ལ་དཔྱོད་པ། ཟབ་དང་རྒྱ་ཆེ་ཤེས་པའི་བློ་གྲོས་འདྲེན་བྱེད་མེད་ཀྱང་དད་པའི་ཕྱག་གིས་བཙལ་བའོ།།  འགྲོ་མུན་སེལ་ལ་ཟླ་མེད་རྟ་བདུན་དབང་...

རྣམ་པར་ཤེས་པའི་སྐོར་ལ་དཔྱོད་པ།

ཟབ་དང་རྒྱ་ཆེ་ཤེས་པའི་བློ་གྲོས་འདྲེན་བྱེད་མེད་ཀྱང་དད་པའི་ཕྱག་གིས་བཙལ་བའོ།། 

འགྲོ་མུན་སེལ་ལ་ཟླ་མེད་རྟ་བདུན་དབང་པོ་རྐང་གཉིས་གཙོ། །མྱང་འདས་ནུབ་རིའི་ཕྱོགས་སུ་གཡོས་རྗེས་སྟོན་པ་ཉིད་དང་ནི། ། 

དབྱེར་མ་མཆིས་པའི་དབྱིག་གཉེན་བསིལ་ཟེར་ཅན་ལ་ཕྱག་འཚལ་ནས། །གཏིང་དཔོག་སྤོབས་པ་མེད་ཀྱང་རྣམ་ཤེས་སྐོར་ལ་ཅུང་ཟད་འབྲི། ། 

ཅེས་མཆོད་བརྗོད་དང་བརྩམ་པར་དམ་བཅའ་སྔོན་དུ་བཏང་ནས། འདིར་རྣམ་པར་ཤེས་པའི་སྐོར་ལ་ཅུང་ཟད་བཤད་པ་ལ། ཐོག་མར་དགེ་བ་ཀླད་དོན། བར་དུ་དགེ་བ་གཞུང་དོན། ཐ་མར་དགེ་བ་མཇུག་དོན་གསུམ། དང་པོ་ལ་བཞི་སྟེ། རྣམ་པར་ཤེས་པའི ངོ་བོ། ངེས་ཚིག སྒྲ་དོན། དབྱེ་བའོ། །དང་པོ་ནི། 

རྣམ་པར་ཤེས་པའི་ངོ་བོ་ནི་ཡུལ་གྱི་ངོ་བོ་སོ་སོར་རིག་པ་ཙམ་དུ་སྐྱེས་པའི་གཙོ་སེམས་དེ་ཡིན། དེ་ནི་དོན་གྱི་ངོ་བོ་རིག་པ་ཡིན་པས་དེ་ལ་རྣམ་ཤེས་ཞེས་བརྗོད་དོ།། གཉིས་པ་ནི། རྣམ་པར་ཤེས་པའི་ངེས་ཚིག་ནི་དོན་གྱི་ངོ་བོ་རྣམ་པར་རིག་པས་ན་རྣམ་པར་ཤེས་པ་ཞེས་བྱ་བ་ཡིན་ཏེ། དེས་དོན་གྱི་ངོ་བོ་ཙམ་ལ་དམིགས་པ་ཡིན་པའི་ཕྱིར་རོ། ། གསུམ་པ་ནི། ལེགས་སྦྱར་གྱི་སྐད་ནས་རྣམ་པར་ཤེས་པ་ལ་བི་ཛྙཱ་ན་ཞེས་བྱ་བ་ཡིན་ཏེ། དེ་ནི་བི་ཞེས་པ་རྣམ་པ་དང་། ཛྙཱ་ན་ཞེས་པ་ཤེས་པ་ལ་འཇུག་པས་དོན་གྱི་ངོ་བོ་རྣམ་པར་རིག་པས་ན་རྣམ་པར་ཤེས་པ་ཞེས་བྱ་བ་ཡིན་ནོ། ། བཞི་པ་ནི། མིག་གི་རྣམ་པར་ཤེས་པ། རྣ་བའི་རྣམ་པར་ཤེས་པ། སྣའི་རྣམ་པར་ཤེས་པ། ལྕེའི་རྣམ་པར་ཤེས་པ། ལུས་ཀྱི་རྣམ་པར་ཤེས་པ། ཡིད་ཀྱི་རྣམ་པར་ཤེས་པ་བཅས་དྲུག་གོ ། 

བར་དུ་དགེ་བ་གཞུང་དོན་ལ་བཞི་སྟེ། ཐེག་དམན་གི་འདོད་ཚུལ། ཁམས་གསུམ་གར་རྣམ་ཤེས་དྲུག་ཇི་ལྟར་ཡོད་ཚུལ། རྣམ་ཤེས་ཚོགས་དྲུག་སོ་སོར་ཕྱེ་ཚུལ་ལོ།། དང་པོ་ལ་གཉིས་ཏེ། བྱེ་བྲག་སྨྲ་བའི་འདོད་ཚུལ་དང་། མདོ་སྡེ་པའི་འདོད་ཚུལ་ལོ།།དང་པོ་བྱེ་བྲག་སྨྲ་བའི་འདོད་ཚུལ་ལ་ལྔ་སྟེ། རྣམ་ཤེས་ཚོགས་དྲུག་དང་དེའི་གྲངས་ངེས། རྣམ་ཤེས་རྣམ་མེད་དུ་ཡུལ་འཛིན་ཚུལ། ཡུལ་དང་ཡུལ་ཅན་གྱི་འབྲེལ་བ་དང་། རྣམ་ཤེས་ཀྱི་བྱེད་ལས་དང་རང་རིག་མི་འདོད་པ་བཤད་པ་དང་། བསྡུས་དོན་ནོ།། དང་པོ་ནི། 

བྱེ་བྲག་སྨྲ་བས་རྣམ་ཤེས་ལ་ཚོགས་དྲུག་ཁོ་ན་འདོད་ཅིང་། ཀུན་གཞི་རྣམ་ཤེས་དང་ཉོན་ཡིད་མི་འདོད་དེ། ལས་ཀྱི་ས་བོན་གང་དུ་འཇོག་པའི་རྟེན་དེ་ཐོབ་པ་ཟེར་བའི་ལྡན་མིན་འདུ་བྱེད་ཀྱི་ཆོས་ཤིག་གིས་བྱེད་པར་འདོད། དེས་ན་ཀུན་གཞི་མི་དགོས་པ་དང་། ང་རྒྱལ་དང་བདག་འཛིན་སོགས་ནི་ཡིད་ཀྱི་རྣམ་ཤེས་དང་འགྲོགས་པའི་ཉོན་མོངས་པ་ཡིན་པར་འདོད་པ་ལས། དེ་དག་གི་རྟེན་དུ་གྱུར་པའི་རྣམ་ཤེས་ལོགས་སུ་ཡོད་པར་མི་འདོད་པའི་ཕྱིར་རོ།། 

གཉིས་པ་ནི། རྣམ་མེད་འདི་ནི་བྱེ་བྲག་སྨྲ་བའི་ཐུན་མོང་མ་ཡིན་པའི་འདོད་པ་ཞིག་ཡིན། ཁོང་ཚོས་ཤེས་པ་ལ་ཕྱི་རོལ་གྱི་དོན་གྱི་རྣམ་པ་ཤར་ནས་འཛིན་པ་མ་ཡིན་པར། ཤེས་པ་དེ་དངོས་སུ་ཕྱི་རོལ་གྱི་དོན་ལ་གཏད་ནས་འཛིན་པར་འདོད། དཔེར་ན། ཤེལ་སྒོ་དྭངས་མས་དངོས་པོ་མཐོང་བ་ལྟར། ཤེས་པའི་སྟེང་དུ་དོན་གྱི་འདྲ་འབག་གམ་རྣམ་པ་གཏོད་མི་དགོས་པར་དོན་དངོས་སུ་རིག་པར་འདོད་དོ། ། 

གསུམ་པ་ནི། བྱེ་བྲག་སྨྲ་བས་ཕྱི་དོན་དོན་དམ་པར་གྲུབ་པར་འདོད་པས། རྣམ་ཤེས་དང་ཡུལ་གཉིས་རྫས་ཐ་དད་དུ་འདོད། མིག་ལ་སོགས་པའི་དབང་པོ་ལྔས་ཡུལ་ལྔ་མཐོང་བ་ན། རྣམ་ཤེས་ལྔས་མཐོང་རྟེན་གྱི་དོན་གྱི་ངོ་བོ་ཙམ་རིག་པ་ཡིན་ལ། ཡིད་ཀྱི་རྣམ་པར་ཤེས་པས་མཐོང་རྟེན་ལས་འདས་པའང་རིག་པ་ཡིན་ནོ།། འོ་ན་རྣམ་ཤེས་ཐོགས་མེད་ཡིན་པས་སྒྲིབ་པའི་བར་དུ་ཆོད་པའང་མཐོང་བར་ཐལ་ཞེ་ན། མ་ཡིན་ཏེ། མངོན་མཛོད་གནས་དང་པོ་ལས། 

མིག་གིས་གཟུགས་རྣམ་མཐོང་རྟེན་བཅས། །དེ་ལ་བརྟེན་པའི་རྣམ་ཤེས་མིན། །

གང་ཕྱིར་བར་དུ་ཆོད་པ་ཡི། །གཟུགས་ནི་མཐོང་བ་མིན་ཕྱིར་རོ། །

ཞེས་སོ།། དབང་པོ་རྟེན་བཅས་ཀྱིས་ཡུལ་མཐོང་བ་ལའང་ཁྱད་པར་ཡོད་དེ། མིག་ཡིད་རྣ་བ་གསུམ་གྱིས་ནི་ཡུལ་དང་མ་ཕྲད་པ་དང་། སྣ་ལྕེ་ལུས་གསུམ་གྱིས་ནི་ཡུལ་དང་ཕྲད་ནས་འཛིན་ཏེ། ཇི་སྐད་དུ། མིག་དང་ཡིད་དང་རྣ་བ་ནི། །ཡུལ་དང་མ་ཕྲད་གསུམ་གཞན་དུ། །སྣ་ལ་སོགས་པ་གསུམ་གྱིས་ནི། །ཡུལ་ནི་མཉམ་པར་འཛིན་པ་ར་འདོད། །ཞེས་སོ།། 

བཞི་པ་ནི། རྣམ་ཤེས་ཀྱིས་ཡུལ་གྱི་ངོ་བོ་ཙམ་རིག་པར་བྱེད་པ་ལས། ཡུལ་གྱི་ཁྱད་པར་རྣམས་ནི་འདུ་ཤེས་ལ་སོགས་པའི་སེམས་བྱུང་གཞན་གྱིས་འཛིན་པར་འདོད། བྱེ་བྲག་སྨྲ་བས་ཤེས་པས་རང་ཉིད་རང་གིས་རིག་པའི་རང་རིག་མི་འདོད་དེ། ཤེས་པ་ནི་ཕྱི་རོལ་གྱི་ཡུལ་ལ་ཁ་ཕྱོགས་པ་ཞིག་ལས། རང་གིས་རང་མཐོང་བ་ནི་རལ་གྲིའི་སོ་ཡིས་རང་ཉིད་མི་གཅོད་པ་དང་། མཛུབ་མོའི་རྩེ་མོས་རང་ལ་མི་རེག་པ་ལྟར་ཡིན་པར་འདོད་དོ། ། 

ལྔ་པ་ནི། བྱེ་བྲག་སྨྲ་བའི་ལུགས་ལ་རྣམ་ཤེས་ནི་ཕྱི་རོལ་གྱི་དོན་དངོས་སུ་འཛིན་བྱེད་ཀྱི་རྣམ་པ་མེད་པའི་གསལ་རིག་ཅིག་ཡིན་པ་དང་། དེ་ཡང་དབང་པོ་ལ་བརྟེན་ནས་ཡུལ་གྱི་ངོ་བོ་ཙམ་འཛིན་པ་ཞིག་ལ་ངོས་འཛིན་བྱེད་ཀྱི་ཡོད་ལ། 

གཉིས་པ་མདོ་སྡེ་པའི་འདོད་ཚུལ་ལ་བཞི་སྟེ། རྣམ་ཤེས་ཀྱི་རྣམ་གྲངས་སམ་དབྱེ་བ་དང་། རྣམ་ཤེས་ཀྱིས་ཡུལ་མཐོང་ཚུལ་ལམ་འཛིན་སྟངས་དང་། འཛིན་རྣམ་གྱི་དབྱེ་བ་དང་། བསྡུས་དོན་ནོ།། དང་པོ་ནི། 

མདོ་སྡེ་པས་རྣམ་ཤེས་ལ་ཚོགས་དྲུག་ཁོ་ན་འདོད་པ་ལས། སེམས་ཙམ་པས་འདོད་པའི་ཀུན་གཞི་རྣམ་ཤེས་དང་ཉོན་མོངས་ཅན་གྱི་ཡིད་གཉིས་མི་འདོད་དོ། །རྣམ་ཤེས་ཚོགས་དྲུག་ནི། དབང་ཤེས་ལྔ་ནི། མིག་ཤེས། རྣ་ཤེས། སྣ་ཤེས། ལྕེ་ཤེས། ལུས་ཤེས་བཅས་ཕྱིའི་དབང་པོ་ལ་བརྟེན་ནས་སྐྱེ་བའི་ཤེས་པ། ཡིད་ཀྱི་རྣམ་ཤེས་ནི། ཡིད་དབང་ལ་བརྟེན་ནས་སྐྱེ་བའི་ནང་གི་ཤེས་པའོ། ། 

གཉིས་པ་ནི། མདོ་སྡེ་པའི་ཁྱད་ཆོས་གཙོ་བོ་ནི་ཕྱི་དོན་ལྐོག་གྱུར་དུ་འདོད་པ་དེ་ཡིན། བྱེ་བྲག་སྨྲ་བས་དབང་ཤེས་ཀྱིས་ཕྱི་དོན་རྗེན་པར་ཐད་ཀར་མཐོང་བར་འདོད་ཀྱང་། མདོ་སྡེ་པས་དེ་ལྟར་མི་འདོད་པར། རྣམ་ཤེས་ཀྱིས་ཕྱི་རོལ་གྱི་དོན་དེ་ཐད་ཀར་མི་མཐོང་བར། ཡུལ་ལྐོག་ན་མོས་རྣམ་པ་གཏད་པ་དང་ཤེས་པ་ཡུལ་གྱི་རྣམ་པར་སྐྱེ་བ་ལ་དོན་རྟོགས་ཞེས་འདོད་དོ། །གཏད་བྱེད་དེ་ལ་ལྐོག་ན་མོ་ཞེས་བརྗོད་དོ།། རྣམ་པ་གཏད་ཚུལ་ནི། ཕྱི་རོལ་གྱི་དངོས་པོ་དཔེར་ན་བུམ་པ་དེས་རང་དང་འདྲ་བའི་རྣམ་པ་ཞིག་དབང་ཤེས་ལ་གཏད་པར་བྱེད། རྣམ་པ་ཤར་ཚུལ་ནི། དབང་ཤེས་དེ་ཡུལ་དེའི་རྣམ་པ་བུམ་པའི་དབྱིབས་དང་ཁ་དོག་སོགས་སུ་ཤར་བ་ཡིན། དཔེར་ན། མེ་ལོང་གི་ངོས་སུ་གཟུགས་བརྙན་ཤར་བ་ལྟར། ཕྱི་དོན་དངོས་དེ་མེ་ལོང་ནང་དུ་མེད་ཀྱང་དེའི་འདྲ་བརྙན་ཤར་བ་ལ་བརྟེན་ནས་ཕྱི་དོན་ཡོད་པར་རྗེས་སུ་དཔག་པ་ཡིན། དེས་ན་སྔོ་འཛིན་ཤེས་པ་ལ་སྔོན་པོའི་རྣམ་པ་གཏད་ནས་སྐྱེ་བ་ཞེས་གསུངས་སོ།། 

གསུམ་པ་ནི། ཡུལ་གྱི་རྣམ་པ་དང་དེ་འཛིན་པའི་ཤེས་པ་གཉིས་ཀྱི་གྲངས་ཀྱི་ཆ་ནས་མདོ་སྡེ་པའི་ནང་གསེས་སུ་འདོད་ཚུལ་མི་འདྲ་བ་གསུམ་བྱུང་ཡོད། ༡༽གཟུང་འཛིན་གྲངས་མཉམ་པ། འདི་ནི་བལྟ་བྱའི་ཡུལ་གྱི་རྣམ་པ་ཇི་ཙམ་ཡོད་པ་དེ་ཙམ་གྱི་ཤེས་པ་ཡང་ཡོད་པར་འདོད་པའི་ཚུལ་ཏེ། དཔེར་ན། ཁྲ་བོ་འཛིན་པའི་དབང་ཤེས་ཀྱི་སྐབས་སུ། ཡུལ་གྱི་སྟེང་ན་སྔོ་སེར་དཀར་དམར་སོགས་ཀྱི་རྣམ་པ་མི་འདྲ་བ་ལྔ་ཡོད་ན། དེ་འཛིན་པའི་ཤེས་པ་ཡང་ལྔ་ཅིག་ཅར་དུ་སྐྱེ་བར་འདོད་པ་ཡིན། དཔེ་སྣམ་བུ་ཁྲ་བོ་གཅིག་ལ་བལྟས་ཚེ་རྣམ་པ་རེ་རེར་ཤེས་པ་རེ་རེ་གྲངས་མཉམ་དུ་སྐྱེ་བའོ།། ༢༽སྒོ་ང་ཕྱེད་ཚལ་བ། འདི་ནི་ཡུལ་གྱི་རྣམ་པ་མི་འདྲ་བ་དུ་མ་ཡོད་ཀྱང་། དེ་འཛིན་པའི་ཤེས་པ་ནི་ངོ་བོ་གཅིག་ལས་མེད་པར་འདོད་པའི་ཚུལ་ཏེ། ཡུལ་ཁྲ་བོ་ལྟ་བུ་གཅིག་གི་སྟེང་ན་རྣམ་པ་མི་འདྲ་བ་དུ་མ་ཡོད་ཀྱང་། དེ་འཛིན་པའི་ཤེས་པ་ནི་ངོ་བོ་གཅིག་ཡིན་པར་འདོད། འོན་ཀྱང་ཤེས་པ་གཅིག་པོ་དེའི་སྟེང་དུ་ཡུལ་གྱི་རྣམ་པ་དུ་མ་དེ་དག་ལྷན་ཅིག་ཏུ་ཤར་བར་འདོད་དོ།། དཔེར་ན། སྒོ་ང་གཅིག་གི་ནང་ན་སེར་རིལ་དང་དཀར་སྤྲིན་གཉིས་ཡོད་པ་ལྟར། ཤེས་པ་གཅིག་གི་སྟེང་དུ་རྣམ་པ་དུ་མ་ཡོད་པས་ན་སྒོ་ང་ཕྱེད་ཚལ་བ་ཞེས་བཏགས་པ་ཡིན་ནོ།། ༣༽སྣ་ཚོགས་གཉིས་མེད་པ། འདི་ནི་ཡུལ་གྱི་རྣམ་པ་དུ་མ་ཡོད་ཀྱང་། ཤེས་པའི་ངོས་ནས་དེ་དག་ཐམས་ཅད་རྣམ་པ་གཅིག་ཏུ་འཛིན་པར་འདོད་པའི་ཚུལ་ཏེ། ཡུལ་གྱི་སྟེང་ན་ཁྲ་བོའི་རྣམ་པ་དུ་མ་ཡོད་པ་བདེན་ཡང་། དེ་འཛིན་པའི་ཤེས་པ་དེ་རྣམ་པ་དུ་མ་རུ་མི་སྐྱེ་བར། ཁྲ་བོ་ཞེས་པའི་སྤྱིའི་རྣམ་པ་གཅིག་གི་ངོ་བོར་སྐྱེ་བར་འདོད། འདིས་ཤེས་པ་ལ་རྣམ་པ་སྣ་ཚོགས་པ་མེད་པར་འདོད་པས་ན་སྣ་ཚོགས་གཉིས་མེད་པ་ཞེས་ཟེར་རོ།། 

བཞི་པ་ནི། མདོ་སྡེ་པས་ཕྱི་དོན་རང་མཚན་པ་ཡོད་པར་འདོད་ཀྱང་། དེ་དག་རྣམ་ཤེས་ལ་ལྐོག་གྱུར་ཡིན་ཞིང་། རྣམ་ཤེས་ཀྱིས་ཡུལ་གྱི་རྣམ་པ་ལ་བརྟེན་ནས་ཕྱི་དོན་རྟོགས་པར་འདོད་པ་ནི་ཁོང་ཚོའི་ལྟ་གྲུབ་ཀྱི་སྲོག་ཤིང་ལྟ་བུ་ཡིན་ནོ།། གཉིས་པ་ཁམས་གསུམ་གར་རྣམ་ཤེས་དྲུག་ཇི་ལྟར་ཡོད་ཚུལ། ༡༽འདོད་ཁམས་ཀྱི་རྣམ་ཤེས་དྲུག་ཡོད་དེ། འདོད་ཁམས་ཀྱི་སེམས་ཅན་མི། དུད་འགྲོ། འདོད་ཁམས་ཀྱི་ལྷ་སོགས་རྣམས་ལ་ཕྱི་རོལ་གྱི་ཡུལ་ལྔ་སྟེ་གཟུགས། སྒྲ། དྲི། རོ། རེག་བྱ་བཅས་ལ་འདོད་ཆགས་ཤུགས་ཆེན་པོ་ཡོད་ཅིང་། རགས་པའི་ལུས་ཕུང་ལ་བརྟེན་ནས་འཚོ་བ་རོལ་གྱི་ཡོད། དེར་བརྟེན་ཡུལ་དེ་དག་ལ་ལོངས་སྤྱོད་པའི་ཆེད་དུ་མིག་གི་རྣམ་ཤེས་ནས་ཡིད་ཀྱི་རྣམ་ཤེས་བར་ཏེ་རྣམ་ཤེས་ཚོགས་དྲུག་པོ་ཆ་ཚང་ཡོད་དོ།། ༢༽གཟུགས་ཁམས་ལ་རྣམ་ཤེས་བཞི་ཡོད་དེ། མིག་གི་རྣམ་ཤེས། རྣ་བའི་རྣམ་ཤེས། ལུས་ཀྱི་རྣམ་ཤེས། ཡིད་ཀྱི་རྣམ་ཤེས་བཅས་ཡོད་ཀྱི། སྣའི་རྣམ་ཤེས་དང་ལྕེའི་རྣམ་ཤེས་གཉིས་མེད་དེ། མིག་དང་རྣ་བ་ནི་སངས་རྒྱས་མཇལ་བ་དང་ཆོས་ཉན་པའི་ཆེད་དུ་ཡོད་ལ། ལུས་ནི་བསམ་གཏན་གྱི་བདེ་བ་མྱོང་ཆེད་དང་ཡིད་ཀྱི་རྣམ་ཤེས་ནི་ཏིང་ངེ་འཛིན་གྱི་ཆེད་དང་། འདིར་རགས་པའི་ཟས་མི་ཟ་བར་ཏིང་ངེ་འཛིན་གྱི་ཟས་ཀྱིས་འཚོ་བ་དང་། དྲི་དང་རོ་སོགས་རགས་པའི་འདོད་ཡོན་ལ་ཆགས་པ་སྤངས་ཟིན་པས་དེ་གཉིས་ཀྱི་དབང་པོ་དང་རྣམ་ཤེས་དགོས་པ་མེད་དོ།། ༣༽གཟུགས་མེད་ཁམས་སུ་རྣམ་ཤེས་གཅིག་པུ་ཡིན་ཏེ། གཟུགས་མེད་ཁམས་ཀྱི་སེམས་ཅན་རྣམས་ལ་གཟུགས་ཀྱི་ཕུང་པོ་རགས་པ་དང་ཕྲ་བ་གང་ཡང་རྩ་བ་ནས་མེད་དེ། དབང་པོ་གཟུགས་ཅན་པ་མེད་པའི་སྟབས་ཀྱིས་མིག་རྣ་བ་སྣ་ལྕེ་ལུས་བཅས་ཀྱི་དབང་པོའི་རྣམ་ཤེས་ལྔ་པོ་སྐྱེ་བའི་རྟེན་གཞི་མེད། དེར་བརྟེན་ཁོང་ཚོར་ཏིང་ངེ་འཛིན་ལ་མཉམ་པར་འཇོག་མཁན་གྱི་ཡིད་ཀྱི་རྣམ་ཤེས་རྐྱང་པ་གཅིག་ལས་མེད་དོ། ། 

གསུམ་པ་རྣམ་ཤེས་ཚོགས་དྲུག་སོ་སོར་ཕྱེ་ཚུལ་ལ་བཞི་སྟེ། འདུས་བྱས་འདུས་མ་བྱས་དང་། ཟག་བཅས་ཟག་མེད་དང་། དགེ་མི་དགེ་ལུང་མ་བསྟན་དང་། ཐོགས་ཐོགས་མེད་དོ།། དང་པོ་ནི། 

རྣམ་ཤེས་ཚོགས་དྲུག་པོ་ནི་འདུས་བྱས་ཡིན་ཏེ། རྒྱུ་དང་རྐྱེན་ལས་སྐྱེ་ཞིང་། སྐད་ཅིག་མར་འཇིག་པའི་ཆོས་ཡིན་པས་སོ། ། 

གཉིས་པ་ནི། རྣམ་ཤེས་ཚོགས་དྲུག་པོ་ནི་ཟག་བཅས་ཡིན་ཏེ། འདིར་བཤད་པའི་སོ་སྐྱེའི་རྒྱུད་ཀྱི་རྣམ་ཤེས་དག་ནི་ཉོན་མོངས་པའི་ས་བོན་དང་བཅས་པ་ཡིན་པས་སོ། ། འཕགས་པའི་མཉམ་བཞག་ཡེ་ཤེས་ནི་ཟག་མེད་ཡིན་ནོ།། 

གསུམ་པ་ནི། སྤྱིར་རྣམ་ཤེས་དྲུག་པོས་ཡུལ་འཛིན་པ་ཙམ་གྱིས་ནི་ཐམས་ཅད་ངོ་བོ་ཉིད་ཀྱིས་ལུང་མ་བསྟན་ཡིན་ཡང་། རྣམ་ཤེས་ཚོགས་དྲུག་པོ་ནི་དགེ་མི་དགེ་ལུང་མ་བསྟན་གསུམ་གའང་སྲིད་དེ། ཀུན་སློང་དགེ་བ་དང་མཚུངས་པར་ལྡན་ན་དགེ་བ་དང་། ཉོན་མོངས་དང་ལྡན་ན་མི་དགེ་བ་དང་། གང་དུ་ཡང་མ་གཏོགས་པ་ལུང་མ་བསྟན་ཡིན་ནོ།། 

བཞི་པ་ནི། རྣམ་ཤེས་དྲུག་པོ་ནི་ཐོགས་མེད་ཡིན་ཏེ། རྣམ་ཤེས་ནི་གཟུགས་ཅན་མ་ཡིན་པར་གསལ་རིག་གི་བདག་ཉིད་ཡིན་པས། རེག་བྱ་དང་གཟུགས་ལྟར་བར་དུ་གཅོད་པའི་ཐོགས་པ་མེད་དོ།། 

ཐ་མར་མཇུག་གི་དོན་ལ་གཉིས་ཏེ། ཁོ་བོའི་རྨོངས་དཔྱད་དང་། དགེ་བསྔོའོ། ། དང་པོ་ལ་གསུམ་སྟེ། འཛིན་ཚུལ་ལ་དཔྱད་པ་དང་། སེམས་སེམས་འབྱུང་ལ་དཔྱད་པ་དང་། མཐར་ཐུག་ཤེས་པ་གཅིག་ཁོ་ན་ཡིན་མིན་ལ་དཔྱད་པའོ།། དང་པོ་ནི། 

མངོན་མཛོད་གནས་དང་པོར། གཞན་ནི་ཆེས་རིང་མྱུར་འཇུག་ཕྱིར། །ཞེས་གསུངས་པ་འདི་ལ། མིག་སོགས་ཀྱི་གོ་རིམ་བཞག་པ་དེ་ནི་ལ་ལས་ཐག་རིང་བ་དང་ཉེ་བ་ལ་འཛིན་ཚུལ་ལ་བཞག་པ་དེ་ནི་ཅུང་ཟད་འཐད་པར་མི་སྙམ་སྟེ། འབྲུག་སྒྲ་ཐོས་ཀྱང་དེའི་གཟུགས་མཐོང་བ་མེད་པ་དང་། དེང་སང་གི་དཔེ་ཞིག་བརྗོད་ན། རེ་ཞིག་སྐབས་མཁའ་གྲུའི་སྒྲ་དེ་ཐོས་ཀྱང་དེའི་གཟུགས་མི་སྣང་བ་དང་། གས་རྫས་ཆེན་པོ་ལྟ་བུའང་མིག་ཤེས་འཛིན་མི་ནུས་པའི་སར་འགས་པའི་སྒྲ་ཐོས་པར་སྲིད་ཀྱང་དེར་ཡོད་པའི་གཟུགས་ནི་མིག་ཤེས་འཛིན་མི་ནུས་སོ།། རྣ་བ་དང་སྣ་གཉིས་ཀྱང་གོ་རིམ་མི་འཐད་པར་སྙམ་སྟེ། སྒྲ་ཐོས་པར་མི་སྲིད་པའི་ས་ནས་བྱུང་བའི་དྲི་རྡུལ་དེ་སྣ་བའི་དབང་པོ་དང་ཕྲད་སྲིད་པར་སྙམ་མོ།། དེས་ན་ཆེས་རིང་བ་དང་མྱུར་འཇུག་གཉིས་ཀྱི་དོན་དེ། གཅིག་ཏུ་འབྲེལ་ནས་བཤད་དགོས་པར་སྙམ་ཏེ། ཆེས་རིང་བའམ་ཉེ་བའི་གཟུགས་དང་སྒྲ་དང་། དྲི་ལྟ་བུ་ལ་ཤེས་པ་དེ་མྱུར་བ་འཇུག་མ་འཇུག་ལ་བཞག་པར་སྙམ་སྟེ། མིག་ཤེས་དེས་གཟུགས་འཛིན་པར་ཡུལ་ཇི་ལྟར་རིང་ཡང་བར་ལ་དུས་ཡུན་མི་འགོར་བར་མྱུར་བ་ཉིད་དུ་འཛིན་པ་དང་། རྣ་བའི་ཤེས་པས་སྒྲ་འཛིན་སྐབས་རིང་བའི་སྒྲ་ཡིན་ན་བར་ལ་དུས་ཡུན་མི་འགོར་བར་མི་ཐོས་ཏེ། དཔེར་ན། རྒྱང་གྲགས་གཅིག་གི་སར་མི་ཞིག་གིས་མི་ཤིང་གཅོད་པའི་སྐབས་སྟ་རེ་ཤིང་ལ་ཕོག་པ་དང་སྒྲ་མི་ཐོས་ཏེ། སྟ་རེ་ཡར་གསོར་བ་ལ་ཐོས་པ་ཡིན་ནོ།། དྲི་ནི་དེའི་རྡུལ་དབང་པོ་ལ་ཕྲད་པའི་བར་དུས་ཡུན་ནི་གོང་གྱི་བར་གྱི་དུས་ཡུན་ལས་མང་པོ་འགོར་བར་སྙམ་མོ།། 

གཉིས་པ་ནི། སྤྱིར་མཚུངས་པར་ལྡན་པ་རྣམ་པ་ལྔ་ཞེས་པ་ནི། གཙོ་བོ་སེམས་དང་སེམས་བྱུང་གཉིས་ཕན་ཚུན་འབྲེལ་བ་གྲུབ་ཚུལ་གྱི་ཁྱད་པར་ལྔ་ལ་བཞག་འདུག རྣམ་པ་ལྔ་དེ་ཡང་། རྟེན་དང་། དམིགས་པ་དང་། རྣམ་པ་དང་། དུས་དང་། རྫས་སོ།། རྟེན་མཚུངས་པ་ཞེས་པའི་སྐབས། དཔེར་ན། རྟེན་མིག་དབང་ལ་གཙོ་སེམས་མིག་ཤེས་དང་སེམས་བྱུང་ཁྱད་འཛིན་གཉིས་དེ་དུས་གཅིག་ལ་བྱུང་བ་ཡིན་ནམ་སྔ་ཕྱི་ཡོད་དམ། གལ་ཏེ་དུས་གཅིག་ལ་ཡིན་ན་ཅིའི་ཕྱིར་གཙོ་སེམས་ཀྱིས་དོན་གྱི་ཁྱད་པར་འཛིན་མི་ནུས་སམ། དེ་ནི་ཤེས་པ་ཡིན་པས་འཛིན་ནུས་པར་སྙམ། ཡང་དུས་གཅིག་ལ་ཡིན་ན་གཉིས་དགོས་པ་མེད་པར་སྙམ་མོ།། གལ་ཏེ་སྔ་ཕྱི་ཡོད་ན་མཚུངས་ལྡན་རྣམ་པ་ལྔ་མེད་པར་སྙམ་སྟེ། དུས་མི་མཚུངས་བས་སོ།། དམིགས་པ་མཚུངས་པ་ལྟ་བུ་ལ་ནི། གཙོ་སེམས་མིག་ཤེས་གཟུགས་ལ་དམིགས་པ་དང་སེམས་བྱུང་ཀྱང་དེ་ལ་དམིགས་ན་ཤེས་པ་གཉིས་ཀྱིས་ཡུལ་གཅིག་ལ་དུས་གཅིག་ཏུ་དམིགས་པར་སྙམ། གལ་ཏེ་ཡིན་ན་དམིགས་ཐོགས་མེད་པར་གྱུར་ཏེ། མིག་ཤེས་གཟུགས་ལ་དམིགས་པའི་སྐབས་རྣ་བའི་ཤེས་པ་སོགས་ཀྱིས་ཀྱང་དུས་གཅིག་ཏུ་རང་སོའི་ཡུལ་དམིགས་ནུས་པར་འགྱུར་སྙམ། དུས་མཚུངས་པ་ལྟ་བུ་དེ་ཡང་། སེམས་བྱུང་གིས་དོན་དེའི་ཁྱད་པར་འཛིན་པ་དང་གཙོ་སེམས་དེས་ཀྱང་དོན་དེ་འཛིན་དགོས་པར་སྙམ་མོ།། 

དེས་ན་རང་གི་འདོད་པ་ནི། དོན་གྱི་ངོ་བོ་འཛིན་པའི་ཆ་ལ་གཙོ་སེམས་དང་། དེའི་ཁྱད་པར་འཛིན་པའི་ཆ་ལ་སེམས་བྱུང་ཞེས་བཞག་པ་ལས་ལོགས་སུ་ཡོད་པར་མི་སྣང་ངོ་།། 

གསུམ་པ་ནི། མཐར་ཐུག་རྒྱུད་གཅིག་ལ་ཤེས་པ་གཅིག་ལས་མེད་པར་སྙམ་སྟེ། ཤེས་པ་དྲུག་པོས་སྐད་ཅིག་གཅིག་ལ་རང་སོའི་ཡུལ་འཛིན་མི་ནུས་པར་སྙམ་མོ།། དཔེ་གསར་ཞིག་བཞག་ན། སྣུམ་འཁོར་དེད་གཡོག་པའི་སློབ་སྦྱོང་གསར་པའི་ཤེས་པ་ལྟ་བུའོ།། 

གསུམ་པ་བསྔོ་བ་ནི། 

དུས་དེར་སྐྱེ་བ་ལྔ་བརྒྱར་པཎྜི་ཏར་གྱུར་དང་། །བརྟན་པའི་འཁོར་ལོའི་ཡང་སྤྲུལ་ཉིད་སྤྲུལ་མང་པོས་ཀྱང་། ། 

ཤེས་པའི་རགས་ཕྲ་མཁྱེན་པ་དཀའ་ན་བདག་འདྲའི་བླུན། །ནོར་ཡོད་བཟོད་ཕུལ་གཞུང་མཐུན་གྱུར་རྣམས་རྟག་ཏུ་བསྔོ། །

ངག་དབང་ཆོས་གྲགས་རྒྱ་མཚོ་ནས་སོ།།